Molia ni ali’i se to’alua i le umia faasolitulafono fualaau fa’asaina

E to’alua ni ali’i na pu’e faapagota e Leoleo ma ua molia i le umia faasolitulafono o vaega o fualaau fa’asaina, a o pisi ai Leoleo e tau saili le alii na ia ulufale faamalosi i totonu o le fale o se aiga i Vaitogi ma faamalosi se tama’ita’i e 16 tausaga le matua.

O i laua ua molia e aofia ai Filipo Farani ma Kueva Lilo, lea na tutula’i i luma o le Fa’amasinoga Faaitumalo i le vaiaso na te’a nei.

Ua molia Farani ma Lilo i moliaga ta’itasi o le umia faasolitulafono o vaega o le pauta faasaina o le aisa, faapea ai ma moliaga ta’itasi o le umia faasolitulafono o vaega o le laau fa’asaina o le mariuana; o vaega uma ia o solitulafono mamafa, lea e mafai ona faasala ai se tasi i le toese mai le 5 e oo atu i le 10 tausaga, pe faasala i le salatupe e mafai ona oo atui le $20,000, poo le fa’asala fo’i i fa’asalaga uma ia e lua.

E $10,000 le vaega tupe lea ua fa’atulaga e le Faamasinoga e tatala ai i tua Farani, ae o Lilo o loo taofia pea i le toese i Tafuna e aunoa ma se tupe ua fa’atulaga e tatala ai i tua, ona o tulaga faaletonu i ona pepa nofomau.

Afai ae mafai ona tatala Farani i tua, ua poloaina o ia e le Fa’amasinoga ina ia usita’i i tulafono uma a le malo, e le mafai fo’i ona ia taumafai e faafesootai le alii lea o lo o tau sailia e Leoleo i lona fai aiga faamalosi i se tamaitai e 16 tausaga le matua, le susuga a Toloa Wilson, poo “Willie” fo’i e pei ona iloa ai e le to’atele.

TAGI A LE MALO

E pei ona taua e le malo i le latou tagi e fa’apea, o le taeao o le aso 22 o Ianuari 2020 na logoina ai e se Tina le Ofisa o Leoleo i Tafuna mo se fesoasoani, ona o lona niece e 16 tausaga le matua na ulufale faamalosi se alii i totonu o le latou fale ma fai i ai uiga mataga i se auala faamalosi.

Na taua e le Tina i Leoleo, o le ali’i sa ia faia nei uiga mataga i lona niece, o Toloa Wilson, lea fo’i e i iloa e le to’atele ia Willie. O Willie e pei ona taua e le Tina i Leoleo, e masani ona galue i le latou faatoaga mo le totoina o soo se fualaau ‘aina e aofia ai talo ma fa’i. 

Na faamatala e le Tina i Leoleo e fa’apea, o le po o le aso 21 o Ianauri pe tusa o le te’a o le 9:20, na alu ai i le Faleoloa mo se faatau mo le aiga, ae faamuli atu ai na o lona niece na aafia ma lana fanau laiti i le fale.

O le taimi lava fo’i lea ina ua alu ese ma le fale na ulufale faamalosi ai Willie i totonu o le fale ma ia faia uiga mataga i lona niece sa moe i luga o le nofoa o loo i totonu o le potu malolo.

O le mae’a ai ona tuu faatasia e Leoleo o faamatalaga uma e uiga i lenei mataupu, na latou aga’i atu ai loa i le nofoaga na taua o lo o nofo ai Willie mo le pu’e faapagotaina mai o ia. Na taunuu Leoleo ma maua atu ai ni ali’i se to’alua i le fale, ae lei maua atu i ai Willie. O alii e to’alua na maua atu e Leoleo i le fale, o i laua ia ua molia i lenei mataupu.

Na taunu’u Leoleo na vaaia ai Farani ma Lilo o loo saofafa’i i luga o se nofoa laupapa umi i fafo o le fale. O tafatafa o le vaega o loo nonofo ai Farani ma Lilo o lo o paepae solo ai pepa iila o lo o fa’aaoga e tagata e tulei ma faatau atu ai le pauta faasaina o le aisa.

Ina ua fesiligia e Leoleo ia Farani ma Lilo poo fea o i ai Willie, na tali Farani, o Willie faatoa alu ese atu lava ma le fale, e alu e fai lana fa’atau i Tafuna.

A o talanoa Leoleo ma i laua ua molia, na vaaia e Leoleo foliga popole o i laua nei, atoa ai ma le taumafai lea e aapa i taga o la ofu o loo fai, e foliga mai o lo o i ai se mea o lo o taumafai e aveese mai i fafo.

Na fesili Leoleo ia Farani ma Lilo poo i ai ni fualaau faasaina poo ni a’upega mata’utia ia tei laua, ae na tali Farani ma Lilo, e leai ni fualaau fa’asaina poo ni aupega mata’utia o loo ia te i laua.

A o faia talanoaga a Leoleo ma i laua ua molia, na vaaia e Leoleo se agaese o loo taatia i tafatafa o Farani. A uma ona uu e Farani le agaese, ona tago lea ua tu’u atu ia Lilo, ona uu lea e Lilo le agaese, ma faapena ai lava ona faia e i laua ua molia lea amioaga o le uu o le agaese e faafoliga mai ai ni uiga o loo la fuafua e fa’atino.

Na malilie i laua ua molia e saili e Leoleo i laua mo ni fualaau fa’asaina poo ni aupega malolosi. Na saili e Leoleo le tino o Farani ma latou maua ai pepa iila se 2 o lo o i ai vaega o le pauta faasaina o le aisa.

Na toe saili e Leoleo le isi taga o le ofu a Farani sa fai ma maua ai paipa tioata e 2 o lo o i ai vaega o le pauta faasaina o le aisa. Sa maua ai fo’i ma se pepa iila o lo o i ai sikaleti mariuana e 2 ua uma ona taai.

Na saili e Leoleo le ali’i o Lilo ma maua ai pepa iila e 3 o lo o i ai vaega o le pauta faasaina o le aisa, faapea ai ma le isi taga pepa o lo o tumu i lau mamago o le mariuana. Sa maua ai fo’i ma le tinoitupe e $780 i le taga o le ofu a Lilo sa fai, atoa ia ma le anoanoa’i o pepa iila e le o i ai ni mea i totonu sa maua i le isi taga o lona ofu.

O le mae’a ai ona saili e Leoleo o tino o i laua nei e to’alua, na taofia faapagota ai loa i laua ma auina atu i le Ofisa o Leoleo i Tafuna ma isi suesuega fa’aauau.

Ina ua fesiligia e Leoleo Farani e tusa ai o fualaau fa’asaina sa maua ia te ia, na ia taua ai e fa’apea, o fualaau fa’asaina ia sa tuuina atu e Willie ia te ia ma le faatonuga e tulei ma faatau atu i isi tagata.

Na faamatala e Farani e fa’apea, ua tusa ma le tausaga talu ona ia galue e tulei ma faatau atu fualaau fa’asaina a Willie, ae maua mai ai ana tupe e faatau ai soo se mea e mana’o i ai. O nisi o taimi na te maua ai le $500 e oo atu i le $600 i vaiaso ta’itasi mai le fa’atauina atu o fualaau fa’asaina.

Na taua e Lilo i Leoleo ina ua fesiligia o ia, talu mai lava le taimi na faatoa taunuu mai ai i Samoa i le faaiuga o le tauasga e 2018, na alu ai loa ma nofo i le fale o Willie ona o lona naunau e avea o ia ma tagata e galue mo le faatauina atu o fualaau fa’asaina i tagata lautele.

Na ia taua fo’i i Leoleo e fa’apea, na ia iloa lava e le o i ai sona ID nofomau ae sa ia manatu lava e nofo i le fale o Willie ina ia maua ai se tupe e fesoasoani ai mo ia ma lona aiga.