Nofovaavaaia le alii na maua i ai fualaau faasaina

E 5 tausaga lea ua nofovaavaaia ai le alii lea na tu’uaia i lona umia faasolitulafono o fualaau faasaina, ina ua faamaonia e le Faamasinoga Maualuga le solitulafono sa tu’uaia ai o ia e le malo.

O le vaiaso na te’a nei na tula’i ai Sanelivi Iopu i luma o le Faamasinoga mo le lauina o lana fa’asalaga. O le ali’i Loia Fautua lagolago ia Rob McNeill na tulai mo Iopu, ae o le tamaitai Loia Sili lagolago ia Laura Garvey na tula’i mo le itu a le malo.

Talu mai le taimi na pu’e faapagota ai e Leoleo ia Iopu i le masina o Oketopa 2019, sa taofia pea o ia i le Toese i Tafuna, ina ua le mafai ona ia totogi le tupe e $5,000 sa faatulaga e tatala ai o ia i tua.

Na ulua’i molia o ia e le malo i le solitulafono mamafa o lona umia faasolitulafono o vaega o le pauta o le aisa.

Ae i lalo o le maliliega na sainia e Iopu ma le malo, lea fo’i na talia e le Fa’amasinoga i le masina o Ianuari o le tausaga nei, na malie ai Iopu e tali ioe i le moliaga lea na toe teuteu e le malo le mamafa, le solitulafono o le umia faasolitulafono o vaega o le pauta o le aisa, lea e mafai ona faasala ai se tasi mo le umi e le silia i le 5 tausaga, pe faasala i le salatupe e le silia i le $5,000, poo le faasala foi i faasalaga uma ia e lua.

I le tali ioe ai o Iopu, sa ia ta’utino ai e fa’apea, i se taimi o le masina o Oketopa 2019, sa ia umia ai se paipa tioata sa i ai vaega o le pauta faasaina o le aisa.

Na ta’utino atili le ua molia e fa’apea, ina ua saili e Leoleo lona tino i le aso e pei ona tula’i mai ai lenei faalavelave, sa maua ai i le taga o lona ofu se paipa tioata e faaaoga e ula ai le aisa ia te ia. I totonu o le paipa tioata, sa maua ai vaega o le pauta pa’epa’e o le aisa.

Ina ua maua le avanoa o Iopu mai le Fa’amasinoga, sa ia faatoese ai loa e tusa ai o lana solitulafono sa faia, ma ia talosagaina ai se isi avanoa mo ia e toe fo’i atu ai i lona aiga e tausi lona to’alua ma lana fanau.

Na talosaga Iopu mo se avanoa e toe fo’i ai i tua e saili sana galuega e tausi ai lona aiga, ma toe amata ai se isi itulau fou mo lona olaga. Na faamanino e le ua molia lona faatamala ua mafua ai ona aafia o ia i le tulafono, e le o ia fo’i o se tagata e fiafia i fualaau faasaina poo le ‘ava malosi.

Na talosaga le loia fautua a Iopu i le Faamasinoga mo se faasalaga nofovaavaaia, ina ia maua ai e le ua molia le avanoa e vave ai ona toe fo’i i tua e saili sana galuega e tausi ai lona to’alua ma lana fanau. A o le i taofia e Leoleo ia Iopu i lenei mataupu, sa galue o ia i lana galuega ua tele tausaga o galuega ai. O le taimi nei e pei ona taua e lana loia, e le o toe maua e Iopu lea galuega talu mai le solitulafono lea ua nofosala ai o ia.

O le susuga a Iopu sa galue i le Vaega o le Paka Faasao a Amerika Samoa, e pei ona faamaonia e lana loia i luma o le Fa’amasinoga.

Na faatusatusa e McNeill mataupu sa ta’usala ai nisi i le umia faasolitulafono o fualaau fa’asaina, ma le solitulafono lea ua nofosala ai Iopu.

Fai mai McNeill, e ese mai lava Iopu mai isi tagata ua mae’a ona nofosala ma faasala e le Fa’amasinoga i le umia faasolitulafono o fualaau fa’asaina. E le gata o i latou ia sa umia ma le faamoemoe e tulei ma faatau atu i isi tagata, ae sa i ai foi isi solitulafono na ta’usala muamua ai i latou.

O le susuga a Iopu e pei ona taua e lana loia, o se Tama sa galue faamaoni mo le tausiga o lona aiga. O le tele o tausaga o lona olaga e le i aafia lava o ia i se solitulafono. O se tasi sa faamoemoe i ai le tausiga o lona to’alua ma lana fanau.

Na finau McNeill i le Fa’amasinoga ina ia nofovaavaaia Iopu e aunoa ma le tuuina atu o se isi taimi na te tulia i le Toese, ae ua lava le 5 ma le afa masina lea na taofia ai o ia e fai ma ana faasalaga i lenei mataupu.

Talu ai sa fia malamalama le Faamasinoga i le tulaga o le pepa nofomau a Iopu, na mafua ai ona valaau e le Fa’amasinoga lona Faletua mo le tuuina atu o se faamatalaga e faatatau i le pepa nofomau a le ua molia.

Na taua e le Faletua a Iopu, o lana sponsor fo’i lea, o lo o lelei pea lava le I.D nofomau a Iopu, o ia fo’i o se tagata e faamoemoe i ai lona aiga.

Na fesili le afioga i le alii Faamasino ia Fiti Sunia i le Tina, poo le a sona manatu i le talosaga a Iopu ina ia tatala o ia i tua. Na tali le Tina, “Ou te manatu e tatau ona tatala o ia i tua.”

Na lagolago le malo i le talosaga a le itu tete’e mo se faasalaga nofovaavaaia mo le ua molia. Na taua e le loia a le malo, e laititi lava le vaega o le pauta faasaina o le aisa lea na maua ia Iopu. E le gata foi i lea, mai le tele o tausaga o lona olaga, o le ulua’i taimi lea ua aafia ai o ia i se solitulafono.

Na talia e le Fa’amasinoga faafinauga a loia e faatatau i se faasalaga nofovaavaaia mo Iopu. Saunoa Sunia e fa’apea, e pei ona taua i le Ripoti a le Ofisa Nofovaavaaia, o Iopu o se tagata sa galue malosi mo le atina’eina o lona aiga. Sa galue o ia i le galuega a le Feterale i Amerika Samoa, o se galuega o lo o tausinio i ai le to’atele o tagata i Amerika Samoa latou te fia maua. E talitonu le Fa’amasinoga, ua misi e Iopu lea avanoa ona o le solitulafono ua nofosala ai o ia.

‘Sa lelei lau galuega, ola fiafia fo’i lou aiga i se olaga manuia ona o au galuega lelei, peita’i, ua e faatamala, o le mafuaaga lena o le faaletonu o lona aiga i le taimi nei, ina ua e filifili e te tagofia fualaau faasaina ma e faauo atu i tagata o lo o fiafia i fualaau faasaina,” o le saunoaga lea a Sunia ia Iopu.

E 5 tausaga na manatu le Faamasinoga e faasala ai Iopu i le Toese i Tafuna, peita’i ua faamalumalu le tuliina e le ua molia o lea faasalaga, ae ua nofovaavaaia ai o ia mo le 5 tausaga i lalo o tuutuuga e ao ona usita’i i ai.

O nisi o ia tuutuuga e aofia ai lona tulia o masina e 20 i le Toese i Tafuna. Ua manatu le Fa’amasinoga, ua lava masina e 6 e tuli e Iopu, ae o masina e 14 o lo o totoe ai, o le a taofi le tuliina sei vagana ua tuuina atu se isi poloaiga a le Fa’amasinoga.

“Iopu, o le avanoa mulimuli lenei mo oe. Afai e te toe aafia i se isi solitulafono, o le a le toe i ai se isi avanoa e totoe mo oe,” o le fautuaga lea a Sunia ia Iopu.

O le faaiuga o le masina lenei ua faamoemoe e tatala ai i tua Iopu, pe a mae’a ona tuli aso o lo o totoe e faaatoa ai le 6 masina o lana faasalaga faa falepuipui.