Tala I Vaifanua

TAPUNIA AOGA - ASO LUA & LULU MATAGI MALOLOSI MA LOLOGA

Fa’alauiloa e le Matagaluega o Aoga a le malo le tapunia o aoga uma i le aso ananafi, aso Lua, fa’atasi ai ma lenei aso, aso Lulu ona o le tulaga fa’aletonu o le tau.

Ae sa talosaga pule aoga, ma sui pule aoga ina ia oo atu i laumua o aoga ta’itasi mo le tagai i mea e tatau ona fa’aleleia.

Ua fa’apea foi ona tapunia le tele o aoga tua - aoga a ekalesia i le aso ananafi, se’i vagana ai le aoga a Manumalo Baptist sa tatalaina i le aso ananafi, ae sa fa’ailoa i matua e mafai ona tuu fanau i le fale peafai e fa’aletonu le oo atu i aoga.

E le o mautinoa i le taimi o lenei lomiga tulaga o aoga tua i lenei aso.

Sa tapunia foi ananafi aoga i le Kolisi Tu’ufa’atasi a Amerika Samoa, ae le o iloa tulaga i lenei aso.

I le fonotaga a le malo sa talanoaina ai le tapunia o aoga i le aso Gafua sa saunoa ai kovana Lolo Matalasi Moliga, “E tusa ma lipoti ua mae’a fa’ao’o mai ia te a’u, ua ou va’aia ai, e tatau le faai’uga lenei ona o lo ua i ai falea’oga ma lotoa a aoga ua fa’aleagaina i le tele o lapisi ma’ama’ai ma potu aoga fo’i ua lutia i le vai ona o le tetele o timuga, e ao ina mua’i faaleleia uma potu aoga ma malae o a’oga, a’o le’i amatalia a’oga a le fanau.”

NOFOAGA FA’APITOA MO LATOU AFAINA FALE

I le taimi nei, ua i ai aiga ua leaga o latou fale nofo i le tetele o matagi ua lutia ai le atunuu. I se lipoti a le Matagaluega o Aoga, e tusa i le 18 tagata o lo’o fa’aaogaina le Tafuna Elementary ona ua afaina o latou fale. Sa i ai tagata i le Samoana High School, ae o’o mai i le aso ananafi, ua toe foi aiga.

Fa’ailoa foi i le lipoti, hall a nisi o Ekalesia ua oo atu i ai aoga, e aofia ai le LDS Aunuu; Ekalesia Metotisi i Fagatogo; ma le LDS Church Faleniu. E to’a 98 i latou sa sulufa’i i nei nofoaga.

E le’i maua se lipoti a le malo mai Manu’a.

LIPOTI MAI MATAGI & TIMUGA

I le fonotaga lata mai a le malo, sa fa’ailoa ai e le sui sinia o le Ofisa o Vaai Tau, Elinor Lutu McMoore le lipoti o le tau, i ona tulaga ua i ai nei. “Ua mae’a ona va’aia le tuumamaina mai o le malolosi o matagi e a’afia ai Tutuila, peita’i o le Manu’atele ma Swains o lo’o va’aia e malolosi pea matagi o le a a’afia ai. Peita’i e ui ina matauina ua mama mai nei matagi, ae tolu alamatagi o lo’o ua va’aia o lamatia ai pea lo tatou atumotu i Amerika Samoa, ma e a tauau ina milo fa’atasi ma toe fa’aosofia ai i tatou i nisi matagi malolosi atu i se taimi e le o mamao. Ona o lea e le motusia ai le vaaia toto’a pea o suiga i le tau ma ona taualumaga i le taimi nei.”

“E le o ave’esea la le fa’asalalauga ia nofouta pea le atunuu i Matagi malolosi o loo tatou a’afia ai mo le isi lua aso o lumana’i nei.”

Talu mai le aso ananafi ua toe tatalaina le Malae Va’alele i Tafuna, ae o malae vaalele i Ofu ma Fitiuta o lo’o tapunia pea. O lo’o tapunia foi uafu i Manu’a.

O le aso Gafua sa toe tatalaina ai le uafu i Fagatogo ma taula mai le va’a lau oloa Polynesia lea e o loo malaga mai ma le uta o oloa o lo’o sili fo’i ona mana’omia e le mamalu lautele o le atunuu.

I le taimi nei, ua fa’ailoa mai o lo’o i ai se gasegase tigaina i le motu o Ta’u o lo’o mana’omia ona fa’avave oo mai i le falema’i i Faga’alu, ma sa taofia lea taumafaiga mo se malaga saogalemu a le Samoa Airways mo Fitiuta se’ia tau mama mai matagi malolosi i le tatou teritori.

Ua mana’omia fo’i ona malaga se aumalaga asiasi mo le Manu’atele ma o le a faaaogaina lea malaga a le vaalele mo Ta’u ma avatu ai nisi o uta ua leva ona faavasega e la’u i Manu’a e faaaoga ai le alu atu o le malaga lea, ma aumaia ai lea gasegase i le falema’i tele i Faga’alu.

Ona o le anoanoa’i o mea e ao ina fa’ao’o i le Manu’atele, ua fa’atulaga ai nei ni malaga se lua a le “MV Fotu o Samoa” mo Manu’a i lenei vaiaso. O le aso Tofi e taunu’u ai le Fotu o Samoa.

Ua mae’a fa’atulaga fo’i le tatou falema’i Tafuna Health Centers mo togafitiga o so’o se ituaiga mo nisi e ono manunu’a mai ona o nei matagi malolosi ma lologa mai timuga tetele ua lofia ai i tatou i lenei vaitau o le tausaga. Ua fa’ailoa mai na motusia fo’i le eletise i le itu atumauga o Pago Pago ma Fagasa ma  Fogagogo, sa galulue fa’ata’alise fo’i le ASPA ina ia fa’aleleia laina na fa’aleagaina ma ua toe maua le malosi’aga fa’aeletise e lea vaega o le atunuu i le aso lava lea.

Ua fa’atonuina fo’i e Kovana Lolo le tamaita’i fa’atonu o galuega lautele, Faleosina Faiai Voigt, ina ia fa’aoo le faasoaina o galuega toe faaleleia i pisinisi tumaoti ua agava’a i nei faiva, ina ia le umi o motusia eletise ma le toe faaleleia feoa’iga a le atunuu ma le saogalemu i o tatou alatele.

Na aofia i lea fonotaga le to’a 7 na malaga mai a le FEMA i lea fonotaga, latou te matauina le faagasologa o galuega toe fa’aleleia ma tima’i ae maise o le tatalia fo’i e le tatou atunuu o se afa e ono lamatia ai lo tatou saogalemu i lenei vaitau

TOFIA FILIFA’ATALI MIKE FUIAVA VAAIA POLOKETI I MANU’A

O le susuga Filifa’atali Mike Fuiava, le sa avea ma fa’atonu o le Matagaluega o Fa’ato’aga ua tofia e le afioga Kovana Lolo Moliga e vaaia poloketi a le malo i Manu’a.

“Ina ia fa’afaigofie ona aluga lelei galuega e tau atina’e ma fa’aleleia atili ai le soifuaga o e o lo’o alaala i le Manuatele, ae maise o i latou e asiasi atu ma toe taliu mai, ua tofia ai se tasi o ta’ita’i lelei, ina ia mafai ona fa’avave tino ma fausia nei galuega uma.”

O se tasi le o fa’aupuga na mafai ona fa’ailoa i se tusi na taua’aoina ane e le ali’i pule o le aufaigaluega a le Ofisa o le Kovana, le tofa Fiu Johnny Saelua.

Na tu’ua e Filifa’atali Mike Fuiava lona tofiga fa’atonu o Fa’ato’aga ia Ianuari 2020, ina ua lavevea nisi o lana aufaigaluega a’o fa’afoea le ta’avale ma le fa’asua’ava, ma na maliu ai fo’i se tasi o lana aufaigaluega i lena lava fa’alavelave.