Tala I Vaifanua

ASIA DR F. FA’ATOAFE FANAU A’OGA ASCC I DIXIE & SOUTHERN UTAH UNIVERSITY

A’o i ai le tama’ita’i Faia’oga e fa’auluulu i ai Kosi Pisinisi a le tatou Kolisi Tu’ufa’atasi o Amerika Samoa, Dr Faofua Va’apu’u-Fa’atoafe, e fa’atautaia ana talavai i Utah, sa ia asia fanau a’oga i le Iunivesite o Dixie ma Southern Utah University.

Sa maua le feso’ota’iga ma alo o Amerika Samoa i le Dixie University ma faia le ‘aiga fa’atasi ma faia’oga ia Seteme 28, 2019.

“O se fiafiaga ia i matou ina ua va’aia Dr Fa’atoafe, matou te iloa lelei e le mafai ona le o’o mai e va’ai ma asiasi i matou poo a matou a’oga. Oka e pei o se mea fiafia ia i matou uma le auai mai, faia le matou aiga fiafia ma ia, ae fesiligia loa e ia ma le tulaga o matou a’oa’oga i le taimi nei,” o se tala ata lea a le tama’ita’i Elysha Lalau Yeng Tung.

“E ui ina mamao le nofoaga o i ai matou a’oga, ae ua fa’aalu e le matou faia’oga le 5-6 itula o tietie ta’avale mai ina ia feiloa’i ma i matou, ma toe fa’amalosi’au mai fo’i.”

Sa faasolo lana asiasiga i le Southern Utah University lea e a’o’oga ai Marilyn Thompson, Genesis Lagai, Kyrstene Lin, Samtara Atisano’e, ma isi tamaiti a’oga e le o tau’avea e i latou le kosi fa’apisinisi e aofia ai Louaivasa Laulu ma Monalisa Afoa.

“O i latou na e le’i mafai na tu ai le afioga le Faipule e feiloa’i i ai, ona sa faia le latou siva amata e fa’afeiloa’ia ai le fanau a’oga i lena aso tonu na asiasi mai ai si matou faia’oga.”

“Peitai, ia i matou uma i Dixie State University, na tapu’e o matou ata, ma fai le matou ‘aiga fiafia, ma talanoa fo’i e fa’ailoa atu matou fuafuaga ua fa’atulaga aua le lumana’i o le olaga tausaili i le atamai iinei.”

“I le matou ata e to’alua o i matou o aofia ai o le a fa’au’u ma fa’ailoga “Bachelor of Science in Accounting,” o i la’ua nei o Simaotua Tuia ma Maryjane Iosefo. O tamaiti uma lava o lo’o tauavea kosi fa’apisinisi i le matou ata lea o i latou na fa’au’u mai ia Tesema 2018 ma Iuni 2019, ma o lo’o mau tulaga lelei lava le taumafaiga i a’oa’oga. o lona uiga, o loo maua togi maualuluga, ma ua atili ai ona fa’afiafiaina i matou e fai meaa’oga ma taumafai atili ia ausia fa’ailoga ma togi maualuluga. Fa’afetai i le tapua’iga a nai o matou Matua ma Aiga, i a outou talosaga ma le tima’i mai.“

“Ua asia i matou e lo matou faia’oga ote ma le fa’amaliegata i se taumafaiga, o ia lea ua pei o se sui o matua ia i matou i a matou a’oga. Fa’afetai ua toe fa’amalosia atili o matou loto ina ia saili atili le atamai, maua fa’ailoga lelei, toe atu e tautua le malo ma o tatou tagata.”

“Fautuaina fo’i nisi o le fanau a’oga i le kolisi i lenei vaitau, fa’amalosi atu ina ia to’aga e saili le atamai ma ia ulufale mai i le matou Iunivesite, ona ua to’atele ane lava i matou o fanau a Samoa i lenei Iunivesite. Ua matele lava ina matou fesoasoani e fa’amautu fanau fa’ato’a ulufale mai, fa’amasani i latou i mea e ao ina fai ia fa’afaigofie ai ona nofolelei ma le mautinoa ma fai mea a’oga. E le taugata le matou Iunivesite. E taugofie fo’i fale e ono nonofo ai.”

O se fiafiaga ia i latou o alo o Amerika Samoa i Dixie State University pe afai o le a mafai ona o atu nisi o uso ma tuafafine mai le ASCC i le latou Iunivesite.

“Outou o matou uso ma tuafafine i a’oga maualuluga uma, fa’aaoga tatau le tatou Kolisi Tu’ufa’atasi, amata mai ai a’oa’oga iina, o lo’o tulaga lelei lava matou taumafaiga, e le o i ai se eseesega o sailiga iinei ma le tausailiga o le atamai iina. Ua tumau lava le maualuluga o matou togi, ma e fa’au’u fo’i ma le fiafia, pe a galulue fa’atasi uma i tatou o fanau a Samoa ina ia fa’aleleia tatou taumafaiga i a’oa’oga i’inei. A uma le Kolisi iina, fa’asolo mai mo fa’ailoga maualuluga iinei, ma fa’au’u atu ai e fa’afiafiaina ai o tatou matua ma aiga, ma aoga i le tatou malo ma ona tagata.”

“O matou matua peleina ma aiga, ia outou nofo tapua’ia o matou faiva, e leai se mea e faigata i le Atua, aua tou te popole, o lo’o nonofo ma le agaga fia mafuta ma outou, ae silisili ai, fa’atuatua i le Atua e au ai le sailiga a outou fanau uma i Dixie State University. Alofa’aga e le mavae mo outou matua pele ma aiga!”