Molia se ali’i ma se tama’ita’i i le umia o faasolitulafono fualaau fa’asaina

Ua molia nei e le malo se ali’i ma se tama’ita’i i le umia faasolitulafono o fualaau fa’asaina, ina ua taofi e Leoleo le ta’avale na la malaga ai i le solitulafono i luga o le alatele, ae maua i ai fualaau fa’asaina ma se a’upega malosi.

O le vaiaso na te’a nei na tutula’i ai le ali’i Eddieboy Va’avale ma le tama’ita’i o Rosemarie Siale i luma o le Faamasinoga Faaitumalo mo le la ulua’i iloiloga.

Ua molia Vaavale i moliaga e 2, e aofia ai le moliaga e tasi o le umia faasolitulafono o vaega o le pauta faasaina o le aisa; faapea ai ma le moliaga e tasi o le umia faasolitulafono o vaega o le pauta o le aisa ma le fa’amoemoe e tulei ma faatau atu i isi tagata, o vaega ia o solitulafono mamafa; atoa ai ma moliaga mama e 2, le moliaga o le umia faasolitulafono o se a’upega malosi; faapea ai ma le moliaga o le umia faasolitulafono o upufana.

O Siale o lo o tu’uaia i le moliaga mamafa e tasi, o le umia faasolitulafono lea o vaega o le pauta faasaina o le aisa.

E $20,000 le vaega tupe lea ua fa’atulaga e tatala ai i tua Va’avale, ae $5,00 mo Siale.

O le vaiaso lava fo’i na te’a nei na tofu atu ai mataupu a i laua nei i luma o le Fa’amasinoga Maualuga, i le mae’a ai lea ona fa’aagafua o la aia tatau e fa’ataunuu ai ulua’i iloiloiga e saili ai mau a le malo e lagolago ai tagi fa’asaga ia te i laua.

Na teena e Vaavale ma Siale tu’uaiga faasaga ia te i laua ina ua la tutulai i luma o le afioga i le ali’i Fa’amasino Sili lagolago ia Fiti Sunia. O le masina o Mati lea ua fa’atulaga e toe valaau ai le la mataupu i luma o le Fa’amasinoga.

TAGI A LE MALO

E pei ona taua e le malo i le latou tagi e fa’apea, i le aoauli o le aso 8 o Ianauri 2020, ao tiute ni ali’i Leoleo i luga o le alatele i Futiga, sa molimauina ai e Leoleo le alu saoasaoa o se pikiapu lanu uliuli. Sa molimauina fo’i e Leoleo, e le o faia le fusipa’u o le ave ta’avale.

O le taimi lea na faaola ai loa e Leoleo le sailini o le latou ta’avale ma tuliloa ai loa le ta’avale e pei ona taua, ma maua atu ai i luma o se Faleoloa i Puapua, ma faatonuina ai loa le ave ta’avale e taofi le ta’avale. Na usita’i le ave ta’avale ma afe ai loa i tua le ta’avale i luma tonu lava o le Faleoloa i Puapua.

A o savavali atu Leoleo e talanoa i le ave ta’avale e faailoa i ai le mafua’aga ua taofi ai lana ta’avale, na vaaia e Leoleo le oso mai i fafo o le ave ta’avale ao uu i lona lima se ato uliuli.

Na faatonu e Leoleo le ave ta’avale e toe oso i totonu o le ta’avale, peita’i sa taumafai le ave ta’avale e finau ma fesili i le mafua’aga ua taofia ai lana ta’avale, ae sa faaauau fo’i ona fa’atonu e Leoleo o ia e oso i totonu o le ta’avale. Na usita’i le ave ta’avale ma oso loa i totonu o le ta’avale.

E to’alua i laua sa i totonu o le ta’avale, o le susuga a Va’avale, o ia lea sa faafoeina le ta’avale, ma le tama’ita’i o Siale, lea sa nofo i le nofoa o le pasese.

Ina ua fesiligia Vaavale i lona laisene ave ta’avale, sa tali le ua molia, ua leva ona leiloa lona laisene. Na siaki e Leoleo faamaumauga a le Ofisa o Taavale Afi ma faamaonia ai, ua silia i le 3 tausaga talu ona mae’a le aoga o le laisene ave ta’avale a Va’avale, e le i toe alu fo’i e fa’afou.

Na siaki fo’i e Leoleo le laisene o le taavale ma iloa ai, e ese le taavale e ana le laisene lea o lo o fa’apipi’i e le ua molia i lana ta’avale.

Talu ai mafua’aga e pei ona taua, na faia ai loa le fa’aiuga a Leoleo e taofia le ta’avale, atoa ai ma le auina atu o Va’avale ma Siale i le Ofisa o Leoleo i Tafuna mo isi suesuega atili.

A o lei auina atu le ta’avale ma i laua ua molia i le Ofisa mo isi suesuega, na faatonu e Leoleo i laua ua molia ina ia tulioso i fafo ma le ta’avale ae se’i saili o la tino poo i ai ni aupega malolosi mo le puipuia o le saogalemu o Leoleo.

Ina ua su’e e Leoleo le tino o Vaavale, na maua ai i le taga o lona ofuvae sa faia se fana o le ituaiga o le .38. Sa toe saili le isi taga ma maua ai pulu fana e fa’aaoga ituaiga o le .38.

Na faasolo atu le sailiga a Leoleo i totonu o le ta’avale, ma maua atu ai le ato lanu uliuli lea sa uu e Va’avale i lona lima. I totonu o le ato, na maua ai e Leoleo straw e 17 ua uma ona ta tipi tulimanu, ua uma fo’i ona utu i ai vaega o le pauta pa’epa’e. Sa maua ai fo’i e Leoleo straw e 47 e le o i ai ni pauta papa’e i totonu. O le isi itu o le ato, sa maua i ai pepa iila e 52 ua uma ona utu i ai vaega o le pauta pa’epa’e.

O le va o le nofoa o le ave ta’avale ma le nofoa o le pasese, na maua i ai e Leoleo se paipa tioata o lo o i ai vaega o le pauta pa’epa’e.

Ina ua saili e Leoleo le tino o le tama’ita’i o Siale, sa maua i ai se paipa tioata o lo o i ai vaega o le pauta pa’epa’e.

Na faia e Leoleo se suega faapitoa i pauta papa’e na maua i le ta’avale ma tino o i laua ua molia nei, ma faamaonia ai, o vaega ia o le pauta faasaina o le aisa.

Ina ua fesiligia e Leoleo ia Siale i le paipa tioata sa maua ia te ia, na ia faamaonia ai, o lana meatotino lea na avatu sana uo tama ia te ia.

Ina ua fesiligia e Leoleo ia Va’avale e tusa ai o fualaau fa’asaina, o le fana ma pulufana sa maua ia te ia, sa ia ta’utino ai, o meatotino uma ia e patino ia te ia. Na ta’utino atili Vaavale e fa’apea, o fualaau faasaina, o le fana ma pulufana na maua ia te ia, o mea ia sa ia fa’atauina mai i se ali’i mai Vaitogi ma le fa’amoemoe e tulei ma fa’atau atu fualaau fa’asaina ina ia maua ai sana tupe.

Na taua atili e Va’avale i lana fa’amatala tusitusia sa tuuina atu i Leoleo, ua silia nei i le tausaga le umi talu ona ia faia lenei galuega o le tulei ma faatau ese atu o fualaau fa’asaina i tagata lautele. O le faanaunauga i lona loto, ia avea lea tama’i pisinisi o se auala e maua ai se tupe mo ia.

FAAMAUMAUGA FA’AMASINOGA

E tusa ai ma faamaumauga a le Fa’amasinoga, e le o se taimi muamua lenei ua aafia ai i laua nei i le tulafono.

O Siale, o le isi lea na molia e le malo ma ta’usala e le Fa’amasinoga i le mataupu lea na alia’e mai i le lotoifale o le Ofisa o Ta’avale Afi i le tele o tausaga ua mavae, i le faia faagaoi lea o laisene ave ta’avale pepelo ae tuuina atu i ni isi o tagata nuu, ae totogi tupe i ni isi sa galulue i le Ofisa o Ta’avale Afi.

Na ta’usala e le Fa’amasinoga ia Siale i le moliaga o le taupulepule lea e faia le solitulafono o le faia lea o faamaumauga sese, ma faanofovaavaaia ai o ia mo le 5 tausaga i lalo o tuutuuga, na te tuliina masina e 20 i le Toese i Tafuna.

O le susuga a Va’avale, o le isi lea e to’atolu i ai ali’i na molia e le malo i le umia faasolitulafono o fualaau fa’asaina, ina ua osofa’i e Leoleo le nofoaga a le aiga o Siaumau i Petesa i le masina o Iulai 2019, ma tu’uaia le maua ai o fualaau fa’asaina.

Peita’i o le masina o Oketopa 2019, na solofua ai e le Faamasinoga le tagi a le malo faasaga ia Va’avale, ina ua manatu le malo, e le mafai ona latou faamaonia le tagi fa’asaga ia Va’avale.