Tala I Vaifanua

FA’ALETONU FEAGAI MA LE FALETA’U - TA’U, FITIUTA MA FALEASAO

Ua maua mai ai se lipoti o ata ma atafa’asolo ae maise o tala o se lipoti mai aiga o loo i Fitiuta, Faleasao ma Ta’u i le Manu’atele i fa’aletonu o lo’o feagai ma i latou.

Ua iloga mai ua a’afia le tele o vaega o le alatele ona o sologa ma la’au pa’u’u i ai mai le auvae mauga. O ma’a ma isi otaota uma ae maise fo’i o vaega o le alatele o lo’o masani ona lofia i tafega ua fa’ateteleina lea tulaga ona o le malosi o timuga ua tatafe tetele ai vaitafe ma ua iloga fo’i ona toe taumafai i latou o galueaina alatele i Manu’a e toe fa’aleleia ia vaega o le alatele e aga’i mai i Fitiuta.

O le susuga le ali’i pule o galuega lautele i Manu’a, Viliamu Sega mai Fitiuta, sa ta’ita’ia taumafaiga ina ia fa’aleleia le alatele. O nisi na auai e tuu atu tau’au ma le malosi e fa’atino ai le galuega i luga o le alatele e aga’i mai Fitiuta i Ta’u.

E leai se masini sua eleele ua i ai i lea galuega, ae ua tofu suo i latou ma sapelu ma fa’atino le galuega toe fa’aleleia o alatele i le taeao o le aso Lua ma le Aso Lulu. Ua i ai le aufaigaluega o Leoleo, tagata o Fitiuta ma ua faia le galuega ma le le fa’ava’ava’ai, ae ia lelei le alatele e femalaga’i ai tagata.

O ata ua mafai ona fa’auia mai na pu’eina fo’i i le aso Lua ma le aso Lulu o lenei vaiaso mai Falesao ma Fitiuta. Ua le maua mai ata mai Ta’u.

FA’AMAVAE TALAUEGA MAI TOFIGA LOIA SILI AMERIKA SAMOA

O le fa’aiuga o le iloiloga a le Komiti o Tulafono a le Maota Maualuga i le aso Faraile ua te’a sa fa’alauiloa ai e le tofa Talauega Eleasalo Va’alele Ale, e fa’apea o lona aso mulimuli fo’i lea i le tofi Loia Sili o le malo o Amerika Samoa.

E le’i fa’ailoa e Talauega le mafuaga o lea fa’a’iuga ae ua manino i afioga i senetoa ana fuafuaga e tauta i tofi o le malo i le faiga palota ia Novema 2020. Ma ua ma’ea fo’i ona talia e Kovana Sili Lolo Matalasi Moliga, le tusitusiga fa’amavae a Talauega sa avea ma Loia Sili mo le 6 tausaga o le nofoaiga a lua a le kovana.

“O lea ua i ai le manatu, o le aso lenei, e uma ai la’u galuega fa’aloia sili,” o le saunoaga lea a Talauega i le fa’aiuga o le iloiloga a le komiti, e ta’ita’i komiti ai le afioga i e sui peresitene, Nuanuaolefeagaiga Saoluaga Nua.

“Ae tatau ona ou momoli le agaga fa’afetai i lau afioga ma le mamalu o le Maota. E ui ona e le o atoa mai le Maota, o le fa’afetai a Talauega i le afioga i le Peresitene, lau afioga le sui peresitene ma le mamalu o tupu ma e’e o le atunuu, fa’afetai mo lo outou taliaina o lo’u nei tagata faatauva’a.”

“Fa’afetai mo le fa’amonia o le filifiliga a le afioga i le kovana sili ua ou pale ai i le tofi o le Loia Sili. Fa’alua ona filifilia e le kovana, fa’alua fo’i ona outou taliaina. E le gata i lea, o le tele o aso ou te o’o mai ai i le Maota lenei, sa outou taliaina ‘au ma le agaga fiafia,” o se isi vaega lea o le saunoaga a Talauega.

“Avea ia lenei avanoa e momoli atu ai le fa’afetai a lo’u tagata, i lo outou fa’aeaeaina o au. Momoli atu fo’i malu i puega, peafai o i ai se tautua, ua le tau tamalai’i i la outou silasila. Tau ina ia alofa le Atua, fa’afualoa pea lo outou soifua, aua la tatou tautua i lo tatou atunu’u.”

I ana upu fa’a’iu, “ae o le a fo’i le tama o le Alataua, e se’e ituvao i lona itumalo. O le tama na fa’afailele e le Manu’atele.”

Na tali Nuanuaolefeagaiga ma ia fa’apea, “o le finagalo lava o le Maota lenei, e tumau lava oe i le tofi lea. Ia manuia ou faiva.”