Tala I Vaifanua

AMATA SAILI AUSIVA FAAFIAFIA MO AM. SAMOA - 2020 HAWAII

Mo le sao o Amerika Samoa i le Fa’aaliga o Tu ma Aga a le Pasefika i Hawaii i le tausaga fou, ua fa’ailoa e le Fa’atonu o le Arts Council, Lauagaia Mary Taufete’e, “O le a amatalia nei ona filifili toto’a i latou o le a malaga fa’apitoa mo le fa’amoemoe o le aufaipese ma le ‘au fa’afiafia, ae o le a sailia lea mai le vasega o fanau a’oga i a’oga maualuluga uma i le atunu’u.”

Ua fa’ato’a taliu mai le tamaita’i fa’atonu mai se fonotaga sa pa’au atu i ai, lea na fa’atasia uma i ai sui mai atunu’u e 26 o le pasefika, ua aotelega i le Komiti Fa’afoe o lea fo’i faamoemoe Pacific Arts Festival 2020 i Honolulu, Hawaii - ua fa’atulaga ia Iuni 10-20, 2020.

Ua fa’amoemoe le Arts Council latou te avea se ‘aumalaga e to’a 100, e aofia ai le aufaipese, ausiva, valiata, aukuka o mea’ai Samoa ma atisi, ae ese ai lava ta’ita’i malaga e aofia ai sui o le Komiti Fa’afoe a le Arts Council.

“O le filifiliga maia o sui e to’aono mai a’oga maualuluga ta’itasi, o le a tu’u maoti lea i le aoga lava latou, aua o i latou e silafia lelei fanau e agava’a i siva ma pesega fa’asamoa i a latou vasega fa’asamoa o lo’o fa’atautaia ai,” se tala lea a  Taufete’e.

Talu mai le tatalaga aloa’ia o le tatou Fale Mata’aga fou, ua matauina lava e le’i tatala lava le isi fale tuai lea e fa’afou mo le tatou lea matagaluega. Ina ua fesiligia Taufete’e sa ia fa’ailoa mai, “E le toe umi ae mae’a loa galuega fa’afou o lea fale, ma o se mea o lo’o taliga e i matou ina ia lava se avanoa e fa’aalia lelei ai le tele o measina o lo’o taofia lava se’ia mae’a lea itu o le tatou fale mata’aga nei. Ua tele na’ua ata vali ma isi fo’i measina taua o lo’o fa’aagaaga mo lea itu e fa’aalia ai. Ae a maua loa lea itu atoa, ua faigofie ona fa’asolo atu i luga nei galuega alofilima e fa’alauiloa ina ia maimoaina e le mamalu lautele.”

TULA’I MAI, INA IA FAITAUINA LOU TAGATA SOIFUA - 2020

Ua tatalaina nei le Ofisa o le Faitauga Tele a le Atunu’u (US Census American Samoa) i le fogafalelua o le Lumana’i Building i Fagatogo.

O le Ofisa Autu lenei e tatau ai ona faitauina le tama, le tina ma le fanau uma lava, o so’o se tasi o lo’o ua alaala i Amerika Samoa i lenei vaitausaga. E le fesiligia lou ituaiga tagata, po’o fea fo’i le atunu’u na e fanau ai, po’o le a fo’i le umi e te nofo ai i Amerika Samoa, ae taulia, ua faitauina oe i le Faitaga 2020 mo Amerika Samoa.

I le saunoaga fa’apitoa a le afioga le Lutena Kovana o Amerika Samoa, Lemanu Peleti Mauga i le sauniga fa’apitoa na afuafua ai le tatalaina o faitoto’a o lea ofisa mo le faitauga, “O Numera e una’ia nai fa’atupega, ia tatou iloa e taua le numera ma le faitauga o oe ma lou aiga i lou i ai i Amerika Samoa i le taimi nei.”

“E te iloa lelei, a le faitauina oe, ua le aofia oe i alagamanuia uma lava o lo’o fa’ase’e mai e le Malo Tele mo le tausiga lelei o tagata uma sa fa’amaumau lona suafa i le faitauga ua tuana’i. Aua ne’i toe fa’aluaina lea sese, ae ia tula’i mai ma ia faitauina oe,” o sana toe fa’amalosi lea.

Ua i ai nisi iloga i lea Ofisa fa’alotoifale o le Faitauga Tele a le Iunaite Setete o Amerika ma ona Teritori, le susuga Jason Kopp o le US Census Bureau, lea ua fa’ailo o le faufautua fa’apitoa i le Faitauga o Amerika Samoa 2020. Ua galulue fa’atasi ai i latou ma le sifi sinia o le tatou Ofisa o Fa’amaumauga Fuainumera Meleisea Vai Filiga.