Loka i le fasiga o lona to’alua ae maua ai fualaau fa’asaina

O le ali’i lea na pu’e faapagota e Leoleo ona o tu’uaiga i lona faia o sau’aga i lona to’alua, ua molia nei o ia i lona umia fa’asolitulafono o vaega o le pauta fa’asaina o le aisa.

O le vaiaso na te’a nei na tula’i ai le ua molia i luma o le Fa’amasinoga Faaitumalo mo lana ulua’i iloiloga. Talu ai ona o le puipiuga o le Tina na aafia, ua le fa’ailoa ai e le Samoa News le suafa o le ua molia.

E 5 moliaga ua tu’uaia ai e le malo le ua molia. O ia moliaga e aofia ai moliaga mamafa e 3 o lona taofia faapagota o lona aiga i se auala fa’asolitulafono; fa’aaoga fa’asolitulafono o se a’upega; faapea ai ma le umia fa’asolitulafono o vaega o le pauta fa’asaina o le aisa, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua; faapea ai ma moliaga mama e 2, le moliaga o le faaoolima i le tulaga tolu, atoa ai ma le faia o gaioiga e ono lamatia ai le saogalemu o fanau laiti, o le vaega A lea o solitulafono mama, lea e mafai ona fa’asala ai se tasi i le toese mo le umi e le silia i le tasi le tausaga, pe fa’asala i le salatupe e le silia i le $1,000, poo le fa’asala fo’i i fa’asalaga uma ia e lua.

E $25,000 le vaega tupe lea ua fa’atulaga e le afioga i le ali’i Fa’amasino ia Elvis P. Patea e tatala ai i tua le ua molia.

Na teena e Patea le talosaga a le loia fautua mo le ua molia mo se avanoa e faaitiitia ai le tupe e tatala ai i tua lea ali’i.

Na tete’e malosi i ai le itu a le malo i lea talosaga. Na taua e le Loia a le malo ia  e fa’apea, o le tupe lea ua mae’a ona fa’atulaga e tatala ai i tua le ua molia, ua talafeagai lelei ma le matuia o le solitulafono ua tu’uaia ai o ia.

Na taua e le loia a le malo e fa’apea, e le gata na fa’afefe e le ua molia lona to’alua i se a’upega malosi, ae na ia taofia faapagota fo’i le Tina ma le fanau mo se taimi umi. Ae sili ai i lo lena, na maua ai e Leoleo fualaau fa’asaina ina ua pu’e fa’apagota o ia mai le nofoaga o lo o faigaluega ai.

E talitonu le malo, afai ae tatala i tua le ua molia, e ono tele se avanoa e sola ese ai o ia mai le atunu’u.

O le vaiaso na te’a nei na tula’i ai le ua molia i luma o le Fa’amasinoga Maualuga mo lana ulua’i iloiloga, ma ia teena ai tu’uaiga fa’asaga ia te ia. O Ianuari 2020 ua fa’atulaga e faia ai lana ulua’i iloiloga i luma o le Fa’amasinoga Maualuga. O le taimi nei, o lo o taofia pea o ia i le toese i Tafuna ina ua le mafai ona ia totogi le tupe sa fa’atulaga e tatala ai o ia i tua.

TAGI A LE MALO

E pei ona taua e le malo i le latou tagi e fa’apea, pe tusa o le aoauli o le aso 26 o Novema 2019, na aga’i atu ai Leoleo e tali i se valaau mai se Tina sa ia talosagaina se fesoasoani mo ia ma lana fanau, ona o faiga le alofa sa faia e le Tama o lana fanau ia te i latou.

Na taua e le Tina lea i Leoleo e fa’apea, i le tuneva o le po o le aso 26 o Novema pe tusa o le 12:42, na fa’afuase’i ai ona vili atu se tagata i lana telefoni (messenger). E lei umi ni minute talu ona tuana’i le vili atu o le tagata, ae fa’afuase’i loa ona ia vaaia le faitoto’a o lona potu ua tatala faamalosi atu e se tagata, e ala i lona kikiina o le faitoto’a.

Na manino i le vaai a le Tina, o le tagata na ia kikiina le faitoto’a, o le Tama o lana fanau, lea ua molia nei. Na avea le pao leotele o le taimi na kiki ai le faitoto’a ma auala na feala ai lana fanau sa momoe.

Na taua e le Tina i Leoleo e faapea, na ona ulufale faamalosi atu lava le ua molia i totonu o le fale, aapa atu loa lea i lana telefoni feavea’i ma fao faamalosi ese mai i ona lima ae togi i lalo o le fola o le fale. Na mae’a lea, ona toe alu lea o le ua molia i fafo ma le fale, ae o le taimi lea au tau fai tulioso atu ai si ana fanau ma nonofo uma i ona tafatafa.

Na taua e le Tina i Leoleo e fa’apea, e le’i umi ona alu le ua molia i fafo ae vaaia le toe aga’i atu i totonu o le potu ma ona foliga ua matua ita lava. Na tago le ua molia i le fana sa uu iu lona lima ua faalala ma tuu i lona muaulu. Na avea lea gaioiga ma auala na matua fefe ai lava le Tina ona o le saogalemu o ia ma lana fanau.

O le taimi lea na faatonu ai loa e le ua molia o ia ma lana fanau, e leai se isi e mafai ona toe alu ese ma le fale, e le mafai fo’i e se tasi ona vili i se isi lava tagata.

Ae i le taeao o le aso Sa na sosoo ai, na mafai ai loa e le Tina ona tapena lana fanau e momoli i le Aoga Aso Sa, ae maua ai fo’i ma le avanoa e sauni ai fo’i mo lana galuega. Sa na o le tama teine a le Tina na mafai ona alu ma ave, ae o le tama na nonofo ma lona Tama i le fale.

A o le i tuua e le Tina le fale, na valaau ane i ai le ua molia e fa’apea, “aua e te faia se mea ou te alu atu ai loa i lou fale faigaluega, ona e le fiafia lea i se mea e tula’i mai ai.”

O le fefe tele o le Tina atoa ai ma lona popole i le saogalemu mo ia ma lana fanau, na mafua ai loa ona ia talosagaina se fesoasoani a Leoleo e uiga i lenei mataupu.

Na aga’i atu Leoleo i le fale o le Tina e saili mai ai le ua molia peita’i e lei maua ai o ia, ae ina ua aga’i atu Leoleo i le Fale Faigaluega a le ua molia, sa latou maua atu ai loa o ia, ma pu’e faapagota mai ai loa o ia.

A o le i taofia faapagota e Leoleo le ua molia, na maua le avanoa e saili ai lona tino ina ia mautinoa na te le o umia se a’upega. Ina ua sailia e Leoleo le tino a le ua molia, sa latou maua i ai se tama’i pepa iila o lo o i ai vaega o le pauta fa’asaina o le aisa.

Na faailoa e le ua molia i Leoleo e fa’apea, o le tele o faafitauli o lo o tutupu i lona olaga ma lona aiga, ua mafua ai ona ia tagofia fualaau fa’asaina.

Na sailia fo’i e Leoleo le fale o le Tina na a’afia ma latou maua i ai le a’upega sa masalomia na fa’aaoga e le ua molia e faafefe ai lona to’alua ma lana fanau.