Amata: Fa'asalalauga COVID-19

Talofa lava,


Ua outou faafofoga i le tele o tala mai faasalalauga o tala lata mai e uiga i le coronavirus poo le COVID-19. Ua ou manatu e ao ona e silafia tulaga o loo tutupu i le Laumua i Uosigitone e tusa ai o gaoioiga e tali atu ai.


O le vaiaso ua tuana'i sa pasia ai e le Konekeresi ma sainia e le afioga i le Perestene ia Trump e avea ma tulafono se pili fai faatasi a itufaaupufai mo le $8 miliona e faaopoopo e faatupe ai gaoioiga e tali ai i faalavelave faafuasei. Ua maualuga ma sili atu lea aofaiga i le aofai e masani ona maua faaletausaga mo le Matagaluega e Tautua i Tagata ma lo latou Soifuamaloloina (DHSS), Ofisa Autu; e Faatautaia ma Taofiofia Faama'i (CDC), Faalapotopotoga Aoao a le Malo mo le Soifuamaloloina, ma isi matagaluega. Ou te faafetai i lo'u vaai atu i le galulue soosootauau a taitai i Uosigitone i se mataupu t'ua e pei o lea ma auina atu lea pili ia tau lau o le faamoemoe. O lea pili ua pasia e faatupe ai le faatau o ufi fofoga (masks), totigi lima, laei (gowns), mea e fai ai galuega faamama, faatasi ai ma le sailiga o se vaifofo, faateleina o suega manaomia e sue ai poo maua se tasi i le vairusi, ma nisi fesoasoani e tuuina atu poo fea lava o loo manaomia ai. O se faamuamua sili lea na manaomia ai gaoioiga faataalise faapea.



O le ata lea o le afioga i le Faipule ia Joe Wilson ma a'u nei o loo faalogo i le saunoaga a le afioga i le Sui Peresetene ia Pence a o ia saunoa atu i Sui o le Konekeresi i le vaiaso ua tuanai. O loo ia taitai i se vaega o fomai faapitoa ma tagata faigaluega o loo aofia ai ma le susuga i le fomai ia Ben Carson.


O le tulafono H.R. 6074, e Tapena ma Tali atu ai i le Coronavirus i le tausaga 2020, e aofia ai le $1 piliona mo gaoioiga a setete, teritori ma le faalotoifale, i totonu o le $2.2 piliona ua i le CDC e taofia, saunia ma tali atu ai. O loo faailoa tonu mai foi e lea tulafono fou le $1.2 piliona e puipui ai tagata Amerika o i atunuu ese e ala atu i le Matagaluega o Setete (State Department) ma le Matagaluega a le Iunaite Setete mo Atinae Faavaomalo (USAID), e aofia ai tupe e aveese mai ai tagata Amerika ma tali atu i faafitauli tau soifuamaloloina o loo alia'e mai a o le i o'o mai i le Iunaite Setete. O le isi $20 miliona o le a fesoasoani i pisinisi laiti mo nonoga tupe i taimi o mafatiaga. O le vaega mulimuli, e tusa o le afa o le tupe, $4 piliona, o le a lagolago ai togafitiga, iloiloga o auga o le faamai, sailiga o se vaifofo ma le faatauga mulimuli ane, atoa ai ma le teu ma faasao mea faigaluega e togafiti ai ma'i ma sauni ia lava ma totoe nei mea faigaluega.


E momoli atu la'u faafetai faapitoa i a tatou fomai ma tagata faigaluega ona o a latou taumafaiga ma le nofotapena! Ua loa tausaga o a'otauina outou mo taimi faapenei. Ua ou iloa sa tapena Amerika Samoa ma ou te faafetaia le afioga i le Kovana ma lana au faafoe i lo latou faatautaiga o lea matafaioi mai le amataga.


E faai'u la'u tala i se fautuaga talafeagai mai le CDC ma le Ofisa o le Fomai o loo galue i totonu o le Konekeresi.


O Faatinoga e Puipui ai:


Taofi le pa'i i ou fofoga (mata,isu ma le gutu).
Ufi i se solo ou fofoga pe a tale pe mafatua, ona tia'i lea o le solo i totonu o le lapisi.


Fufulu ma faamama mea e pa'i so'o ai e faaaoga ai faga (spray) e fufulu ai ma solo.


Toaga e fufulu ou lima i le vai ma le fasimolli mo le 20 sekone. A le maua se fasimoli ma le vai, faaaoga mea fufulu lima e 60 pasene le alcohol o loo i ai.


O Tui puipuia- ia tausisi i le faia o tuipuipuia, e aofia ai le tui o le fulu influenza.
Ia alo mamao mai tagata o loo mama'i. Ia ono futu le mamao o oe mai se tagata e te iloa lelei atu o loo i ai auga.


A e ma'i, nofo i le fale.


E le o fautuaina e le CDC le faia o ufi fofoga (facemask) a tagata e le o mama'i e puipui ai i latou mai ma'i tau manava (respiratory diseases).


Ae o ufi fofoga e tatau ona faaaoga e tagata ua i ai auga o le COVID-19. A fai ua ia te oe ni auga o le COVID-19, e le tatau ia te oe ona e alu e faigaluega ae ao ona e tala aao i le falema'i.


O le a ou taulogologo atu pea mo lou silafia. Ia faamanuia le Atua.


Soifua,

Aumua Amata

Sui o le Konekeresi
Washington, DC Office