Tala I Vaifanua

2 MALAGA ‘FOTU O SAMOA’ I LE MANU’ATELE

Ua fa’amaonia e le Matagaluega o Uafu ma Malaeva’alele, e lua malaga tofipau a le MV Fotu-o-Samoa i le fa’aiuga o le vaiaso ua te’ai mo le Manu’atele.

I le taeao o le aso Tofi ua te’a sa taunu’u ai le Fotu-o-Samoa mai Apia ma sa aumaia ai le uta ua matele i masini tetele e fa’aaogaina e se tasi o kamupani fai auala ma faufale i le teritori.

Ua fa’ailoa mai, na fa’atuai ina fa’amae’a le la’uina ese mai o le uta a le Fotu o Samoa, ona ua manatu le Vaega o Tiute i luga o le Uafu e ao ina totogia le tiute o nei masini. E le’i maua mai se tala i lea mataupu i le taimi o lenei lomiga.

Nisi o le uta na fa’ailoa mai o uta masani mo fefa’ataua’iga, aofia ai pailate o le aniani mo se tasi o kamupani oloa i le atunu’u. O nisi o uta talo ma uta a le Kamupani a le Vailima.

O le malaga muamua mo Manu’a, sa fa’afoeina i le po o le aso Tofi ua te’a, sa afea muamua le uafu i Ofu ona soso’o lea ma Ta’u. O lea malaga ua na o oloa ma uta a matagaluega ese’ese a le malo.

I le fa’amatalaga mai a ali’i faigaluega e to’alua a le ASPA sa fa’aalia mai e 300 kalone o le kesi ma le kiso e fia auina atu, ae ta’i 55 kalone i le kalone tele lea e tasi, o lona uiga e 16,500 kalone o le kiso ma le kesi. E ese mai lea o kalone o le suauu. Sa i ai fo’i ma le Loli tele e fa’apitoa mo le la’uina o paipa vai i nofoaga ua fa’ailoa mai ua fa’aleagaina ai le paipa o le suavai taumafa.

O lea Loli ua mae’a utaina uma i ai mea faigaluega e fa’aaoga i le faiga o galuega o le suavai taumafa. O i laua ua sauni fo’i mo le galuega o le fela’uaiga o le kesi, kiso ma le suauu ae maise o le faaoo atu o le loli lenei mo galuega toe fa’aleleia o laina o le suavai taumafa i afio’aga ua fa’ailoa mai ua motusia le suavai.

O le malaga lona lua a le Fotu o Samoa sa fa’atulagaina mo le po o le aso Faraile e la’u ai uta ma oloa a tagata lautele. Fa’ailoa mai fo’i e nisi o lo’o togipau e a le Fotu o Samoa mo Manu’a e tusa ma le $30,000. O le ma’ea ai o malaga togipau i Manu’a, sa toe fo’i ai le Fotu-o-Samoa i Apia.

TAUMAFAIGA TAOFIA ULUFALE MAI O LE CORONAVIRUS

O le fesoasoani sili a Kovana Lolo Moliga, Iulogologo Joseph Pereira ua ia fa’aalia le fonotaga o lo’o feagai ai i la’ua ma le sui feso’ota’i a Amerika Samoa i Hawaii, Muliufi Hannemann, i le va ma le pulega fo’i a le Hawaiian Air, e tusa ai o aiaiga fa’amalosia mo e femalaga’i mai i le va o Hawaii ma Amerika Samoa e uia mai i a latou va’alele.

“O lenei taumafaiga ina ia fa’amanino atili i le Hawaiian Air e le o faigofie lava se taumafaiga ina ia taofia le ulufale mai o le Coronavirus i Amerika Samoa ma e mana’omia tele le galulue fa’atasi o Amerika Samoa ma i latou e mafai ai ona tau mautu le faamoemoe maualuga o taumafai nei e taofiofi ai le oo mai o lenei fa’ama’i mata’utia i le atunuu. I le taimi nei, ua o gatasi taumafaiga uma ma le pulega a le Hawaiian Air ma ua lagolagosua e i latou taumafaiga uma mo lea fa’amoemoe.”

O lea fonotaga i Honolulu sa auai sui o le Hawaiian Air e aofia ai le pulesili ia Peter Ingram.

A’o lei’ faia lea fonotaga fa’apitoa, sa mua’i fa’ao’o atu e Lolo le lisi atoa o aiaiga e ao ina fa’amamaluina mo i latou uma e fia ulufale mai i Amerika Samoa.

Faailoa e Iulogologo, “O le tusi lea a le kovana na amata ai loa ona fa’amamalu mai e le Hawaiian Air latou aiaiga mo i latou e faimalaga ia latou va’alele mo Amerika Samoa.”

I le taimi nei, ua fa’amalosia nei e le Hawaiian Air mo i latou uma lava sa i malo ua mae’a i ai le Coronavirus, ae fia ulufale i Amerika Samoa, e ao ina muamua ona nonofo i Hawaii se’ia mae’a le 14 aso talu ona malaga mai na malo ua mae’a i ai le Coronavirus. E ese mai lea e tatau fo’i ona i ai se latou pepa ma’i e fa’ailoa ai sa faia latou suesuega  i le falema’i, tolu aso a’o le’i tuua Hawaii i a latou va’alele mo Amerika Samoa.

Fa’ailoa mai e Iulogologo, ua matua naunau Ingram e galulue fa’atasi ma Amerika Samoa ina ia le pepesi solo lea fa’ama’i  nei mai le oo mai i Amerika Samoa.

Ua fa’ailoa e Ingram, “O le a matou taumafai e taualoa aiaiga uma ua fa’atula’ia mai e le CDC mo le Iunaite Setete fa’atasi ai fo’i ma aiaiga ua fa’amalosia mai e Amerika Samoa ina ia mafai ona fa’atautaia fa’atasi e matou aufaigaluega i so’o se taimi e siakia ai pasese femalaga’i.”

Ua fa’ailoa e Lolo o suesuega uma o lo’o fa’atautaia i Hawaii e fai si tuai ona maua mai o latou fa’aiuga, ina ia mafai ai ona fa’amautinoa suesuega poo maua nisi i nei fa’ama’i.

Ua feso’otai atu fo’i le tatou kovana ia Lt. Gov. Green o Hawaii ma ua ia fa’ailoa mai, “O lo’o feagai fo’i i matou i Hawaii ma lea ituaiga o fa’aletonu. O lo’o ave fo’i matou suesuega e faia mai fa’aiuga e le CDC i Georgia. Na talosaga foi e i matou le faiga o nei suesuega i Honolulu lava ae maise o le suesuega e iloa ai poo ai ua maua i le coronavirus, ae le pasia mai, ua faia lava i Georgia ma e manaomia lava le lua vaiaso fa’atoa maua mai le iuga mo suesuega uma.”

Ua faailoa mai fo’i na ofo atu lava le nofoaga o suesue ma le Ofisa o fomai i Hawaii ina ia faia ai suesuega nei mo le Coronavirus mo isi teritori o Amerika i le Pasefika.

Ona o le tele o nei feuiuiaiga e umi ai le taimi a’o taumafai e vave maua fa’aiuga, o lona uiga o le a mafai lona tatou feutaga’i ma Iapani ina ia latou galulue feso’ota’i ma i tatou i a latou suesuega e mafai ona fa’atino i Hawaii nei.

O le isi lava popolega ua i ai nei o le Kovana, ona o lo’o tuai lava le fa’agasologa o le taumafaiga e maua se vaifofo mo lenei gasegase pipisi. Ma ua oo lava foi i suesuega pe o maua se isi i le Coronavirus, e tuai tele ona toe taunuu mai.