Amata Poloka a Leoleo mo Aso Fiafia

O le aso 20 Tesema, sa amata ai le polokalama masani a leoleo i le fa’aiuga o le tausaga mo aso fiafia e faia ai poloka i luga o le alatele, aua lava le puipuia o le atunu’u i lenei vaitau o le Kerisimasi ma le Tausaga Fou. E ma’ea le polokalama - holiday enforcement - ia Ianuari 2, 2020.

I le fonotaga a le kovana ma lana kapineta i le vaiaso ua te’a, sa fa’alauiloa ai e le Komesina o Leoleo, Le’i Sonny Thompson fuafuaga a le matagaluega i le fa’afoeina o lenei polokama masina.

Ma sa ia fautuaina sui o le kapineta, ta’ita’i ma le mamalu o le atunu’u ina ia alofagia ia tausi le filemu i nei vaitau, ma o i latou uma lava e maua i le solitulafono o le a ave i le toese i Tafuna.

Sa ia fautuaina fo’i le kapineta, afai e ave se isi o i latou i le falepuipui, aua ne’i fa’afeso’ota’i atu lona ofisa pe telefoni atu foi ia te ia.

I lenei vaitau o aso fiafia i le gasolo atu o tagata i pati o le Kerisimasi, ae maise le auai i fale kalapu, sa fautuaina e Le’i le atunu’u ina ia aua le fa’amisa pe saveuina le filemu. Ua ia talosagaina foi le fesaosoani a le kapineta ae maise the Ofisa o Mataupu Tau Samoa, e galulue fa’atasi ma leoleo a le malo i lenei vaitau.

Afai ua ova le ona, po’o le tagofia o le pia ma le ava malosi, e mafai e leoleo ona ave lea tagata i le fale pe o le valaau foi o le taxi, ae aua le aveina le ta’avale, o se isi fautuaga lea a Le’i.

TAPUIA ALOAIA POLOKALAMA KERISIMASI A LE ARTS COUNCIL

O le afiafi o le aso 21 o Tesema, sa tapunia aloaia ai po e tolu o pesepesega o le Kerisimasi lona 42 a le American Samoa Arts Council, lea sa amata i le po o le aso Tofi ua te’a i le Fagatogo Pavilion.

O le afioga i le Lutena Kovana, Lemanu Palepoi Sialega Mauga, sa avea ma sui o le malo, ma le kovana sili, e saunoa fa’apitoa mo le tapunia o lenei polokalama fa’aletausaga.

I le po muamua o pesepega na saunoa fa’apitoa ai le afioga i le Kovana Sili, Lolo Matalasi Moliga, ma ia fa’ailoa lona manatu autu i fa’aupuga o lo’o tusia i le laisene o ta’avale i totonu o le atunu’u “Motu o Fiafiaga”.

Sa ia fa’ailoa e atonu o manatu ia o “nai o tatou matua e fa’avae ai le motu lenei. Finagalo o le Atua, ia nofo ma ola tagata Samoa e ola ma fiafia.”

“Le tatou atunu’u, e leai se mea e sili ona taua i le Atua, tatou o e fa’atali le Alo o le Atua i lona fanau mai i le agaga fiafia. Mea fo’i lea tatou te vaavaai ai i le atunuu, ua tulai mai e fa’aali lea fiafia i teuteuga eseese o le Kerisimasi, e o’o lava i nai aiga laiti,” o se vaega lea o le saunoaga a le kovana. “O lona uiga, e atagia mai ai, le fiafia i lenei vaitau.”

“Le tatou atunu’u, tatou fa’atalitali i le fanau mai o le pepe fou. Fa’atali le agaga fiafia ma le fa’afetai i le Atua ua tatou aulia mai lenei aso fanau o le tatou Faaola. E ui lava i le pesia i tatou i faigata i o tatou uso i Samoa i fa’amai o lo’o feagai ai nei, ae tatou tatalo faatasi i le Atua, ia o’o pea i ai ona aao alofa, ma fa’amafanafana i tagatanuu o Samoa, fa’apena foi si o tatou atunu’u iinei.”

Saunoa le kovana e fa’apea, o lo’o “tatou galulue punou’ai e puipui le soifua o le tatou atunuu mai ia fa’ama’i faigata.”.

I le avea ai o ia ma sui mo taitai o le Fono Faitulafono, ae maise le faigamalo a Amerika Samoa, fa’apea ma le Lutena Kovana, “matou te avatu ai fa’amanuiaga o le Kerisimasi i le tatou atunuu, faapea ma tama fanau a le tatou atunu’u i so’o se nofoaga i le laolagi,” o le saunoaga lea a Lolo.

“Fa’amanuiaga fa’apitoa mo tama fanaua a Amerika Samoa i tautoga fa’amalo, o fea lava o lo’o outou tautua ai, ia puipuia lo outou soifua i le alofa o le Pepe o le Kerisimasi.”

Ua le gata i lea, “Fa’apitoa fa’amanuiaga ma alofaaga mo o tatou aiga i Samoa, o e o lo’o aafia i le maliu ma le oti ona o nei fa’ama’i faigata [o le misela]. Ia tatou tatalo fa’atasi i le Atua, ia uma atu ia faigata, ae mulimuli mai le malamalama i le alofa o le Atua.”

“Tu’uina atu foi fa’amanuiaga fa’apitoa o le Kerisimasi i lau afioga le Ao Mamalu o le Malo o SAmoa, lau afioga le Palemia ma le Palemene ma le mamalu o le malo o Samoa. Matou te tatalo i le Atua ia foai atu le malosi o le mafaufau, malosi o le tino e feagai ai ma lu’itau faigata o lo’o feagai nei” Samoa, o se isi lea vaega o le saunoaga a Lolo.

“Tatou tatalo i le Atua au mai le malamalama i tatou loto, tatou te talia ai mea e le mafai ona tatou suia. Aumai le loto tele, tatou te fai ai suiga, e mafai ona tatou suia mo le manuia o tagata, ia ma le malamalama ma le loto toa tatou te iloa ai le ‘ese’esega o nei mea.”

“Alofa le Atua ia manuia le alo atu o le tatou atunuu i le Kerisimasi ma le Tausaga Fou,” o upu fa’a’iu ia a le kovana sili.