Tala I Vaifanua

FA'ALEAOGA SI'ITAGA TAUTUA OFISA O FEMALAGAIGA - TOE FA’AILOA MAI I SE TAIMI

O si'itaga o le tau o tautua a le Ofisa o Femalagaiga (Immigration) na fa'atulaga e amata ia Aukuso 1, ua fa'ailoa mai, ua toe taofia nei e le Loia Sili Talauega Eleasalo Ale, se ia o’o i se taimi o i luma.

Mai le lisi o mea e ao ina tapena pe fa'auia i le talosagaina o pemita e ulufale mai ai tagata mai nu'u ese i totonu o Amerika Samoa, e lua lava mea sa matua tele ai faitioga a nisi o sui o e Fono Faitulafono - o le ave'esea lea o le saini a le Matai po'o le Sa'o o le Aiga, ina ia talosagaina ai se pemita e malaga mai ai se tasi i totonu o le teritori.

Na faailoa mai ia Iuni 17 le saunoaga a Talauega fuafuaga mo le suiga o aiaiga i tulafono, ae maise le siitia o tau o tautua a le Immigration, ma e amata ona fa’amalosia ia Aukuso 1.

Peita'i i le vaiaso ua te'a, ua toe fa'ailoa mai e Talauega, ua fa'aleaogaina lena fa'asalalauga.

“O le mea ua ala ai ona taofia lea suiga o le totogi o tautua ona o aiaiga na o le tapenaga o pemita e ulufale mai ai tagata ese i le atunu'u. E tele na'ua tagata ua mae'a fia iloa patino aso ua fa'atulaga e le Ofisa o le Loia Sili ina ia talanoaina fa'alaua'itele ai nei suiga uma o totogi o tautua a le Ofisa o Femalaga'iga, fa'atatasi ai le si'itia fo'i o totogi o CI mo malaga a tagatanu'u moni o Amerika Samoa,” o se tala lea a le Loia Sili.

"O le a toe fa'alauiloa atu le isi aso o le a talanoaina ai fa'alaua'itele lea mataupu ma le mamalu lautele o le atunu'u, a'o le'i fa'amalosia lea si'itaga o totogi mo nei tautua."

O le aiaiga lea ua sili ona tetee ai finagalo fa'aalia o sui o le Fono ma nisi o le atunu’u o le aveesea lea o le Saini a Matai po'o Sa'o o Aiga, fa'atasi ai ma le Fa'aupega o le itumalo, pe afai o misia le Matai mai iinei, mai le talosagaina o pemita e ulufale mai ai tagata i totonu o le atunu'u.

Ua fa'aalia fo'i fa'asea a le atunu'u e tusa o le si'itaga o le totogi mo pemita e ulufale mai ai aumalaga a aiga po'o so'o ma nisi ekalesia i totonu o le atunu'u.  O le suiga nei, ua fa'atulaga ai le to'a 10-20 o tagata malaga mai e $200. a'o le aumalaga e 101 tagata e ulufale mai ai e o'o i le 200 tagata e na'o le $500, ae fa'aopoopo i ai le ta'i $5. i le tagata e tasi, pe a sili atu i le 200.

A'o le'i faia le malologa a le Fono Faitulafono i le aso 26 o Iulai, sa talosaga ia e nisi o senetoa se iloiloga e fesiligia ai lenei mataupu. Peitai e le’i fa’ataunu’u ma e le o iloa tonu le mafuaaga.

O Aukuso 19 e toe tauaofia ai le Fono Faitulafono.

MALAGA MAI SUI O NZ TALANOA AVANOA MO PISINISI I AMERIKA SAMOA

O se aumalaga mai Niu Sila sa oo mai i le amataga o lenei vaiaso mo se latou fa'atalanoaga ma le Matagaluega o Fefa'ataua'iga, ASPA, Star Kist Samoa, Chamber of Commerce, Port Administration ma le ASTCA ina ia mautinoa ua latou malamalama fo'i i mea uma e ono tapena i ai mo se latou malamalamaga i ni avanoa e fia fa'atutuina ai ni pisinisi e i latou i le tatou teritori nei.

O avanoa ua latou tapena i ai o ni pisinisi e fa'atautaia mai Niu Sila e o'o fo'i i Amerika Samoa ma e aoga mo malo uma e lua. O Niu Sila o le isi malo o lo'o tele fo'i ana oloa o lo'o fa'atau mai e Amerika Samoa.

O le aumalaga lea sa ta'ita'ia mai lea e le ali'i Taitaifono o le NZ Pacific Business Council, Peter McGill ma lana aumalaga e to'a ono.

Ua fa'ailoa mai fo'i o le isi latou malaga mai, o le a umi le taimi e faaalu e i latou e feutaga'i ai ma le fa'aululuga o le tatou Malo i ala fa'afaigofie atili ai ona fa'atutuina pisinisi so'ofa'atasi i le va o Amerika Samoa ma Niu SIla, ina ia tofu aoga i malo na lua le pisinisi o le a fa'atautaia.

Ua fa'ailoa fo'i e le tama'ita'i Sui Taitaifono o le American Samoa Chamber of Commerce, Luisa Kuaea, "O le aoga tele lea o le muamua feso'ota'i fa'apenei, ina ia mautinoa ua malamalama itu na lua i mea e ao ina faia, ina ia o'o atu i le taimi e fa'atino ai pisinisi ua malamalama mea uma ia i latou o feso'ota'i mai tautua e ala i fefaatauaiga."

TALIMALO AMERIKA SAMOA FONOTAGA LEOLEO AUKUSO 21-23

Puipuia atumotu ma malo o le Paseika mai fuala'au fa'asaina, o le sini lea o le fonotaga a  taitai o leoleo o motu o le Pasefika (Pacific Islands Chiefs of Police Conference - PICP) ia Aukuso 21-23 e faia i Amerika Samoa.

O le avanoa lelei lea o le a fefa'asoai ai  faamaumauga, fa'ailo o foliga mai o e ua a'afia i nei fa'afitauli, o a latou aga e ao ina mataituina e le lautele ona lipotia mai lea i Leoleo, atoa ai ma le taumafaiga ia fa'amalosia tulafono uma ua aga e taofia le toe tagofia e fanau talavou ma tagata uma o le atunu'u o fuala'au ma vaila'au fa'asaina.

O se fa'asalalauga ua fa'ao'o mai le Ofisa o le Failautusi  o le PICP ua fa’ailoa ai, "Ua matauina ua atili tele a'afiaga o tagata o atumotu o le Pasefika i le "aisa ma le Coccaine," ma o se fa'afitauli e ao ina galulue fa'atasi totino o le PICP.

"O le avanoa fo'i lea ua maua e ta'ita'i o Matagaluega o Leoleo i nei malo uma, e fefaasoa'i ai i fa'amaumauga, ae maise o le latou taumafaiga ia galulue fa'atasi e mataituina i latou ua ulufale mai i lea malo ma lea malo ma nei vaila'au ma fuala'au fa'asaina."

O sui tofia e fa'atautaia folasaga i lea fonotaga fa'apitoa o le a tatou talimalo ai, ua mautinoa o le a tula'i ma ni fa'asoa aoga tele mo i tatou fa'apea o isi pa'aga uma i totonu o le tatou atuvasa, aua ua matauina ua le fa'aitiitia lea fa'afitauli, ae ua aga'i ina fa'ateteleina lava.

O e o le a gasolo mai mo lea fonotaga taua e aofia ai ali'i Taitai Leoleo uma i faigamalo a atumotu e 21 o totino o le PICP. O le a i ai foi ma Kim Jong Yang, Peresetene o le Interpol ma Chief Paul Cell Peresetene o le International Assciation of Chiefs of Police.