Molia le ave ta’avale o le pikiapu na maua i ai e Leoleo fualaau fa’asaina

Ua molia nei e le malo le ave ta’avale o le pikiapu lanu siliva lea na taofia e Leoleo i le 2 vaiaso talu ai, ina ua maua i ai se vaega tele o fualaau fa’asaina o le aisa ma le mariuana, faapea ai ma vaega e masani ona umia e i latou o lo o umia fualaau fa’asaina ma le fa’amoemoe e tulei ma fa’atau atu i isi tagata.

O le vaiaso na te’a nei na tula’i ai le susuga a Richard Valasi i luma o le Fa’amasinoga Fa’aitumalo. E $20,000 lea ua fa’atulaga e le afioga i le ali’i Fa’amasino ia Elvis P. Patea e totogi ona fa’atoa mafai lea ona tatala le ua molia i tua mai le Toese i Tafuna. O le aso Tofi o le vaiaso nei lea ua fa’atulaga e faia ai le ulua’i iloiloga o lenei mataupu.

E ui i le finau malosi o le loia a le itu tete’e mo se avanoa e fa’aitiitia ai i le $10,000 le tupe e tatala ai i tua Valasi, peita’i na lagolagoina e le Fa’amasinoga le faafinauga tete’e a le malo, ina ia faatumau pea le aofa’i o le tupe e tatala ai le ua molia i le aofa’i ua uma ona fa’atulaga e le Fa’amasinoga.

Na taua e le malo e fa’apea, o fualaau na maua ia Valasi, ua lava lea e faamaonia ai lana gaioiga o lo o faia, o le tulei lea ma fa’atau atu fualaau fa’asaina i tagata lautele e aofia ai ma tupulaga talavou o le atunu’u. O lea gaioiga e pei ona finau le loia a le malo, o se gaioiga e matua matuia lava.

Na fa’atonuina e le afioga i le ali’i Faamasino ia Patea le ua molia, ina ia totogi fo’i ma lana salatupe e $531 o lo o nofo aitalafu ai i le Fa’amasinoga, ona faatoa mafai lea ona tatala o ia i tua.

TAGI A LE MALO

E pei ona taua e le malo i le latou tagi e fa’apea, o le po o le aso 27 o Tesema 2019, na taofia ai e Leoleo i se vaega o le alatele a le malo i Tafuna se pikiapu lanu siliva, ina ua maitauina tulaga faaletonu i le moli e faailoa mai ai le laisene o le ta’avale.

Na siaki e Leoleo le ta’avale ma iloa ai, e to’alua ali’i o lo o i totonu o le ta’avale, o Valasi o lo o ia faafoeina le ta’avale, ma se tasi o ali’i o lo o saofa’i i le nofoa o le pasese, o le susuga lea ia Mauigoa Olataga.

Na faagasolo suesuega a Leoleo i le ta’avale ma iloa ai, e le tutusa le numera o le pepa (tag) o lo o faapipi’i i le laisene o le ta’avale, ma le numera o lo o pipi’i i luga o le laisene. E pei ona masani ai le Ofisa o Ta’avale afi a le malo, e tatau ona tutusa le numera e tusia i luga o le tag ma le numera o lo o tusia i luga o le laisene o le ta’avale.

O le numera o lo o tusia i luga o le tag o le 741C, ae o le numera o lo o tusia i luga o le laisene o le ta’avale o le 2741. Na saili fo’i e Leoleo mai le Ofisa autu o Leoleo i Fagatogo faamaumauga mo le ta’avale sa faafoeina e Valasi ma faamaonia ai, na mae’a lava le aoga o le laisene o le ta’avale i le masina o Novema i le tausaga e 2016.

Talu ai tulaga faaletonu i le laisene o le ta’avale, atoa ai ma le mae’a lea o le aoga o le laisene o le ta’avale talu mai le 3 tausaga talu ai, na faia ai loa le faaiuga a Leoleo, o le a taofia le ta’avale faatasi ai ma le ave ta’avale, ina ua faamaonia fo’i, na mae’a le aoga o lona laisene i le 2 tausaga talu ai.

Na saili e Leoleo le ta’avale ma maua ai se ato faa fafa lanu moana i luga o le nofoa o loo i le pito i tua o le ta’avale, ae o lalo o le nofoa o le ave ta’avale, na maua ai e Leoleo se teutusi lanu samasama o lo o i ai vaega o fualaau fa’asaina.

Na siaki e Leoleo totonu o le ato faafafa lanu moana sa maua i le nofoa pito i tua o le ta’avale, ma maua ai i totonu se taga pepa iila feololo. I totonu o le taga pepa iila feololo lea, sa maua ai e Leoleo ni tama’i tagapepa (ziplog) se 2. O le isi taga pepa iila o lo o i ai tama’i taga pepa iila laiti e 10 o loo tutumu i vaega o le pauta fa’asaina o le aisa, ae o le isi taga pepa sa maua ai i totonu tama’i taga pepa iila e 15 o lo o tutumu i vaega o le laau fa’asaina o le mariuana.

Na saili fo’i e Leoleo totonu o le teutusi lanu samasama sa maua i lalo o le nofoa o le ave ta’avale. I totonu o le taga pepa samasama lea, sa maua ai e Leoleo isi fo’i vaega o le pauta faasaina o le aisa faapea ai ma vaega o le laau fa’asaina o le mariuana.

Na saili e Leoleo le tino o Valasi pe maua i ai ni aupega atoa ai ma fualaau faasaina. I totonu o le taga o le ofuvae uumi a Valasi sa laei, na maua i ai e Leoleo tama’i pepa iila o lo o i ai vaega o le pauta fa’asaina o le aisa, ae o le isi pepa iila sa maua i ai vaega o le laau fa’asaina o le mariuana.

Ina ua fesiligia e Leoleo ia Valasi e faatatau i fualaau faasaina sa maua i totonu o le ato faafafa lanu moana faapea ai ma le teutusi samasama, sa ia teena ai le i ai o sona fesootaiga ma fualaau fa’asaina nei. Sa ia faailoa i Leoleo, o le ato ma le teutusi samasama sa i ai lava i totonu o le ta’avale i le taimi na ia ulufale atu ai i totonu o le ta’avale ma fa’aaoga e fealua’i ai i le po lava lea na taofia faapagota ai o ia e Leoleo.

Na maua le avanoa e fesiligia ai e Leoleo le ali’i sa to’alua ma Valasi i totonu o le taavale i le taimi na taofia ai e Leoleo, le susuga a Olataga. Na taua e Olataga i Leoleo e faapea, o fualaau fa’asaina sa maua i totonu o le ato lanu moana faapea ai ma le teutusi samasama, o mea uma lava ia e patino ia Valasi.

Na faailoa atili e Olataga i Leoleo e fa’apea, a o aga’i mai le la ta’avale ma Valasi i luga o le alatele, sa ia faalogo o talanoa Valasi ma se tagata i luga o le telefoni, ma faailoa atu ai e Valasi i lea talanoaga, lona aga’i atu e momoli le faatau a le tagata sa faaigoaina o ‘uncle M’.

Ina ua fesiligia e  Leoleo ia Valasi i fualaau faasaina sa maua i lona tino, sa ia ioeina ai, o fualaau fa’asaina ia e patino ia te ia, sa ia aumaia i sana uo e nofo i Vaitogi, le nofoaga e taua o Le Filifili, lea o lo o tu i le ogatotou o Vaitogi ma le afioaga o Iliili.

Na faia se suega faapitoa i vaega o fualaau fa’asaina maua i totonu o le ta’avale faapea ai ma le tino a le ua molia, ma faamaonia ai, o vaega ia o fualaau fa’asaina o le aisa ma le mariuana.