Tala I Vaifanua

19 FANAU HIGH SCHOOL SAINIA TUSI ULUFALE IUNIVESITE TA’A’ALO FOOTBALL

Ole taeao ananafi sa fa’atasi matua ma fanau ua fa’amanuiaina talosaga e ta’a’alo Football e totogia ai latou a’oa’oga i Iunivesite ua talia mai ai i latou.

Sa tula’i le susuga Pone Ta’ase, o le sui fa’atonu o le JPS i Amerika Samoa, ma ia fa’alauiloa fanau ua fa’amanuiaina.

O i latou mai le Samoana e to’aono, e aofia ai Mazaichi Aviu i le tulaga Defensive Line, i le Missouri Southern State University, lea ua talia mai ai e le alo o Amerika Samoa, Coach Keki Misipeka o le Samoana High School fo’i, lea e to’a 8 i latou ua talia mai i lana lea Iunivesite.

Talia e le Iunivesite o Avory, o Seumanutafa WR. O Daniel McMoore LB; Jeff Fa’alogo DB; Talalelei Fautanu; Avaolagi Paselio. O le isi Samoana High ua fa’amanuiaina o Kobe Lefiti e malaga o ia i le Iunivesite New Mexico Military Institute.

Mai Fagaitua High e to’afitu i latou: Tau Grey OL, i le Missouri Valley University; Fitu Amata WR, Pelive Eki Isalei OL i le Iunivesite i Missouri Valley. O  Manuita Sofeni LB  ma Mikaele Tavai DL i le New Mexico Military Institute College ma Maurice Ta’ala OL i le UH Manoa i Honolulu, ma sa ia mua’i sainia lana tusi lea ia Tesema.

Mai Tafuna High e to’alua - Koison Ozu RB i le Missouri Southern State University, ma Herman Sufia TE, i le New Mexico Military Institute College.

Mai Leone High e to’alua fo’i - Lafileata Salavea OL, i le Missouri Southern StateUniveristy  ma Fa’ali’i Fa’amoe DE i le Washington State University.

Mai le a’oga maualuga a Matata Eseese Nuuuli Voctech, ua tula’i mai ai fo’i sui e to’alua - Joaquin Tapusoa DT i le Missouri Southern State University ma Ionatana Palepua WR i le Missouri Valley University.

O le to’a 19 la lenei ua mae’a sainia atu iinei a latou pepa ulufale nei ma taa’alo football ai i Iunivesite ma Kolisi ua latou filifilia. Peita’i o lo’o i ai isi sui, o alo lava o Amerika Samoa sa mua’i fa’au’u atu ma ta’a’alo Football i Amerika Samoa, peita’i, ua mae’a ulufale atu i kolisi mo le lua tausaga i fafo, ae o lea lava e fa’aulu atu iinei a latou Iunivesite.

E to’alima i latou nei e aofia ai Eteva Mauga RB mai Samoan High, e ulufale i le JC Nebraska. O Paul Fuimaono mai Leone High i le Missouri Southern State University. O Antonio Pule mai Samoana High i le WASU, Malakai Peko RB,  mai Fagaitua High, ua filifili e ulufale i le Ottawa University, ma  Tony Aiono OL, mai Fagaitua High ua filifili o ia e ulufale i Ottawa University.

Saunoa le fa’atonusili o Aoga, Dr Ruth Matagi-Tofiga i upu fa’amalosi i fanau a’oga o le a amatalia o latou tausaga a’oga fou i suiga ua latou sainia nei.

“Ia outou o muamua e fa’afetaia o outou matua ma outou aiga, ae maise o outou matua faaleagaga, aua e tusa lava poo le a lo outou faigata ma le le fa’alogo, e le fo’i ai le tausiga, o talosaga ma le taumafaiga a matua ia outou oo mai i se taumafaiga ua ea fa’apenei. O le to’atele o tatou matua, latou te le’i maua ni avanoa e fa’apei ona outou maua i le taimi lenei i le vaitau na o’o mai ai a’oa’oga a i latou i o latou tausaga fa’aiuaso. Ia outou toe tepa mai i le tapuaiga mau lea a nai outou matua ma aiga, pe a o’o ina outou o atu ma taumafai i a’oa’oga, ae maise o le taumafaiga i fa’agatama e fa’aaoga e totogia ai a outou a’oga. Ia lagona e outou le alolofa mai i o outou matua ma aiga, pe a oo ina lutaluta le tai o aoaoga, taumafai atili ma tatalo i le fesoasoani a le Atua ia te outou.”

Na ia faliu fo’i ma tima’i le fanau a’oga ua fa’aeaina i nei avanoa, “Ia aua ne’i galo ia te outou ona fa’afetai i le vasega o faia’oga, ae tou te lei o ese atu ma le atunu’u.”