Fa'aauau ia Fepuari 28 polo’aiga fa'alautele Kovana

O le aso Lulu sa fa’alauiloa ai e Kovana Lolo Matalasi Moliga, le fa’auauina e o’o atu ia Fepuari 28, lana polo’aiga fa’alauaitele ona o le pepesi o le Misela i Amerika Samoa. Ma ua fa’aoopo ai i lea suiga ia le fa’ama’i pepesi o le “coronavirus” lea ua maliliu ai le toatele i Saina, ae fa’amonia le pepesi i nisi o malo o le lalolagi e aofia ai Ausetalia ma Amerika.

Fa’ailoa e le kovana e 15 i latou ua fa’amonia i Amerika Samoa i le Misela talu mai le aso 24 o Ianuari, 2020. Ma lo’o fa’aauau pea tuiga a le MMR e puipuia mai ai i le Misela.

Ua le gata i lea, ua fa’ailoa foi e le kovana le fa’ama’i o le Coronavirus, lea ua pepesi atu, mai Saina, i atunu’u e 18.

Talu ai o lenei fa’amai fou, ua faia ai suiga a le malo o Amerika Samoa mo i latou e ulufale mai i le teritori.

Ua taofia i le taimi nei ona toe pasia OK Boards ae maise mai atunu’u ua fa’amauina ua maua ai gasegase i le Coronavirus. Ua fa’aauau la ona talosagaina pea OK boards mo fanau po’o tagatanu’u o Amerika Samoa e fia malaga mai Amerika. Ae ua tatau la ona fa’aalia atunuu sa malaga i ai i latou i le isi 30 aso ua tuana’i.

So’o se tasi e le o se tagata nuu o Amerika Samoa e ao ina talosagaina pemita e ulufale mai ai. O mei nei o le a fa’amalosia nei loa:

• Tagata o so’o se atunuu e ese mai tagata Samoa Tuto’atasi e ao ina malaga mai i Amerika Samoa ae uia mai e i latou Hawaii e ulufale mai ai. Peita’i e ao fo’i ina nonofo mo le 14 aso i Honolulu ona fa’ato’a malaga mai ai lea.

• O tagatanuu mai atunu’u  ua pesia i le Coronavirus e ao ina mua’i alaala mo le 14 aso i se atunuu e le’i a’afia i le Coronavirus fa’ato’a ulufale mai ai lea. O ae ina iloa e i  latou e fia malaga mai i Amerika Samoa, e tatau ona mua’i talosaga pemita e ulufale mai ai, ae ia iloa e le mautinoa pe fa’atagaina.

• Talosaga mo pemita e 30-aso e fa’atali ai ma e tatau ona fa’amalosia le taimi atoa e 14 aso talu ona talosaga lou pemita fa’ato’a maua se tali

• o kilia e tatau ona tu’ufa’atasi ma le talosaga o le pemita e aofia ai le Kilia mai le Tui Misela ua mae’a ona faia, kilia mai e le DOH, kilia mai le Minisita o le Soifua Maloloina (MOH) a Samoa pe afai o le tagata malaga e mai Samoa; kilia mai le falema’i o le LBJ Medical Center, kilia mai le falefa’amasinoga; Kilia mai le Homeland Security mo tagatanu’u o Samoa.

• Ua tatau fo’i ona ulufale mai le tagata malaga ma fa’amaoniga uma mai atunuu sa latou uia mai e o’o mai ai i Amerika Samoa, ma ua atoa foi le 30 aso talu ona i ai i latou i na malo. O le fa’amaoniga o lea tulaga e ao ai ina mautu le lolomia o aso ulufale ma tu’ua ai nei malo e i latou i totonu o latou tusi folau.

• Mo Tagata Samoa mai Samoa Tuto’atasi, e ao lava ina mautu le 14 aso talu ona faia lau suesuega toto’a e le MOH a Samoa, a’o le’i toe malaga mai.

• Mo fanauiti ei lalo ifo o le 18 tausaga le matutua, ia i ai pepa tui e pei ona fa’atulagaina e le Centers for Disease Control and Prevention.

• pone e $500 mo so’o se tasi e ulufale mai ile teritori e galuega i luga o va’afagota i Amerika Samoa.

Mo i latou fo’i o Amerika Samoa e fia asiasi atu i Samoa toe taliu mai ai, e ao ina mua’i faia lana siakiga e le tatou Matagaluega o le Soifua Maloloina mo le 3 aso a’o le’i malaga atu i Samoa. Ua na’o le DOH e mafai ona faia siakiga ma fa’amonia. Ma e faia i le Tafuna Health Center.