Tala I Vaifanua

MAUA TOTOGI O FA’ATONU - AUAI I SAILIGA TUPE MO LE MISELA

Ua mae’a sainia e Kovana Lolo Moliga totogi o fa’atonu uma lava sa auai ma fa’aalu o latou taimi i taumafaiga e saili tupe mo Samoa i le taimi na taumafai ai le tatou Malo e saili le latou meaalofa tupe.

Peita’i, i le tele o taimi e galulue ai sui o le Kapeneta i so’o se galuega a le Malo, e le totogia.

O le tusi na fa’asalalau mai e le Fa’atonu o Tagata Faigaluega a le Malo na fa’ailoa manino mai ai e  fa’atonu Eseneiaso Liu ua mae’a ona sainia e le kovana itula na auai ai fa’atonu ia i nei taumafaiga uma.

Peita’i, e le gata ai i fa’atonu, ae ua aofia ai ma CEO ma isi fo’i fa’auluuluga o Ofisa Eseese sa aofia i lea fa’amoemoe, ma ua aofia ai fo’i ma tagata uma ma isi sa auai uma i lea aumafaiga.

Ua tima’ia mai e Liu le vasega o fa’atonu ma ta’ita’i o Ofisa eseese o le Malo sa auai i lea fa’amoemoe ina ia toe taga’i i itula na fa’amauina, pe o talafeagai ma latou fo’i fa’amaumauga, a’o le’i toe fa’afo’ia atu nei itula ua mae’a toe siaki lelei mo faatonu, CEO, fa’auluuluga o isi Ofisa o le Malo ma nisi uma sa auai latou suafa i lea lisi na fa’asalalauina i le tusi fa’alaua’itele a Liu.

I le fonotaga fa’apitoa fo’i a le Kovana Sili ma lana kapeneta na faia ia Tesema 12, na fa’ailoa atu ai e Kovana Lolo, o sui uma lava o lo’o maua le taimi e auai atu ai i ana fonotaga e faia i aso Sa ta’itasi, ia fa’amauina aua e tatau ona totogia.

TAUAU MAUA INISIUA F.D.I.C A LE FALETUPE O AMERIKA SAMOA

Pe afai o le a auaufa’atasi nisi faletupe i totonu o Amerika e talosagaina ai le fa’a-Inisiua e le FDIC a latou faletupe, o le a mafai ai fo’i ona talia e le FDIC le talosaga a le Faletupe o Amerika Samoa (Territorial Bank of American Samoa - TBAS) ona o lo’o fa’atautaia le tatou faletupe e le tatou Malo.

Ua fa’ailoa mai e le ali’i Komesina o Ofisa Tautupe a le tatou Malo, Robert Ho Chee, “Ona o le faletupe TBAS o lo’o fa’atautaia e le tatou Malo, e le mafai ai ona inisiua e le FDIC le tatou faletupe.” O sana fa’amatalaga aloa’ia lea na ia saunoa i ai i le tauaofiaga  a le fono faitulafono na vala’auina ai Robert Ho Chee e fa’apupula i le mamalu o ta’ita’i o le Malo pe mafai ona inisiua e le FDIC le tatou faletupe.

Peita’i i lea lava fonotaga sa toe fa’aalia mai ai fo’i e Ho Chee i nei ta’ita’i uma lava o le atunuu, “Peita’i, e i ai se ala e mafai ai ona maluelue mai lea tulaga, pe afai o le a tele isi faletupe i totonu o le Iunaite Setete e talosaga fa’atasi mo lea inisiua a le FDIC, ituaiga faletupe lava nei e fa’atutaia e latou faigamalo.” Na mafai foi ona taua’aoina e le taitaifono a le TBAS, Olivia Reid se lipoti tapena lelei mai le faletupe.