Tala I Vaifanua

ULUA’I FA’AALIGA TUSIGA ATA AOGA TULAGA MUAMUA LUPELELE

I le Aoga tulaga Muamua a Lupelelei i lenei tausaga, ua latou una’ia malosi ai le fanau ina ia faaaogaina ata tusia e fa’amatala mai ai o latou lagona ma mea ua a’oa’oina ai i latou i potu a’oga i mataupu tau’avea i le a’oga.

“O le ulua’i taumafaiga lenei, ina ia gafatia e le fanau a’oga ona fa’amatalaloto mea ua a’oa’oina ai i latou e latou faia’oga i so’o se mataupu e ala i ata tusia, po’o ata valia, pe o galuega fa’atino fa’apoloketi, ma e tasi lava le vaiaso na fa’atulaga e faia ai e le fanau lea poloketi,” o se fa’amatalaga lea a le tamaita’i faia’oga Edcia Apulu.

I le fa’aaliga lea e lua potu a’oga ua fa’atautaia ai, ua fa’asolo fo’i le fa’atulagaina o ata ma galuega fa’atino ia saunia e le fanau aoga i a latou vasega o i ai. Na fa’ailoa mai, “Sa tuu lenei fa’amoemoe e fa’aalia i le amataga lava o le tausaga aoga, peita’i, sa toe tolopoina, ona o le tele fo’i o mea e vevesi ai le atunuu ona o fa’ama’i pepesi ua lutia ai i taotu i le amataga o lenei tausaga.”

Ina ia mataituina le galuega, ua una’ia malosi lenei fa’amoemoe e le vasega o faia’oga, ia tu’ufa’atasia mai uma galuega ua taumafai i ai le fanau ma o se fa’atinoga sili ona taua ia i latou sa fa’atinoina e le fanau.

Ua i ai galuega ua fa’atino taito’atolu ma fai paga ai fanau a’oga ae o le tele lava, o ata tusia ua faia taito’atasi. Mai le vasega Level K5 se’ia oo i le vasega 8, ua maimoaina a latou galuega ua fa’aalia, ma e maofa fo’i le mafaufau pe a va’aia nisi o ata ua tusia ma valia e le fanau, ae maise fo’i o nisi o galuega fa’atino fa’aatisi ua latou tapena ma fa’aulu mo le fa’aaliga lenei.

O nisi o galuega fa’aatisi ua va’aia lo latou tapenaina o ituaiga fale eseese, fale o initia, fale o esikimo o Alaska, fale o Samoa ma fale fo’i o isi atumotu, ua fa’aalia ai uma. O ata vali ua iloga ai lagona o’otia, lagona o le ita, lagona o le le mautonu, lagona o le fiafia, ma nisi ata fo’i meaola ua latou vaaia i le Siomaga.

O le a fa’asolosolo atu nei ata i le lomiga i le initeneti a le tatou nusipepa e fa’ailoa ai le fanau ma lana na tapena mo lea fa’aaliga tele i Lupelele Elementary mai le aso Lulu se’ia oo i le aso Faraile i lea Laumua.

TAUMAFAIGA TU’UFA’ATASIA TOMAI STEAM & TAPENAGA ATA FA’ASOLO

E lua aso na toe tuufa’atasia ai fanau a’oga o lo’o aofia i le  Vaega o le Fale Film a le National Marine Sanctuary NMS), ina ia faaauau pea ona galulue fa’atasi i latou i le latou taumafaiga e tuufa’atasia le latou ata fa’asolo o Fa’asao uma o lo’o i le Gataifale o Amerika Samoa.

O Fepuari 28 ma le 29, 2020 na toe fa’aauau ai lea fa’amoemoe e tau fa’amae’a le latou lea galuega fa’atino.

O pisinisi - e aofia ai le Bluesky, Ruby Red Cafe ma le Samu’s Ice Cream Shop -ma le matagaluega o a’oga o loo sapaia fa’atasi lea taumafaiga a fanau aoga.

Ua faaigoaina lea vasega o fanau a’oga o le Finafinau Student Sustainability Group, ma ua aofia ai le Fale Film i le taumafaiga, o i latou fo’i e sauniga ata fa’asolo e sapaia taumafaiga uma lava a le NMS.

Ua fa’amamafa lava le fa’aaogaina e i latou o latou tomai ua i ai mai a’oa’oga fa’amatematika, fa’asaeanisi, fa’ainisinia, fa’a-atisi ina ia fa’atautaia ai lea poloketi ma ia maua lona atoaga moomia.

O lenei fo’i le aoga i fanau a’oga, aua o le a fa’amauina tala fa’asolo nei i fa’amaumauga a le NMS ae o lo ua tumau o le latou galuega tuufa’atasi mo le tatou tala fa’asolopito o le Fa’asao i le Gataifale o Amerika Samoa ma le atunuu atoa.

Ua le filifilia nei fanau a’oga mai se a’oga e tasi, peita’i ua filifilia i latou uma ma ua tofu le a’oga maualuga ma ni o latou sui e auai i le Finafinau Student Sustaninability Group ma e to’a tolusefulu i latou ua tu’ufa’atasia mo lea galuega lelei.

Sa alu le latou asiasiga i Fagatele mo a latou ata e tapu’e ai, ma ua latou savavali ma maimoaina fo’i le lalelei o le soifuaga fa’anatura o lo’o teuina fa’apitoa i lea nofoaga po’o le fa’asao fa’anatura, o le feso’ota’iga o le ea, laueleele ma le sami ma meaola uma o lo’o ua aofia ai. O Fagatele o se itu pito i le sami lea o Futiga.

Na aofia fa’atasi  ai lea asiasiga a le fanau a’oga le ali’i o LTJG Brian Caldwell, lea sa fai ma ia fa’amatalaina le tele o mea e ao ina mataituina e le fanau i totonu o lea fa’asao. O Iosefa Siatuu sa ia mua’i fa’ailoa atu fo’i i le fanau, ia tautuana lava ia i latou tulaga uma o le tausia o le saogalemu o i latou uma a’o faia nei asiasiga i Fa’asao o le Gataifale.

A’o le’i tu’ufa’atasia le galuega atoa lea, e faia lava le tauvaga i le va o fanau uma nei e to’a 30 ina ia fa’atino ai le galuega a le sui latou e fa’aulu ane ma fa’ato’a tu’ufa’atasia ai le galuega atoa o se latou poloketi na tuufa’atasia o ata fa’asolo eseese o Fa’asao o le Gataifale o Amerika Samoa.

AUTUAINA AMERIKA SAMOA PAILATE FANAAFI SOOAEMALELAGI

I se lipoti mai Samoa ua lu’i e le tamaita’i pailate o Fanaafi Sooaemalelagi o le Samoa Airways tama’ita’i o lo’o autova’a i le US Army ma le US Airforce ina ia latou taumafai e tauavea mataupu tau Aviation a’o latou maua le tele o avanoa e fa’ataunu’u ai nei ituaiga o aoaoga, ma i’u ane ai ua avea ma Pailate e tautuaina le atunuu i feoa’iga i le Ea.

Sa avea o ia ma pailate i le Samoa Airways talu mai le 2016. I le taimi nei ua amatalia ona tautuaina e ia femalaga’iga i le ea i le va o Pago Pago ma Faleolo Airport, fa’apea fo’i ma le va o Pago Pago ma le Manu’a. E 24 ona tausaga.

“O aso uma lava e eseese tagata e te fetaui i ai i lenei galuega, e fa’afiafiaina fo’i oe pe a to’ai taunuu le faigamalaga i so’o se mea o fuafuaina ma le saogalemu o le mamalu lautele o lo’o fegasoloa’i ma mau faatuatuaina oe i lo latou soifua i luga o le ea,” o sana saunoaga lea e tusa o le galuega o lo’o ia faia i aso ta’itasi.

“O lenei galuega e le fa’apea na’o le fa’afoea o le va’alele i luga o le ea, e tatau fo’i ona e iloa siakia le va’alele ia mautinoa ua lelei atoatoa mo le malaga, e ao ina iloa muamua lava ona utu le kesi o le va’alele, siakia mea uma ia le so’ona ova pauna e avea i luga o va’alele i so’o se malaga. E leai fo’i se faigofie o i ai i lea fo’i galuega e pei uma lava o isi matata.”

Ua ia fa’ailoa, “E to’aititi lava tamaitai ua avea ma pailate i le Samoa Airways, ae o le mea sili lava, ua ofi nisi o tamaita’i i lea fo’i ituaiga o galuega, ma ua fa’amaonia ai i nisi uso tamaitai, e gafatia fo’i e i tatou lea matata. I le lalolagi atoa ua na’o le 6% o pailate o tamaita’i.”

Ua fa’ailoa e Sooaemalelagi lona fa’anaunauta’iga, ma le tagata e matua avea ma fa’amalosi’au ia te ia, o lona tina matua o Nuanua. “O le uiga o le igoa o si ou tina matua o Nuanua, o fa’amoemoega uma lava e ao ina taunu’u ona o le Nuanua na va’aia i le lalolagi. Lea ua taunuu, soo se taimi e i ai le vaalele i luga o le ea, ou te iloa ai, ua ou latalata atili i si ou tina matua, aua na tu’ua e ia le mafutaga i le tausaga 2016.”