Manu’a le isi ae taofia i le Falepuipui le isi e mafua mai i se inugapia

O le inugapia sa faia i se fale o se tama’ita’i i Taputimu i le po o le aso Tofi o le vaiaso na te’a nei, na fa’ai’u puta lea fiafia ina ua loka e Leoleo le isi ali’i ma molia i le faaoolima, ae faanatinatu atu i Niu Sila le isi ali’i mo togafitiga ona o manu’a tuga sa aafia ai lona ao.

O le vaiaso na te’a nei na tula’i ai i luma o le Fa’amasinoga Faaitumalo le susuga a Simon Lagofa’atasi Milo mo lana ulua’i iloiloga, ma ua molia e o ia e le malo i le moliaga mamafa o le faaoolima i le tulaga lua, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe faasala fo’i i le salatupe e le sila i le $5,000, poo le fa’asala fo’i i faasalaga uma ia e lua.

E $10,000 le tupe lea ua faatulaga e le afioga i le alii faamasino ia Elvis P. Patea e tatala ai i tua ia Milo. Afai ae mafai ona tatala o ia i tua, ua poloaina o ia ina ia tausisi i tulafono a le malo, ma aua nei toe taumafai e sola i tua ma le atunu’u, pe taumafai foi e tuua le atunu’u se’i vagana ua faataga atu e le Fa’amasinoga.

E le mafai fo’i ona ia toe taumafai e faafesootai molimau a le malo e aofia ai ma le ali’ o lo o mau’a i lenei mataupu.

Ua tofu atu nei i le Faamasinoga Maualuga le mataupu a Milo, ina ua ia le manatu e faataunuu lana ulua’i iloiloga lea sa fuafua e faia i luma o le afioga i le alii Faamasino ia Patea e iloilo ai mau a le malo e lagolago ai le latou tagi.

Na teena e Milo le moliaga faasaga ia te ia ina ua tula’i i luma o le Faamasinoga Maualuga i le taeao ananafi. O lana ulua’i iloiloga lea ua faatulaga e faia i le masina fou.

TAGI A LE MALO

E pei ona taua e le malo i le latou tagi e fa’apea, pe tusa o le itula e 1:42 i le vaveao o le aso Faraile na te’a nei, na logoina loa e se ali’i le Ofisa o Leoleo, e fa’atatau i se ali’i o loo manu’a tigaina lona ao, lea ua momoli mai i se ta’avale mai Taputimu e aga’i atu i le Falema’i i Fagaalu, ma ua mana’omia se ta’avale Falema’i e fesoasoani i le momoliina mai o lea ali’i i le Falema’i.

O le ali’i ua manu’a lona ao, e 32 tausaga le matua mai Pago Pago, sa auai o ia i se inugapia sa faia i le fale o se tama’ita’i i Taputimu la te faigaluega fa’atasi.

O i latou sa i ai i lea inugapia e aofia ai le ali’i ua manu’a, o le tama’ita’i la te faigaluega fa’atasi e ana le fale, ma le isi ali’i e 30 tausaga, o le tausoga lea o le tama’ita’i e ana le fale.

Pe tusa o le itula e 3:28 i le vaveao o le aso Faraile lava lea, ae ulufale loa i le Ofisa o Leoleo i Tafuna le tama’ita’i e ana le fale sa faia ai le inugapia, mo le tuuina atu o lana fa’amatalaga i Leoleo e tusa ai o le faalavelave sa tula’i mai. O ia fo’i lea o le molimau autu a le malo e tusa ai o le fa’alavelave sa tula’i mai.

Na taua e le tama’ita’i lea i Leoleo e fa’apea, i le afiafi o le aso Tofi na te’a nei, na la aga’i atu ai ma lona tausoga ia Simon (le ua molia i lenei mataupu) e piki mai le ali’i na manu’a i lona fale i Pago Pago, mo le latou fiafia e faia i Taputimu.

Na latou toe fo’i i Taputimu i le afiafi lea o le aso Tofi ma amata loa le latou inugapia. Sa lelei mea uma i le taimi na amata ai le inugapia, sa leai fo’i se mea na faaletonu.

I se taimi o le po lea, na amata ai loa se taugaupu i le va o le tama’ita’i e ana le fale ma le ali’i na manu’a. O lea tauaga upu na amata o leo laiti, ae uma ane ua matua leo tetele lava le to’alua lea, ma ua ese fo’i le tulaga ua aga’i i ai le taugaupu.

Sa faalogologo pea Milo i le tauga upu ma ia maitauina ai le amata lea ona malolosi upu a le ali’i na manu’a ua lafo i ona tausoga tama’ita’i.

Na tula’i Milo ma aga’i i tua i le Faletaele mo sina taimi, ma toe fo’i mai ai loa ma se u’amea o loo uu mai i lona lima, ma savali mai ai loa ma ia ta le ulu o le ali’i ua manu’a ma palasi ai loa o ia i lalo.

Na faanatinati atu le ali’i na manua i le falema’i, ma taofia ai loa i le potu tigaina o le Intensive Care Unit (ICU) ona o le tulaga tuga i lona manu’a.

Na taua e le foma’i sa togafitia le ali’i na manua i Leoleo e faapea, o le tulaga matuia i le manua na aafia ai le ao o le alii na aafia, sa manaomia ai ni kilipi se 9 e faapipii ai le manu’a ina ia mafai ona toe tapuni.

Sa faanatinati atu foi i le falema’i i Niu Sila i le aso Faraile lava na te’a nei lenei ali’i, ona o lo’o manaomia o se togafitiga faanatinati i lona manu’a.

O se taimi o le taeao o le aso Faraile lava lea na pue faapagota ai loa e Leoleo ia  Milo ma auina atu ai loa i le Ofisa o Leoleo i Tafuna mo suesuega.

Na taua e Milo i Leoleo e faapea, ao faagasolo le inugapia, sa ia maitauina se taugaupu i le va o lona tausoga tama’ita’i ma le ali’i na manu’a. Na amata le tauga upu o leo laiti le to’alua lea, ae uma ane ua amata ona leoleoa, ma ua ia maitauina fo’i le ali’i na manu’a, ua ia lafo upu mamafa i lona tausoga tama’ita’i.

O lona popole ina ne’i tula’i mai se faalavelave, na mafua ai loa ona ia tula’i ai loa ma aga’i atu e fa’aaoga le Faletaele, ma ia toe fo’i mai ai loa ua uu mai i lona lima se fasi  uamea ma ia ta ina ai loa le ulu o le alii na manu’a.

Ina ua uma ona ia ta le ulu o le alii na manu’a, sa ia vaaia ua saofa’i o ia i luga o le nofoa, e lei umi ae ona vaaia loa ua pau i lalo, ma ua ia iloa atu fo’i le manu’a i lona ulu. O le taimi lea na faanatinati mai ai loa o ia i le falema’i.

Na taua atili e Milo i Leoleo e fa’apea, ina ua aveese mai le ali’i na manu’a, sa ia taumafai loa e saili le auala e aga’i atu ai i le Ofisa o Leoleo i Leone e logo i ai le faalavelave, peita’i o le faafitauli, na te le iloa le auala e aga’i atu i le Ofisa o Leoleo i Leone, ona o ia e fou mai i le atunu’u.

Ina ua malama le taeao, sa ia logoina loa lona tausoga tama’ita’i e ana le fale, ina ia logo le Ofisa o Leoleo e o atu e aumai o ia se’i fai sana faamatalaga e tusa ai o lea mea sa tupu.

O Milo e pei ona taua e le malo, sa fanau i Uosigitone i Amerika, o lo o malaga asiasi mai o ia i lona aiga i Amerika Samoa nei.

O loo taofia pea o ia i le toese e faatali ai taualumaga o lana mataupu. O le ali’i na manu’a, ua i ai nei o ia i Niu Sila mo togafitiga.