Faasala mo le 5 tausaga se ali’i lona le usita’i i poloaiga Fa’amasinoga

O le vaiaso nei na tuuina mai ai le poloaiga a le Fa’amasinoga Maualuga, e fa’atonu ai le ali’i o Sosaia Faavae ina ia tuli le umi e 5 tausaga i le falepuipui i Tafuna, ina ua fa’amaonia lona le usitaia o poloaiga a le Fa’amasinoga.

O le vaiaso nei na tula’i ai Faavae luma o le Fa’amasinoga mo le tuuina atu o le fa’aiuga a le fa’amasinoga, e tusa ai o lona le usitaia o tuutuuga o lana nofovaavaaia.

Ina ua maua lona avanoa, sa faatoese ai loa Faavae e tusa ai o lana solitulafono, ma ia talosagaina se isi avanoa mo ia se’i toe fo’i atu ai i tua e tautua ona matua ma fai sona aoga i lona aiga, nu’u ma le Ekalesia.

Sa ia ta’utino fo’i e fa’apea, afai ae maua se isi avanoa mo ia, o le a saili loa sana galuega e maua ai sona totogi e tausi ai ona matua, ma totogi ai lana salatupe mai le fa’amasinoga.

Na talosaga lana loia fautua ia Rob McNeill ina ia aua ne’i fa’aleaogaina le nofovaavaaia a le ua molia, a ia toe tuu i ai se isi avanoa se tasi mo ia. Na faailoa atili e le loia fautua e fa’apea, o le ua molia o se ali’i talavou e vaivai le tamaoaiga o lona aiga, e lei lava fo’i lona olaga a’oa’oina, ma atonu o nisi nei o aafiaga ua mafua ai ona fa’aletonu faapea lona olaga.

Na lagolagoina e le loia a le malo ia Doug Lowe le talosaga a le itu tete’e mo se fa’asalaga fa’anofovaavaaia, e aunoa ma le toe tuuina atu o se isi fa’asalaga fa’a falepuipui.

Na taua e Lowe e fa’apea, e talitonu le malo, ua lava aso e 314 lea na taofia ai Faavae i le falepuipui ao faatalitali ai se faaiuga o lana mataupu e fai ma ana fa’asalaga i lenei mataupu.

O lea fa’afinauga e le i nofo lelei i le finagalo o le Fa’amasinoga.

Saunoa le afioga i le Fa’amasino Sili lagolago ia Fiti Sunia i le loia a le malo e fa’apea, “Afai e lei usitaia e Faavae tuutuuga o lana nofovaavaaia sa tuuina atu i le 2015, e lei popole fo’i o ia i le faatonuga e totogi lana salatupe ma alu e vaai le Ofisa Faanofovaavaaia, e faafefea la ona toe tuu i ai se isi avanoa pe afai na te lei usitaia le avanoa muamua sa tuuina atu ia te ia.”

“O le tulaga lea ua molimauina e le Fa’amasinoga, e a’afia Faavae i le fa’afitauli o le tagofia o le ‘ava malosi, ma o le mafua’aga autu lena ua mafua ai ona toe aafia o ia i le tulafono, ina ua toe tagofia e ia le ‘ava malosi ma mafua ai loa ona toe loka e Leoleo ma molia e le malo.”

Na faailoa e Sunia i loia a itu e lua e fa’apea, soo se tagata lava e ta’usala e le fa’amasinoga ma fa’asala i se fa’asalaga faanofovaavaaia, e tatau i lea tagata ona usita’i i tuutuuga uma lava o lana nofovaavaaia, ina ia mautinoa ai e le fa’amasinoga, ua i ai lona agaga salamo e tusa ai o lana solitulafono sa faia.

Peita’i o le mataupu a Faavae, ua atagia mai lava i lona le usitaia o tuutuuga o lana nofovaavaaia, lona le amanaia o poloaiga a le fa’amasinoga.

Saunoa Sunia e fa’apea, o le tausaga e 2016 na faanofovaavaaia ai e le Fa’amasinoga Maualuga ia Faavae mo le 5 tausaga, ina ua ta’usala o ia i le moliaga o le talepe fale ma le gaoi, e mafua mai i le fa’alavelave lea na ia osofaia ai le faleoloa i le afioaga i Nuuuli ae ave faagaoi le tele o meatotino i totonu e aofia ai ma se tinoitupe.

O nisi o tuutuuga o le nofovaavaaia a Faavae, o lona tuliina lea o masina e 20 i le toese, aua ne’i ona toe solia se tulafono a le malo, aua ne’i ona toe tagofia le ‘ava malosi, a ia asiasi i le Ofisa Faanofovaavaaia i masina ta’itasi ma ia totogi fo’i lana salatupe.

E na o le 12 masina na tuli e Faavae i le falepuipui, ae tatala loa e le fa’amasinoga i tua ina ia alu e saili sana galuega e totogi ai lana salatupe. E lei tele ni masina talu ona tatala Faavae i tua mai le toese, ae toe loka o ia e Leoleo i le masina o Aokuso 2016 ona o tu’uaiga i le ‘ona, fa’atupu vevesi ma le fa’aoolima i le tulaga tolu.

E 3 masina na taofia ai Faavae i le falepuipui i Tafuna a o fa’agasolo ai lana mataupu i luma o le Fa’amasinoga Fa’aitumalo.

I le masina o Tesema o le 2018, na fa’asala ai loa e le fa’amasinoga ia Faavae na te tuliina le umi e 5 masina i le toese, e aofia ai ma le 5 masina lea na taofia ai o ia i le falepuipui ao fa’atali se faaiuga o lana mataupu.

O le masina lava fo’i lea o Tesema o le 2018 na faila ai loa e le Ofisa Faanofovaavaaia sana talosaga i le Fa’amasinoga Maualuga, ina ia fa’aleaoga le nofovaavaaia a le ua molia, e mafua mai i lona le usitaia o tuutuuga sa tuuina atu i le 2015, ona o lea ua ta’usala o ia e le Fa’amasinoga Fa’aitumalo i moliaga o le faatupu vevesi i nofoaga faitele ma le faaoolima i le tulaga tolu.

Talu mai le masina o Tesema o le 2018 na fa’atulaga ai le ulua’i iloiloga a Faavae i luma o le Fa’amasinoga Maualuga, na galo ai lava ona tu’u lana mataupu i luga o le Kalena, ma mafua ai loa ona taofia umi le ua molia i le falepuipui mo le 314

O le masina o Me na te’a nei na fa’atoa toe manatua ai le mataupu a Faavae, ina ua fa’ailoa e le ua molia i lana loia le tulaga o lana mataupu.

I luma o le Fa’amasinoga Maualuga i le masina na te’a nei, na ioeina ai e Faavae lona le usitaia o tuutuuga o lana nofovaavaaia, ina ua ia tagofia le ‘ava malosi atoa ai ma lona toe soli o le tulafono.

I le mae’a ai ona iloilo e le Fa’amasinoga o faamaumauga uma e uiga i lenei mataupu, na manatu ai loa Sunia, o le faaiuga e sili mo Faavae, o le poloaina lea o ia e tuli le paleni o loo totoe o lana fa’anofovaavaaia e 5 tausaga.

O le taimi nei, ua silia i le 3 tausaga le umi lea ua mae’a ona tuli e le ua molia, lona uiga, e le o toe atoa se lua tausaga ma nai masina o lo o totoe o lana fa’asalaga fa’a falepuipui o lo o totoe ona mae’a loa lea.