Tala I Vaifanua

LITAEA PR. MOSE KATINA - TULA’I DAVID & DEBBIE KATINA

O le afiafi o le aso Sa na faia ai se sauniga i le Malumalu AOG Leone, e aloa’ia ai le fa’au’uga o Pr David & Debbie Katina e avea ma Faife’au i le Ekalesia a le Atua i Leone, lea sa avea ai Pr Mose ma Eseta Katina, ma faife’au mo le 42 tausaga o le la’ua auaunaga si’i i le Atua.

“O le mea mautinoa, o le a i ai o’u sese, ou te vaivai, ae o le auaunaga e ao ina fai, ma ia tatou osia lea faegaiga ma le Atua, ina ia maua sona vi’iga mai ia te’i tatou uma lava, i aso uma,” o se tala lea a Pr David Katina ina ua maea lo la’ua fa’au’uga ma sa tuuina atu se taimi e saunoa ai i le fa’apotopotoga na tumu ai le malumalu AOG i Leone, i le afiafi o le aso Sa na te’a nei.

O le asusuga le Taitai Aoao o le AOG i Amerika Samoa, Pr Aifa Tanucasa sa tula’i na te fa’atautoina Pr Katina ma le Faletua Dennie Katina i le la’ua tofiga fou o le a galulue ai i Leone. O i la’ua fo’i e le fou ia i la’ua le galuega, sa galulue fo’i i la’ua a’o alaala i fafo, peita’i, ua la’ua filifili e late soso’o le fau ma le fau, i le galuega sa tautua ai lo latou tama, Pr Mose ma Eseta Katina i Leone nei, Aumua, e avatu ai se fa’amanuiaga mo le faifeau fou ua nofoia nei le nofoa ua tu’ua e le tama o le aiga, ona ua matua le soifua.

“O le tuuina atu o le sulu a le Atua i se tasi lava o le fanau, o se fa’amanuiaga sili ona taua ma le fa’afiafialoto i so’o se matua. Aua o se mea sili ua faia e lau fanau e fa’ailoa ai sau tausiga ma lau a’oa’oga ia i latou a’o mafuta i lenei olaga,” o se saunoaga fa’aamuia lea a le fa’atina o Mataupu Fa’aupufai o malo i lana auauna ua pasia atu le sulu i lona alo, Pr Mose Katina.

“Pe afai fo’i tutupu mea fa’apenei, ma ua iloga ona savavali o fanau i a’oa’oga a matua ma ua tumau ai e faia le a’oa’iga, o se aiga ua o fa’atasi le futia ma le umele. Fa’afetai tausi ekalesia, fa’afetai tima’i, fa’afetai fo’i tausi ma a’oa’o le fanau, ua matutua ua le toe te’a ese ai.”

I le taimi nei e to’aono alo o Pr David & Debbie Katina, peita’i ua galulue ma alaala pea i latou i Amerika ae ua taliu mai i la’ua i fanua, e osiosi le taulaga i le afio’aga ma le ekalesia na tautua ai o latou matua.

O le susuga le Faife’au Malolo Manumalo Pr Mose Katina o se tasi sa tautua i le US Marine Corp, sa auina atu fo’i i le tafa o taua i Vietnam ma taliu mai ai ma i’u ina avea ai o ia ma Faife’au i le AOG Leone.

I le taeao o le aso Gafua na ala usu ai le fa’aili lea a le Katina Brothers latou te fa’amalosi’au ma usuina a latou pese fa’apitoa i le a’oga Maualuga a Leone, “O se fa’amalosi’au i le fanau a’oga, ia tausaili ma ia tumau ai, aua ne’i galo le Atua i o outou ala uma, e mautinoa fo’i e fa’amanuia mai i a outou taumafaiga.”

PASIA MAOTA O SUI FA’ATUPEGA $720,000 TAOA TAFUNA

Ua pasia e le Maota o Sui  le talosaga a Kovana Lolo Moliga mo le vaega tupe e $720,000 e fa’atupe ai le fausaga o le Ofisa Autu o Tagata Matutua po’o le TAOA lea ua mae’a fausia i le Lions Park i Tafuna.

O le fa’atupega lenei e aumaia sa’o mai tupe totoe ua maua mai i le tausaga fa’aletupe me 2019, lea sa fa’aailoa i le liporti o le tupe na fofogaina e le Kovana sili i lana lauga fa’apitoa i le amataga o lenei tausaga, ma ua fa’ailoa ai e $721,482 lea tupe totoe.

I le aso ananafi sa pasia ai e le Senate i le faitauga fa’alua lea pili a le Maota o Sui, ma o le faitautolu ua fa’amoemoe mo le taeao nei.

O le isi pili a le faigamalo ua ma’ea teena e le Senate.

I le fonotaga a le kapineta a le kovana i le vaiaso ua te’a sa saunoa ai Lolo e fa’apea, “Afai e i ai se mea e manatu ai le Fono e ao ina faia e le faigamalo e fa’aleleia ai nei mataupu e auina mai e tou te taga’i toto’a i ai ma iloilo, e lelei lava ona fa’ailoa mai, ona mafai lea ona faliu i matou e fa’aleleia mea o finagalo i ai, ae le o le na’o le taofiofi ae o lo’o taumafai galuega nei e fa’aleleia ai le fa’agaoioiga o vaega uma o le tatou malo.”

Ua ia fa’ailoa mai, “E le o toe fa’aopoopo nei lafoga e to’esea mai totogi o tagata faigaluega, ae ua na’o na fesuia’i o le fa’aaogaina lava o le lafoga totogi sa i ai muamua.”

“O le fausaga fou lea ua fa’atino nei mo le Ofisa o le TAOA, ua ala ona siitia mai lea nofoaga fou, ina ia mautinoa le saogalemu o tagata matutua mai taimi o galulolo ma galu maualuluga. Ua ia toe fafagua mai le fono faitulafono, ia toe taga’i i lea pili, ma alofagia aua le manatu mama i le saogalemu ma le tautuaina o matua matutua o le atunuu.”

LIPOTI KOMISI TAUMAFA & SUAVAI TAUMAFA: I le amataga o le masina o Fepuari 2020 na oo ai le atunuu i se tulaga fa’aletonu ina ia matauina le faigata ua i ai ina ia motusia fa’afuase’ia le sologa lelei o le toa’i taunu’u mai o va’a oloa e sapalaia le atunuu i oloa o vai taumafa mama, fa’atasi ai ma le tele o isi ituaiga o mea’ai fefa’ataua’i e le vasega o le au fai oa o le atunuu ma Kamupani tetele i fafo.

Ina ua lutia le atunuu i lea fa’afitauli, na fa’aa’e ai loa e Kovana Lolo Moliga le Komisi Fa’apitoa e Taga’i toto’a i le tulaga o mea’ai ma le suavai taumafa i totonu o Amerika Samoa. Ia latou soalaupule fo’i i ni vaifofo e ao ina fa’ataunuu i taimi fa’apenei pe a toe tula’i mai i Amerik Samoa.

O le lipoti na taua’aoina i le fonotaga fa’apitoa a Kovana Lolo Moliga ma lana kapeneta, sa fa’ailoa mai ai e Dr Ruth Matagi-Tofiga, e fa’apea, o le tulaga o le suavai mama ua mae’a tuu fagu mai fafo, ua motusia le sapalai ona ua fa’aletonu le tulaga o feoa’iga o va’a oloa, o le motiusia o lena auaunaga ona fa’aletonu le ma’alofia i totoga o va’a la’u uta, lea au a’afia ai ae o lo’o mautu lava le sapalai o le suavai mama mai laina o paipa vai a le ASPA i le atunuu.  O tulaga lava lea e tasi ua a’afia ai fo’i oloa tau taumafa ma le tapenaga o taumafa i le atunuu ina ua motusia le tautua a va’a ma le silia ai ma le masina atoa.

O le isi ala ua tele ai ona vave ona leai ni oloa mo fa’atauga i totonu o faleoloa, ona ua matele ina si’itia le aofai o fa’atauga a aiga ta’itasi ua manuia i le tufatufaga o pepa mea’ai a le Afa o Gita lea sa a’afia ai le atunuu ia Fepuari 2018. Ua maua e aiga ta’itasi le tele o tupe mai lea alagamanuia, ma ua vave ai fo’i fa’atauga latou uta alaisa.

Ua fa’amaonia mai e le ali’i fa’atonu o fa’ato’aga i le atunuu Sala Dr. Matagiese o lo’o lava ma totoe le tele o fa’ato’aga a aiga Amerika Samoa e sapalaia le atunuu pe afai o le a motusia mo se taimi umi le fa’asologa o va’a fa’ato’ai mai i le atunuu.

I le tulaga o vai taumafa, ua fa’ailoa mai se lipoti a le ASPA, e tusa ma le 68% le tele o suavai ua fa’auia mai paipa vai a le ASPA i le atunuu e mafai ona inumia, ma ua le toatele fo’i ni afioaga o lo’o aofia i le fa’asalalauga tau le fa’apuna muamua le suavai ona fa’ato’a inumia ai lea.