Tala I Vaifanua

TAPUNIA AOGA A LE MALO ASO TOFI & ASO FARAILE

Na mua’i fa’ailoa mai o le a tatala a’oga i le aso ananafi, i aoga a le malo, ina ua tau to’a mai le malolosi o matagi ma timuga i le aso Lulu, ma ua vaaia fo’i le fa’ato’a susulu mai o le la, peita’i, na ese suiga o le va’aiga mamao o le tau, ma toe suia fa’afuase’ia ai le fa’asalalauga na mua’i fa’ato’ai mai, ma ua toe taofia ai aoga mo le isi lua aso o totoe o lenei vaiaso aoga.

E afua mai lava i le Level K 5 se’ia oo i a’oga maualuluga ma le Kolisi Tuufa’atasi o Amerika Samoa.

Ona ua va’aia le laveia o le motu tele i Salafai, ma ua iloga fo’i le ala matagi o loo sau ai e aga’i ina laveia uma lava le Atu Samoa.

O suiga o le tau i le afiafi o le aso Lulu, sa faia ai loa le fa’aiuga e tapunia aoga a le malo.

O nisi o aoga tua, sa tapunia fo’i i le aso ananafi, ae le o iloa i le aso lenei.

Ona o tulaga louloua o le tau i le taeao ananafi, sa fa’atonuina ai foi e kovana Lolo Matalasi Moliga, le toatele o le au faigaluega a le malo e manava mai galuega, ae tatau lava ona i ai se tagata e to’atasi i le ofisa.

E le o mautinoa i le taeao nei tulaga o tagata faigaluega a le malo ae maise ofisa o le malo.

TOFIA MITZIE JESSOP TA’ASE - AVEA MA LOIA SILI LE TUMAU

Ona ua fa’amavae le sa avea ma Loia Sili o le tatou Malo, Talauega Eliasaro Ale, e amatalia le la’ua kemupeni mo le tofiga Lutena Kovana i le tofa Lemanu Peleti Mauga, ua avanoa ai lea fo’i tofiga taua o le tatou Malo, peita’i ua faia le vaega a le Kovana Sili Lolo Moliga, ina ia sailia se isi sui e tau’avea lea tofi mo se vaitau se’ia mae’a ai lenei nofoaiga.

O le tamaita’i loia, Mitzie Jessop Taase, ua filifilia nei e le Kovana mo le tofiga Loia Sili le tumau a le tatou Malo. O lana filifiliga lenei sa ia fa’ailoa ane i le latou fonotaga fa’apitoa ma lana Kapeneta i le EOC i le taeao o le asl Lulu na te’a nei.

Ina ua mae’a lea fonotaga, ae fa’ato’a tu’upepa lea fa’aiuga ma fa’ailoa uma ai lana tofdiga lea i matagaluega eseese o le malo.

“O lenei tamaitai Loia, ua leva ona i ai le agava’a e mafai ai ona tula’i mai e tau’avea lenei tofiga taua mo le tatou Malo. Ua fa’amaonia lea i le umi foi o lana tautua, i lona agava’a ua i ai faaletulafono ae maise i lona gafatia o tiute fa’ata’ita’i mai le tatou Ofisa o Loia a le malo. Ua iloga fo’i lona iloa lelei o tulafono aiaia ai le tatou malo fa’ateritori o Amerika, aua ua masani ai fo’i le tatou atunu’u ma le Malo i le tele o ana fa’aiuga fai ao tautua ai i lea lava Ofisa o le Loia Sili.”

A’o lei faia lenei tofiga a le Kovana Sili, o lo’o tautua Jessop Ta’ase e avea ma Loia a le Senate o le Fono Faitulafono, peita’i, e muamua atu i lena tofiga o i ai nei, sa avea fo’i ma Sui Loia Sili a le tatou Malo, ma sa autu ia te ia le vaega o Loia e faia suesuega tau soligatulafono i totonu o le tatou malo.

Ua iloga fo’i lona tula’i mai e fa’afinauina ma suesuea lelei tulafono tau le fa’asauaina i soo se ituaiga o fanau ma tina i totonu o latou mafutaga fa’aleaiga. Na amata lana tautua i le avea ma loia o le Fono Faitulafono ia Ianuari 2017