Tu’uaia se Tina na taumafai ave faanana aisa ma telefoni Toese

Ua molia nei e le malo o Amerika Samoa le Tina lea o lo o tu’uaia i lona taumafai e ave faanana i totonu o le Toese fualaau faasaina o le aisa, atoa ai ma ni telefoni feavea’i se 2 ma le fa’amoemoe e tulei ma faatau i totonu o le toese.

O le pu’e faapagota ai e Leoleo o le Tina ia Josephine Siaumau, ua to’alua ai ia te ia i laua ua molia e le malo i lenei mataupu, talu ona amata mai suesuega i le amataga o le masina lenei.

O le vaiaso na te’a nei na tula’i ai Siaumau i luma o le Fa’amasinoga Faaitumalo mo lana ulua’i iloiloga.

O lo o tu’uaia e le malo le ua molia i moliaga mamafa e 2, e aofia ai le moliaga e tasi o le umia faasolitulafono o fualaau faasaina ma le faamoemoe e tulei ma faatau atu i isi tagata, faapea ai ma le moliaga o le umia faasolitulafono o vaega o le pauta faasaina o le aisa.

E $25,000 le vaega tupe lea ua fa’atulaga e le Fa’amasinoga e tatala ai i tua le ua molia.  O le aso Faraile nei, ua faatulaga e faia ai le ulua’i iloiloga o lenei mataupu.

TAGI A LE MALO

O lenei mataupu na tofu atu i le Ofisa o Leoleo Suesue a le Matagaluega o Leoleo, ina ua talosagaina e le Sui Komesina o Leoleo le faia o se suesuega faapitoa i le mataupu na tula’i mai i le Toese i le aso 3 o Mati, 2020, lea na maua ai e nisi o Leoleo Sinia se Leoleo fou o le Toese o taumafai e ave faanana fualaau faasaina ma ni telefoni feavea’i i totonu o le Toese.

I suesuega a Leoleo na maua ai, e to’atolu i latou o lo o masalomia le aafia i lenei mataupu. O i latou nei e aofia ai le ua molia o Siaumau, o le ali’i Leoleo o le Toese ia Ofisa Leifi Jr, ma le ali’i pagota o Pati Lepou.

O lea ua mae’a ona molia e le malo ia Leifi Jr ma Siaumau, ae le i failaina lava ni moliaga fa’asaga ia Lepou.

Na taua e le malo i le latou tagi e fa’apea, o le mataupu lenei o lo o masalomia na tula’i mai i le va o le alii pagota o Lepou ma Siaumau, lea o lo o taua o le uo tama’ita’i a Lepou, ae na aafia atu ai ma Leifi Jr ina ua totogi tupe e Lepou ia Leifi Jr e auala atu ai le la fesoota’iga ma Siaumau.

Na taua e le malo e fa’apea, i le faaiuga o le masina o Fepuari na te’a nei, o le taimi lea o loo masalomia na sao ai fualaau faasaina i totonu o le Toese e ala i le galuega a le ali’i Leoleo o le Toese ia Leifi Jr.

Na tuu e Lepou le tupe ia Leifi Jr ma lana faatonuga, e alu e ave i lana uo tama’ita’i o loo faatali mai i luma o le pa. Na taunuu Leifi Jr i luma o le Ofisa ma faaauau atu ai lana savali i fafo o le pa, ma ia vaaia ai le tama’ita’i o Siaumau o loo nofo mai i totonu o lana ta’avale.

Na faamaonia e Leifi Jr i Leoleo lona tuu o le tupe ia Siaumau, ae tuu atu e Siaumau fualaau fa’asaina ia te ia, ona alu lea ma momoli ia Lepou i totonu o le Toese. I le aso na sosoo ai, na alu atu ai Lepou ma maua atu Leifi Jr i tua o le Fale’aiga a le Toese, ma ia tuu loa i ai le $80 ma faaleo ai lana faafetai ona o le fesoasoani atu o Leifi Jr i le auina atu i totonu o fualaau fa’asaina.

I le aso 3 o Mati e pei ona taua e le malo i le latou tagi, na toe tula’i mai ai fo’i le gaioiga lava lea e tasi i le va o i latou nei e to’atolu.

E pei ona taua e le malo i le latou tagi e fa’apea, ina ua uma ona fesoota’i Lepou ma le ua molia i lenei mataupu i le telefoni, na faia ai loa le la tonu, o le a faatali mai le ua molia i fafo o le pa o le Toese, ae se’i saili e Lepou se isi e alu atu ma le tupe.

Na malie Leifi Jr e alu ma le tupe, ma ia faatinoina ai loa se gaioiga na mulimuli ane aafia ai o ia ma lana galuega, ina ua ia aga’i sao atu lava ma ulufafo ma le lotoa o le Toese, ma tuu atu le tupe i le ua molia o loo faatali mai i fafo o le pa.

Na iloa atu e se Leoleo Lutena sa i totonu o le Ofisa le taimi na savali ai i fafo Leifi Jr ma le lotoa o le Toese, ae talu ai pa sima o loo siomia ai le lotoa, na mafua ai ona faigata ona iloa atu e le Leoleo Lutena le vaega na alu aga’i i ai Leifi Jr

I se taimi o le aoauli o le aso lava lea, na toe faia ai fo’i talanoaga i le va o Lepou ma le ua molia, ma faailoa atu ai loa e le ua molia ia Lepou, o ia lea ua faatali atu i fafo o le pa o le Toese ma le sapalai o fualaau faasaina, atoa ai ma telefoni feavea’i e 2.

Na ona faailoa lava e Lepou ia Leifi Jr le tala e faatatau i le ua molia o loo faatali mai i fafo o le pa, na aga’i atu ai loa Leifi Jr i luma o le Ofisa ma faataga fesili i le ticket e malaga ai le alii o Lafaele Tauiliili i Samoa.

A o i ai Leifi Jr i luma o le Ofisa o le Toese, na ia iloa atu Siaumau o loo tu mai i fafo o le pa. Na savali atu Leifi Jr i fafo o le pa ma tuu atu ai loa e Siaumau ia te ia se nusipepa o loo afifi ai se pepa sikaleti o loo i ai fualaau faasaina i totonu, atoa ai ma telefoni feavea’i e 2.

Na manatu Leifi Jr e faaauau loa lana savali aga’i i tua o le Alpha Building lea o lo o faatali mai ai Lepou ma tuu i ai fualaau fa’asaina ma telefoni e 2, peita’i e le i taulau lona faamoemoe, ina ua taofi o ia e le Leoleo Lutena ma fesiligia le afifi na tuu atu e Siaumau ia te ia, ae na tali i ai Leifi Jr, o le nusipepa na tuu atu e Siaumau ia te ia.

Na tatala e Leoleo le nusipepa ma maua ai se pepa sikaleti i totonu atoa ai ma telefoni e 2. I totonu o le pepa sikaleti o loo i ai se pepa iila o loo tumu i vaega o le pauta faasaina o le aisa.

Ina ua fesiligia e Leoleo ia Leifi Jr e uiga i lenei mataupu, sa ia faamaonia ai loa, o Siaumau lea na alu atu e kiliva atu fualaau faasaina ma le faamoemoe e ave ia Lepou.

Na taua e le Loia a le malo i le taimi na valaau ai le mataupu a Siaumau mo lana ulua’i tula’i, o lo o isi tagata o loo fuafua le malo e pu’e faapagota mai ona o lenei mataupu, peita’i e le i faailoaina mai poo ai i latou ia.