Falepuipui le ali’i na taitaia le au gaoi o oloa

E 28 masina lea ua faasala ai e le  Fa’amasinoga Maualuga le alii o Mareko Esau e nofosala ai i le Toese i Tafuna, ina ua ta’usala o ia i le moliaga mamafa o le gaoi, e mafua mai i le fa’alavelave lea na ia taitaia ai se vaega o alii talavou na osofaia se faleoloa ae ave faagaoi le tele o oloa sa i ai.

O le aso Faraile o le vaiaso na te’a nei na tula’i ai Esau i luma o le Fa’amasinoga Maualuga mo le tuuina atu o lana fa’asalaga. O le ali’i Loia Sili lagolago ia Doug Lowe na tula’i mo le malo, ae o le susuga i le ali’i Loia Fautua ia Rob McNeill na tula’i mo Esau.

Na ulua’i tu’uaia e le malo ia Esau i moliaga mamafa e 2 o le gaoi; 2 moliaga mamafa o le talepe fale i le tulga lua; faapea ai ma moliaga e 2 o le ave faagaoi o ni meatotino sa tuuina atu i lalo o lana vaavaaiga.

Ae i lalo o se maliliega na sainia e Esau ma le malo, lea fo’i na talia e le Fa’amasinoga i le masina na te’a nei, na malie ai loa le malo latou te toe faia se teuteuga i le tagi sa latou fa’aulu fa’asaga ia Esau, ina ia fa’ailoa ai le moliaga o le gaoi, o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, pe faasala i le salatupe e le silia i le $5,000, poo le faasala fo’i i faasalaga uma ia e lua.

I le tali ioe ai o Esau i le moliaga e pei ona toe teuteuina e le malo, sa ia ta’utino ai e fa’apea, i se taimi o le amataga o le tausaga 2019, na ia taitaia ai se vaega o alii talavou sa latou galulue i le Faleoloa o le Lin J. Store i Tafuna, latou te osofa’i ma ave faagaoi oloa mai totonu o le faleoloa.

Na taua atili e Esau i le Fa’amasinoga, e fa’alua ona latou talepe le faleoloa ae ave faagaoi le tele o oloa sa i totonu. O nisi o oloa sa latou tufatufa mo i latou lava, ae o isi oloa na faatau atu i isi tagata e masani ai.

O le gaioiga sa latou faia e aofia ai lo latou la’uina lea o pusa Lialia, o pusa mea’ai tuuapa e pei o pisupo ma supokeli, atoa ai ma isi lava oloa i soo se ituaiga. O le tau aofa’i o oloa sa latou gaoia e tusa ma le $2,313.04.

Ina ua maua le avanoa e fa’aleo ai le talosaga a Esau ma lana loia, sa talosagaina e McNeill le Fa’amasinoga mo se fa’asalaga faanofovaavaaia mo le ua molia.

Na taua e McNeill e fa’apea, ina ua tatala i tua Esau e fa’atatalitali ai le faaiuga o lana fa’amasinoga, sa alu o ia ma saili lana galuega e tausi ai lona aiga. O le taimi nei, o lo o galue o ia i lana galuega fou, ma o ia fo’i o se tagata ua faatuatuaina i lea galuega.

O ia o se Tama e galue malosi mo le tausiga o lona to’alua aemaise si ana fanau e to’atolu, o lo o tulaga lelei pea fo’i lona ID mai le Ofisa o Femalagaaiga. Na talosaga McNeill ina ia talia le fautuaga a le Ofisa Faanofovaavaaia, mo se fa’asalaga mama mo Esau e aunoa ma le tuuina atu o se isi taimi na te tuliina i le Falepuipui.

Na faailoa fo’i e McNeill i le Fa’amasinoga le sauni o Esau e toe totogi le tupe mo oloa sa ia ave faagaoi mai lana gaioiga sa faia faatasi ma nisi o le aufaigaluega.

Na lagolagoina e le loia a le malo le folasaga a McNeill, ma ia talosagaina ai fo’i le Fa’amasinoga ina ia faasala le ua molia i se fa’asalaga faanofovaavaaia.

Na taua e le loia a le malo i le Fa’amasinoga e faapea, na pau lava le itu o lo o naunau i ai le pule o le Faleoloa na a’afia, o le toe totogi atu lea o le tupe mo le tau o ana oloa na gaoia e le ua molia.

Na taua atili e le malo e fa’apea, e tatau ia Esau ona ia totogi atoa le tupe lea sa ia malie ai i totonu o le maliliega e totogi, afai e leai, o le a avea lea ma itu na te le usitaia ai tuutuuga o le latou maliliega ma le malo.

A o le i tuuina mai le faaiuga a le Fa’amasinoga, na toe faatepa ai e le Fa’amasinoga i itu e lua mau faamaonia na sauni le malo e folasia i luma o le vaega iloilo iuga, pe ana faapea e tofu atu lenei mataupu i luma o le vaega iloilo iuga.

O lenei mataupu e pei ona saunoa le Fa’amasinoga, na alia’e mai i le nofoaga o le Faleoloa a le Lin J Store, ina ua taupulepule le ua molia ma nisi o tagata faigaluega e ave faagaoi ni pusa Lialia ma le fa’amoemoe e le toe maua e le Pule o le Faleoloa.

A o la’u e i latou pusa oloa ma tu’u i totonu o se ta’avale, na i ai se taimi na manino lelei ai i le masini pu’eata a le Faleoloa le itu sa tu ai nisi o alii na aofia i le solitulafono, ma faigofie ai loa ona iloa o ia. Ina ua suesueina e le Pule o le Faleoloa i latou nei, sa latou ta’utino ai loa i le moni o tu’uaiga.

Na taua e le Fa’amasinoga e fa’apea, e le gata na molia Esau, ae na molia fo’i ma isi alii sa latou galulue fa’atasi i le Faleoloa na a’afia ona o lenei lava mataupu.

Saunoa le afioga i le Fa’amasino Sili ia Michael Kruse e fa’apea, ua talitonu le Fa’amasinoga i fa’amatalaga uma ma folasaga sa tuuina atu e Loia e itu e lua e fa’atatau i lenei mataupu.

Na pau lava le itu na taua e le Fa’amasinoga e fai ma faamama avega mo se fa’asalaga mo Esau, o lona ta’utino lea i le Ofisa Faanofovaavaaia, o le a ia toe totogiina uma le tupe mo le taui o mea na ave faagaoi. O lea ta’utinoga e pei ona taua e Kruse, ua atagia mai ai le salamo faamaoni o Esau mai lana solitulafono sa faia.

E 7 tausaga na manatu le Fa’amasinoga e faasala ai Esau i le Falepuipui i Tafuna, faapea ai ma lona totogiina o le salatupe e $5,000. O ia fa’asalaga uma o le a faamalumalu, ae o le a nofovaavaaia o ia mo le 5 tausaga i lalo o tuutuuga e ao ona ia usita’i i ai.

O ni isi o ia poloaiga e aofia ai lona tuliina o masina e 28 i le toese e aunoa ma le tatalaina o ia i tua. Ua manatu a maea loa ona tuli e le ua molia le faasalaga faa falepuipui ua tuuina atu, ona ia tuua loa lea o le atunuu ae toe foi atu i Samoa mo le umi o lana nofovaavaaia.

O lea poloaiga o le a taofi lona faataunuuina, fuafua lava i le usita’i o Esau i isi uma tuutuuga o lana nofovaavaaia.

Ua poloaina fo’i o ia na te toe totogi le tupe e $2,313.04. i le Faleoloa o le Lin J. Store mo le totogi o oloa na gaoia.