Molia se Tina i lona umia faasolitulafono o fualaau fa’asaina

O le vaiaso na te’a nei na molia ai e le malo se Tina i lona umia faasolitulafono o vaega o fualaau fa’asaina o le aisa ma le fa’amoemoe e tulei atu i isi tagata, ina ua taofi e Leoleo le ta’avale sa ia faafoeina ma maua i ai vaega o fualaau fa’asaina.

O le aso Lua la o le vaiaso na te’a nei na tula’i ai Mavis Fiatupu i luma o le Fa’amasinoga Faaitumalo mo le taimi muamua.

O moliaga ua faia fa’asaga ia Fiatupu e aofia ai lona umia faasolitulafono o vaega o le pauta fa’asaina o le aisa; faapea ai ma le moliaga o le umia faasolitulafono o le aisa ma le fa’amoemoe e tulei ma fa’atau atu i isi tagata; o solitulafono mamafa ia, lea e mafai ona fa’asala ai se tasi i le toese mo le umi e le itiiti ifo i le 5 tausaga, ae le sili atu i le 10 tausaga i le toese, pe fa’asala fo’i i le salatupe e le itiiti ifo i le $5,000 ae le sili atu i le $20,000, poo le fa’asala fo’i i fa’asalaga uma ia e lua.

E $20,000 le vaega tupe lea ua fa’atulaga e le afioga i le ali’i Fa’amasino ia Elvis P. Patea e totogi ona fa’atoa mafai lea ona tatala Fiatupu mai tua i le toese i Tafuna.

TAGI A LE MALO

O lo o taua e le malo i le latou tagi e fa’apea, o le po o le aso 29 o Novema na te’a nei na taofia ai e se ali’i Leoleo sa tiute i luga o le alatele i Tafuna se pikiapu lanu moana, ina ua molimauina e le o ola le moli e faamalamalama ai le laisene o le ta’avale. Pe tusa o le itula e 9:23 i le po na fa’atinoina ai e le ali’i Leoleo lea gaioiga.

Na siaki e le Leoleo le ta’avale ma iloa ai, e to’atolu tagata o lo o i ai i totonu, o ni ali’i se to’alua, lea na iloa mulimuli ane o Apelu Willie ma Vincent Alex Jr, ma se tama’ita’i, o ia lea o Mavis Fiatupu, o ia fo’i lea sa aveina le ta’avale.

Na faailoa e le Leoleo ia Fiatupu le mafua’aga ua ala ai ona taofi lana ta’avale, ma sa malie fo’i Fiatupu e alu le ali’i Leoleo e siaki numera o lo o pipii i laisene o lana ta’avale ina ia fa’amaonia ai le moni o masalosaloga, e le gata e le o ola le moli o le laisene, ae sese fo’i le laisene lea e fa’apipii i le ta’avale.

Na saili e le ali’i Leoleo le laisene ma faamaonia ai, o le laisene numera (3410), a’o lea ua aumai faapipi’i i le ta’avale o lona laisene o le (3041). Ina ua fesiligia e le ali’i Leoleo le Ofisa autu mo ni faamaumauga o le ta’avale atoa ai ma le laisene, na faamaonia ai, o le laisene (3410), na mae’a lona aoga i le masina o Aperila o le 2015, tusa lea ua 4 tausaga talu ona le toe fa’aaogaina.

A o faia gaioiga a le ali’i Leoleo, sa vaaia foliga fefe ma le le mautonu o Fiatupu. Sa vaaia fo’i e le ali’i Leoleo ni gaioiga mai ali’i e to’alua o lo o totonu o le ta’avale, e atagia mai ai lo la taumafai e nana se mea mai le ali’i Leoleo.

O le taimi lea na fesiligia ai loa e le ali’i Leoleo ia Fiatupu mo lona laisene ave ta’avale, poo se isi lava pepa e faamaonia ai o ia, peita’i na fa’aalia e Fiatupu, e le o ia te ia lona laisene poo se pepa e faamaonia ai o ia.

O le taimi lea na faailoa ai loa e le ali’i Leoleo ia Fiatupu, e le gata o le a taofia o ia ona e le o i ai sona pepa faamaonia poo se laisene ave ta’avale, ae o le a taofia fo’i le ta’avale i lalo o le vaavaaiga a Leoleo, ona ua siilia i le 4 tausaga talu ona mae’a le aoga o le laisene ae le’i toe fa’afouina lava.

Ina ua taunu’u atu le ta’avale i le Ofisa o Leoleo i Tafuna, sa fa’atonu e Leoleo ia Fiatupu e tatau ona i ai i le su’eina o lana ta’avale mo mea totino uma o lo o i ai i totonu. Sa ave fa’atasi uma atu ai ma ali’i e to’alua sa i totonu o le ta’avale, le susuga a Willie ma Alex Jr mo suesuega a Leoleo.

Ae tusa ai o le tagi a le malo, na toe tatala i tua Willie ma Alex Jr ina ua mae’a ona fesiligia i laua e Leoleo. E leai fo’i ni fualaau fa’asaina sa maua i o la tino.

Ina ua saili e Leoleo totonu o le ta’avale sa faafoeina e Fiatupu, sa maua i ai se ato i lalo o le nofoa o le pasese. Na taua e Fiatupu i Leoleo ao le’i sailia le ta’avale, o ia e ana le ta’avale, soo se mea totino fo’i e maua i totonu o le ta’avale e patino ia te ia.

I totonu o le ta’avale, sa maua ai e Leoleo se ato faa fafa lanu uliuli o lo o i ai ni lavalava i totonu. I le pito i lalo o le ato sa maua i ai se taga pepa iila o loo i ai isi tama’i taga pepa iila laiti o loo utu ai i totonu vaega o le pauta fa’asaina o le aisa. Sa maua ai fo’i isi mea e fa’aaoga e tagata mo le tuleiina atu o le aisa e pei o straw e ta tipi tulimanu; o le anoano o pepa iila laiti e utu i ai le aisa; pepa taai e 2; afi penisini e 2; e tasi le seleulu; faapea ai ma se fua e alu i le eletise e tasi.

Na faia e Leoleo se suega i le vaega o le pauta paepae lea sa maua i totonu o le ato faa fafa ma faamaonia ai, o vaega ia o le pauta faasaina o le aisa.

Na maua fo’i le avanoa e saili ai e Leoleo le tino ma lavalava o Fiatupu ina ia mautinoa e le o natia ai ni vaega o fualaau fa’asaina. Ina ua saili e Leoleo le tino o le ua molia, sa maua ai se paipa tioata e ula ai le aisa, o lo o tumu i vaega o le pauta o le aisa. Sa maua ai fo’i se tama’i pepa iila o lo o i ai vaega o le pauta o le aisa.

Ina ua fesiligia e Leoleo ia Fiatupu poo ai e ana nei fualaau fa’asaina ua maua ia te ia, na ata le ua molia ma faamimigi ona tauau ma faapea atu i Leoleo, “Ou te le iloa poo ai e ana fualaau faasaina sa i totonu o le ato.”

Ina ua fesiligia e Leoleo ia Willie i le mafua’aga na maua ai o ia i totonu o le ta’avale a Fiatupu, na taua ai e Willie e fa’apea, o Fiatupu, o lana uo tama’ita’i, sa la aga’i atu mo se taumafataga i se Fale’aiga i le po lea. Ao la aga’i atu i le ala, sa la pikiina mai ai le isi a la uo, le susuga a Alex Jr.

Na taua e Willie, na te le iloaina o i ai ni fualaau fa’asaina i totonu o le ta’avale, na pau le fa’amatalaga a Fiatupu sa fai atu ia te ia, la te o i se fale’aiga la te aai ma talatalanoa ai.

Ina ua fesiligia Alex Jr e Leoleo, sa ia taua ai fo’i le tala lava lea e tasi e pei ona tuuina atu e Willie. Na te le iloaina o lo o i ai ni fualaau fa’asaina i totonu o le ta’avale, pau le itu sa ia faalogo o talanoa ai Fiatupu ma Willie, latou te o muamua e momoli le ato ia “Uncle Kiuga” ona faatoa latou o lea i le fale’aiga.

Na taua atili e Alex Jr i Leoleo e fa’apea, na te le masani lava i se tasi o nei tagata e talanoa i ai ia Fiatupu ma Willie, pau le itu na manino i lana fa’alogo, o lo o i ai le fuafuaga a Fiatupu ma Willie e momoli le ato i le tagata e igoa ia Uncle Kiuga.