Falepuipui se alii mo le 6 tausaga i le umia o fualaau faasaina

E silia i le 6 tausaga lea ua faasala ai e le Fa’amasinoga Maualuga se ali’i e 45 tausaga le matua e nofosala ai i le toese i Tafuna, ina ua ta’usala o ia i moliaga mamafa e lua o lona umia faasolitulafono lea o vaega o fualaau fa’asaina o le aisa.

O le faasalaga e pei ona tuuina atu e le Fa’amasinoga ia Lavea’i Filipo, o lo o atagia atu ai ma le faaiuga a le Fa’amasinoga faasaga ia te ia, i lona le usitaia lea o tuutuuga na tatala ai o ia i tua e faatali ai taualumaga o le mataupu muamua na ulua’i molia ai o ia e le malo.

O le vaiaso na te’a nei na tula’i ai Filipo i luma o le Fa’amasinoga mo le tuuina atu o lana fa’asalaga.

E 2 tagi na ulua’i tu’uaia ai e le malo ia Filipo. I le tagi muamua, na molia ai o ia i le moliaga o le umia faasolitulafono o vaega o le pauta o le aisa, faapea ai ma le moliaga o le umia faasolitulafono o le aisa ma le fa’amoemoe e tulei ma faatau atu i isi tagata. I le tagi lona lua, na tu’uaia ai o ia i le moliaga mamafa e tasi o le umia faasolitulafono  lea o vaega o le pauta o le aisa.

Ae i lalo o se maliliega na sainia e le ua molia ma le malo, lea fo’i na talia e le Fa’amasinoga, na tali ioe ai Filipo i le moliaga o le umia faasolitulafono o vaega o le pauta o le aisa o loo i le tagi muamua, faapea ai ma le moliaga o le umia faasolitulafono o vaega o le pauta o le aisa o loo i le tagi lona lua.

I le tali ioe ai o Filipo i moliaga mamafa e 2, na ia ta’utino ai e fa’apea, i le aso 10 o Iulai 2018 ina ua taofi e Leoleo lana ta’avale, na maua ai e Leoleo se paipa tioata o lo o i ai vaega o le pauta o le aisa. Na ta’utino atili Filipo e fa’apea, a o tatala ai o ia i tua e faatali ai taualumaga o lana mataupu muamua, na toe pu’e faapagota ai o ia e Leoleo i le aso 21 o Tesema 2018, ina ua maua ia te ia se paipa tioata o lo o i ai vaega o le pauta o le aisa.

Ina ua mae’a ona talia e le Fa’amasinoga le maliliega na sainia e le ua molia ma le malo, na faia ai loa le faaiuga e tatala pea Filipo i tua i le mae’a ai lea ona ia totogi o le tupe e $18,000, e faatali ai le aso e lau ai lana faasalaga.

O le aso 15 o Tesema 2019 na faatulaga e lau ai le faasalaga a Filipo, peita’i ina ua valaau lana mataupu, e lei i ai le ua molia i totonu o le potu Fa’amasinoga, ma poloa’i ai loa e le Faamasinoga le tusi saisai e pu’e faapagota ai Filipo. O le taeao na sosoo ai na aga’i atu ai Filipo i le Fale Faamasino ma lona manatu o le aso lea o loo faatulaga ai lana mataupu, ae pu’e faapagota ai o ia e le Masela ma taofia ai loa i le Toese.

Ina ua maua le avanoa a Filipo mai le Fa’amasinoga, sa ia faatoese ai loa e tusa ai o lana solitulafono sa faia, ma ia talosagaina ai loa se isi avanoa mo ia se’i toe fo’i atu ai i tua e tausi lona to’alua ma lona atalii e to’atasi. Na taua e Filipo i le Fa’amasinoga e fa’apea, e leai se manatu ia te ia e soli le tulafono, ae talu ai ua faatamala lana faaiuga sa faia, o le mafua’aga lea ua aafia ai o ia i le tulafono.

Na talosaga lana loia fautua ia Rob McNeill mo se faasalaga faanofovaavaaia, ina ia maua ai le avanoa o Filipo e saili ai sana galuega e tausi ai lona aiga. Na taua e McNeill, o Filipo o se tagata e tautua aiga, e faalagolago fo’i lona aiga ia te ia i lana galuega sa galue ai.

Talu mai le taimi na aafia ai Filipo i fualaau fa’asaina, o le taimi lea na amata ai loa ona tula’i mai faafitauli i totonu o lona aiga, seia oo mai lava i le taimi na pu’e faapagota ai o ia e Leoleo.

Na finau le loia a le malo ia Doug Lowe mo se faasalaga talafeagai mo Filipo, ona o lea na tatala o ia i tua i lalo o tuutuuga e tatau ona usita’i i ai, peita’i na toe fo’i lava o ia ma faaauau lana galuega masani sa faia, o le tulei ma faatau atu lea o fualaau faasaina i isi tagata.

Sa maua le avanoa e toe faatepa ai e le Fa’amasinoga ia itu e lua e tusa ai o mau faamaonia o lenei mataupu. E pei ona taua e le Fa’amasinoga, o le tagi muamua a le malo faasaga ia Filipo na alia’e mai ina ua taofi e Leoleo lana taavale, ae maua ai fualaau faasaina, o se telefoni faapea ai ma se tinoitupe e $714.

E $15,000 le tupe na tatala ai Filipo i tua e faatali ai taualumaga o lana mataupu. Ia Tesema 2018, na toe pu’e faapagota ai fo’i e Leoleo ia Filipo ma molia i le umia faasolitulafono o fualaau fa’asaina, ina ua maua e Leoleo fualaau faasaina i lona tino i le taimi na taofia ai lana ta’avale.

E $3,000 le tupe na faaopoopo e le Fa’amasinoga e toe totogi e le ua molia ona faatoa mafai lea ona tatala o ia i tua.

Na taua e le Fa’amasinoga e fa’apea, e ui sa tatala i tua le ua molia i lalo o poloaiga e usita’i ai ao faagasolo ai lana ulua’i mataupu, sa toe fo’i lava o ia ma toe faaauau lana masani, o le tulei ma faatau atu lea o fualaau faasaina i tagata nuu lautele.

Mo le moliaga e pei ona ta’usala ai Filipo mai le ulua’i tagi a le malo faasaga ia te ia, e 20 masina lea ua faasala ai o ia e le Fa’amasinoga, o se tasi lea o tuutuuga o lana nofovaavaaia e 5 tausaga.

Ae mo le moliaga o le umia faasolitulafono o vaega o fualaau faasaina mai le mataupu lona lua, e 5 tausaga lea ua poloaina o ia e nofosala ai i le Toese. O ia faasalaga e tuli eseese, lona uiga e tuli muamua le 20 masina, ona faatoa tuli ai lea o le 5 tausaga i le Toese.

Ua finagalo fo’i le Fa’amasinoga e faatulaga se aso e fofogaina ai le mataupu e faatatau i le tupe lea na faatulaga e tatala ai Filipo i tua ao faagasolo ai lana ulua’i mataupu. I le talitonuga o le Fa’amasinoga, talu ai e lei usitaia e le ua molia tuutuuga na tatala ai o ia i tua, e tatau la i le malo ona faila se talosaga i le Fa’amasinoga e faaleaoga ai le tupe e $15,000 lea sa faatulaga e tatala ai le ua molia i tua.

Na lagolagoina e Lowe le finagalo o le Fa’amasinoga. Na taua e Lowe e fa’apea, e le o ia na avea ma loia a le malo i le ulua’i taimi na faagasolo mai ai le mataupu a Filipo, o le mafua’aga fo’i lena e le i mafai ai ona ia iloa lea tulaga.