To'a 8 manunu’a ta'avale lavea i Faganeanea

Ona o le saoasaoa tele o le Pikiapu na molimaina e le to’atele le ta’avalevale i Faganeanea, ua mafua ai ona lavea lea ta’avale.

E tusa ai ma le fa’amatalaga ua fa’amauina ua fa’ailoa ai e le sui na avea lea ta’avale, “O le naunau atu ia maua le taimi i le lotu, ae ua fa’avave atu, ma ua fa’alogoina fo’i ua i ai se mea o fa’aletonu mai le ta’avale, ma ua o’o mai ai le popolevale ma le iloa ai se mea e fai. O le taimi itiiti lava lea ua se ese ai le ta’avale mai lou mautinoa o lo’o gafatia ou ona faia se mea e fa’asa’o ai le sasi, ma ua lavevea ai le to’avalu  o i matou sa matou malaga mai.”

O le taimi na afua ai ona sasi lana fa’atatau, ina ua taumafai o ia e pasi le ta’avale i ona luma, ma ua saoasaoa tele lana alu i le taimi lea, ae ua fa’alogoina loa e le o talafeagai ma le ta’avale lana mea o mana’o e fai. E toe taumafai atu e toe fo’i i lona itu o le alatele, ae leai, o iina loa na fa’aletonu ai loa lona mafaufau ua pogisa ia te ia se isi gaoioiga e fai, ae ua ia mautinoa o lo’o i ai lona aiga i luga o le ta’avale.

E fa’alua ona mafuli le ta’avale ma fa’ato’a tu, e to’atolu le pasese sa i tua i le pusa, na lelea ese mai le taavale, 16, 18 ma le 21 tausaga le matutua, o i latou na.

E to’afa le pasese e to’avalu ua mae’a ona togafitia manu’anu’a i le falema’i ma ua te’a i tua, peita’i e to’atolu o lo’o togafitia pea. O le to’atasi o i latou ia na faia le taotoga i le aso Lua.

O se fautuaga mai le afioga le Komesina o Leoleo, e fa’autagia pea i le mamalu o matua ma i latou e ave ta’avale, o lo ua o’o mai fo’i nei vaitau, e matua ai le tagata i lona fia fiafia ma fai fiafiaga fa’aleaiga, galo ai e fa’afoea ta’avale.

“A iloa ua inumia le ava malosi ma le pia, ia alofagia aua ne’i toe fa’afoea ta’avale, ae nonofo lelei pea i le mea o fiafia ai se’ia mae’a lelei ona momoe ma feala mai i le manuia, fa’ato’a o ai i aiga.”

“Aua fo’i nei fa’afoea le ta’avale a’o le’i siakia fa’alelei pe ua atoatoa totoga o le ta’avale e alu ai ma le saogalemu i luga o alatele. A pa’o’o mai se mea i le ta’avale siaki, aua o mea nei e afua ai fa’alavelave matuia, ma a’afia ai le ola.”

Ua toe fa’amanatu mai fo’i e le Komesina o Leoleo, e fa’ataunu’u fo’i a latou poloka masani o ta’avale feoa’i i le vaitau o le Kerisimasi ma le Tausaga fou.