Tala I Vaifanua

TALANOAINA KOVANA LOLO & TA’ITA’I O LE FONO FA’AMAI CORONAVIRUS

Ua talanoaina e Kovana Lolo Moliga ma le fono faitulafono le fa’amai o le coronavirus ma ua una’ia fo’i le tulaga, ua tatau ona soalaupule se gaoioiga e fa’atautaia pe a oo mai nei faigata.

Na mae’a saunoa foi le afioga le peresetene o le Senate Gaoteote Palaie, e tusa o le oo atu o le Kovana sili ina ia fa’ailoa atu ia i latou uma le fuafuaga ua faataoto nei e fa’atautaia tonu i le vaitau e oo mai ai lea fa’ama’i i o tatou laufanua ma a’afia ai o tatou tagatanuu.

Ua toe fa’ailoa lava ua toe fa’aauau nei le fa’asa mo le fa’ama’i pipisi o le misela, sa tatau ona muta lea ia Fepuari 28, 2020.

E to’atasi se tasi ua taofia nei i le falema’i i Leone mo suesuega auiliili mai le faigamalaga a le Hawaiian Air i le amataga o lenei vaiaso talu ona tatala mai femalaga’iga i le ea ina ua tuana’i matagi malolosi i le atunuu. O le ali’i lea e silia i le 20 tausaga o le soifua masa i ai o ia i South Korea ia Fepuari 18, 2020 le taimi tonu fo’i ua fa’amaonia ai le oo o le Coronavirus i South Korea.

SUESUEGA MO MA’I KANESA I LE FALEMA’I E LE TOTOGIA

O le masina lenei o lo’o fa’ataua ai foi suesuega ma togafitiga ua fa’atautaia mo tagata uma  ina ia mautinoa o lo’o e saogalemu mai le Ma’i Kanesa o so’o se ituaiga. O le mau taua lava, ia sailia ina ia mautinoa o e sao mai lea Ma’i tiga, afai fo’i ae maua a’e ua e maua ai, ona vave togafitia lea a’o le’i taitai ona sosolo le Kanesa ma i’u ai ina fa’afaigata togafitiga mo oe, e toe fa’asaoina ai le soifua, ma fa’atele ai tausaga o le mafutaga ma e pele i le li’o o lou aiga ma au uo mamae.

“O le vave ona maua o le Kanesa, o le vave fo’i lea ona togafitia, ma fa’asaoina ai le soifua o le to’atele,” o se fa’asalalauga fa’alaua’itele lea ua fa’ailoa mai e le National Cancer Prevention Month.

“E le popole i se totogi o lau talavai e sailia ai lou kanesa, ua faia fua lenei auaunaga, ona o le naunau lava, ia vave iloa ona vave fo’i lea ona togafitia.”

O le tamaitai o Moira Wright o loo fa’aautu i ai galuega timai o le Kanesa a le tatou Matagaluega o le Soifua Maloloina, sa ia fa’ailoa maia ituaiga suesuega o lo’o matele ona mua’i faia mo tina uma o le atunuu e o’o atu mo nei suesuega.

O le Kanesa o le Faautama, ma le kanesa o le susu, ua masani lava ona faia i afiafi ta’itasi ma e vala’au atu mo ia e faatulaga ai sou avanoa e faia ai lea suesuega ma auina atu i fafo mo le fa’amaoniga.

I lenei masina atoa o lo’o fesoasoani malosi ai le South pacific Watersports Fitness Center i Utulei  e faia fa’atalanoaga i luga o le leitio e fa’alauiloa atili ai i le to’atele le aoga tele o le vave faia o suesuega ma ia vave iloa ai po’o maua oe i le Kanesa, ona faia lea o togafitiga a’o le’i umi ona e nofo ma lea gasegase fita.