Tala I Vaifanua

TATALA NOFO FA’ANOANOA AIGA UTU ABE MALAE - MEAALOFA MO KOVANA & ASPA:

I le sauniga mamalu sa fa’atautaia e le pa’ia o Aiga ma le Ekalesia Fa’apotopotoga Kerisiano i Amouli, i le afiafi o le aso Lua, na toe molimauina ai le alofa faivavale o aiga i le afioga le Sa’o, o le sa ta’ita’ia si o latou aiga, ae o se tasi fo’i e tu mati’e lana tautua i le afio’aga, Ekalesia ae maise le Malo o Amerika Samoa, le afioga Utu Abe Malae.

E lua nisi molimau na toe saunia, o le uso ia John Utu, ma le susuga le Foma’i John Tuitele, o se tausaga o le afioga le Sa’o ua malolo mai ti’asa.

“Ua atoa le tausaga talu ona tu’ua le mafutaga, ae moni a le popo’e o taofi mai le amataga, e le faigofie le savaliga a le pa’ia o aiga, talu mai ona tu’ua e ia le nofoa a le aiga. Ae mafanafana le loto ona o lea ua mautinoa, ua malolo o ia mai tiga, ua tapena fo’i e lona Matai lona malologa sili, o ona manuia fo’i lea i ana galuega sa fa’atino i le lalolagi nei a’o tatou mafutaga ma ia,” o se tala lea a John Utu.

Saunoa Tuitele sa ia toe misia alofa ai i lona tausoga, Sa latou ola fa’atasi ane ma e molimauina fo’i e ia le agava’a tele o lea taule’ale’a mai le talavou se’ia o’o ina tofia e aiga e fa’aea i suafa e tausia aiga. O fa’aeaga sa ia maua, aua e loto alofa ma fesoasoani i so’o se tasi e iloga mai e mana’omia le fesoasoani.

Ina ua mae’a ona tula’i lea o le tuafafine ia Elisapeta Malae mo le foa’i fa’apitoa a le aiga o ni measina sa tausia fa’apitoa e le afioga le Sao Utu Abe.

O le siapo sa la’eia e Utu Abe i le taimi o lana saofa’i ua foaia nei mo le pulega a le ASPA ina ia latou fa’aalia i lo latou Ofisa e autova’a atu i ai tagata uma e maimoaina ai, o se mea sili ua ia maua mo le Matagaluega sa ia galue ma fa’afoea ai mo tausaga e tele.

O le meaalofa lona lua o le Ietoga Mamae lava sa avea ma afuelo o le va’a o le faigamalaga a le afioga le Sa’o i ona toe taimi, lea ua foa’ia mo le afioga le Kovana Sili Lolo Moliga, aua o ia le ta’ita’i na muta i ai ma gase i ai lana afioga ma lana tautua.

Ina ua mae’a le sauniga i totonu o le Maota o le Atua ona soso’o lea ma le sauniga sa toe fa’apa’ia ai le fanua o lagomau faatasi i ai le afioga le Sa’o Utu Abe Malae ma ona tua’a na muamua atu ia te ia, i lumafale lea o le Malumalu EFKAS i Amouli lava.

Na ta’ita’ia uma nei sauniga e le afioga le Faife’au Toeaina Dr. Leitulagi Fa’alevao ma o le sao fo’i o le susuga Falefatu ma Rosita sa la’ua viia ai le Atua i le vi’iga fa’apitoa, “O lo’u Sao mo le Atua!”

O le aiga fiafia na talimalo ai mo e uma, o aiga ma uo mamae a le afoga le Sa’o sa fa’ai’u ai lea mafutaga fiafia i lea lava afiafi.