16 tagata Misela i Amerika Samoa: 3 togafitia i Leone

I fa’amaumauga a le Matagaluega a le Soifua Maloloina (DoH) ma le LBJ Medical Center ua fa’ailoa ai ua atoa le 16 o i latou ua fa’amaonia ua maua i le misela i Amerika Samoa, ona o le tina lea sa alia’i mai ai auga o le misela, na o’o ane i le falema’i ma avea i Hawaii ana suesuega, ua fo’i mai ua fa’amaonia ua maua o ia i le misela. O lea tina e 24 tausaga le matua mai Faleniu.

O ia o sa fanau i Amerika Samoa, e na o le tasi lona tui puipuia sa faia, ma e le’i malaga ese mai Amerika Samoa.

I fa’amaumauga a le DoH sa fa’ailoa i le fonotaga a le kapineta i le aso Sa ua te’a, atoa le 95% o le atunuu ua mae’a faia tui Misela, peita’i e i ai le vaega o le fanauiti e le’i faia o latou tui puipui muamua, ma o lea aotelega e 37 i latou, ae o le isi 179 o le fanauiti o lo’o tatalia le taimi e mafai ai ona toe faia latoi tui lona lua mo le misela.

Mo le puipuiga mai le Coronavirus, sa fa’ailoa i le fonotaga a le kapineta e to’atolu i latou o tofia i le fale o suesuega le falema’i lea i Leone. O le isi to’alua, sa malaga i Taiwan ma Saina, ae o le isi e to’atolu ai, sa malaga i Niu Sila.

Mo i la’ua sa malaga i Taiwan ma Saina sa toe foi mai i le fa’aiuga o le masina o Ianuari ma e 14 aso o lo’o va’avaia ai i Leone o le o le sa malaga i Niu Sila e 7 aso o lo’o nofo va’avaia ai.

Fa’ailoa e kovana, Lolo Matalasi Moliga i le fonotaga a le kapineta, “Ua iu le filifiliga o le a fausia se isi nofoaga e fa’amautu i ai nisi e taofia mo suesuega fa’apitoa o nei faama’i pipisi. O lo ua galulue nei inisinia faufale ma tusiata fale a le Public Works mo le ata o lea fale, ma e 10 potu o le a fa’amautu i ai e taofia fa’apea.”

Ua talosaga Lolo i sui o le malo ia tatau ona ma’ea atu le fa vaiaso ua fa’atulaga lea nofoaga fou i Tafuna.

O le fa’amamafaina mo i latou e malaga i fafo atu o le Iunaite Setete, e ao ina toe taliu mai e uia mai Hawaii, ua tatau ona umia mai se fa’amaoniga sa e va’aia le falemai poo fomai ma faia sou tui ma ua mae’a le 14 aso talu ona faia lou tui lea. A leai e matua le mafai lava ona e alu i lou aiga, e te nofoia le falema’i i Leone mo le 14 aso.