NOVEMA - Masina taualoa tima’iga, Togafitiiga ma'i suka

O le Faraile na te’a sa fono ai le Komiti Fa’afoe o le DOH Tobacco/Diabetes Coalition i le Paradise Pizzas ina ia soalaupule pe i ai ni suiga i le latou kalena mo le masina atoa o Novema, le masina e taualoa ai le Ma’i Suka i le atunu’u.

E amata mai le taumafaiga ina ia taofia oe mai le fa’atetele o lou ma’i suka, ae o le fa’alauiloaga fo’i o ala e mafai ai ona e le o’o lava i lea gasegase, o puipuiga fo’i o le mamalu lautele mai le o’o atu ina ma’i suka, ma togafitiga o lou ma’i suka ina ia mafai ona e soifua fiafia pea ma tigafitia lou suka.

Sa auai atu le afioga le Fa’atonusili Motusa Tuileama Nua o le Matagaluega o le Soifua Maloloina ma fa’ailoa lona agaga fa’afetai i le galulue a lea Komiti fa’afoe ina ia pasia le tulafono ua mae’a fa’amalosia nei tau le ulaula tapa’a i nofoaga faitele.

E ese mai lea ae ua mae’a fo’i ona fa’atulaga le latou teuteuga o le Pili lava lea e tasi, ina ia aofia ai nisi o mea na misia mai le fa’aupuga o le pili muamua, ma ua aofia ai nei le ulaula i Tapa’a Eletoronisi lea ua matua to’atele fo’i le fanau talavou ua fa’ataitaia, ma ua fa’amaonia mai suesuega a saeanisi foma’i, o le a matua televave ai o le kanesa o le mama o i latou e ulaula ai.

E i ai isi vaega fo’i o teuteuga o lea pili ua toe taoto nei i luga o le laulau a le Kovana, o le aofia ai lea ma nofoaga faitele i lalo o faleie ma polotito o fale, e tapunipunia, ua fa’asa ai fo’i le ulaula, ae maise o le mamao e tusa o le 50 futu mai le nofoaga faitele, e le tatau ai ona ulaula ai nisi.

O le Kalena na pasia e le komiti, ua fa’atulaga ai le tatala lava o le masina lenei i le latou fa’atalanoaga o sui fa’asalalau a le Televise, Leitio ma le Nusipepa, ina ia a’ave tala uma e fa’atatau i le Ma’i Suka ia lau silafia e le mamalu o le atunu’u ae maise i tupulaga talavou.

O le a fa’aauau pea lava talavai masani mo le mamalu lautele i falemai e amatalia lea i le Vaega o Tina Ma’itaga Faga’alu. Soso’o lea ma le fa’asologa o nei tima’iga uma e fa’atatau i le Ma’i Suka i le Falema’i i Amouli, Tafuna  ma Leone se’ia o’o i le aso Faraile, Novema 8, e fa’atino ai le Talotaloga tele i Utulei e fa’alauiloa ai taumafaiga mo le masina atoa  e fa’atatau lava i le Ma’i Suka. Ua fa’atulaga tagata uma e talotalo ina ia tofu la’eia le mitiafu lanu moana. Ona o le aso Gafua o le aso Malolo mo Vetereni, ua leai se mea patino mo lea aso. Ae nofo sauni le Komisi mo le fa’asologa o le Semina i le faletalimalo o le Tradewinds e amatalia ia Novema 13.

O le vaiaso atoa e soso’o ai o le a malaga ai le Komisi i le Manu’atele mo le fa’asologa o le polokalama mo le Manu’atele ma fa’amae’a ai le fa’amoemoe i le Aso Fa’afetai.

O le ma’i suka ua lau silafia e le atunu’u atoa, o se tasi o gasegase, ua sili ona to’atele tagata Amerika Samoa ua a’afia ai, ma ua numera tasi ai fo’i Amerika Samoa i lona pasene o tagata soifua i le atunu’u ua maua ai.

I le saunoaga a Motusa, ua ia manatu ai, ina ia tu’uina le faiva i le Komisi latou te gafatulima ai ma soalaupule ni polokalama e fa’atautaia i le atunu’u ma ni kemupeni e faatutu aga’i i le taua ma gasegase tumau. O le a feso’ota’i tele lea Komiti ma feutagaiga i le va ma le CDC a le Malo Tele. Ua le taua’aoina atu se tali maoti tau i lea fanoga ua folasia e le fa’atonusili, se’ia mae’a moea le toa i aai o finagalo seia toe fono le komiti lava lea i le lumana’i, i a latou fonotaga faalemasina.