Nofovaavaaia Tina na ta'usala umia faasolitulafono o fualaau fa'asaina

E 5 tausaga lea ua nofovaavaaia ai le Tina na ta'usala e le Fa'amasinoga Maualuga i moliaga o le umia fa'asolitulafono o fualaau fa'asaina.

O Titiula Tagaloa, lea na taofia i le toese i Tafuna mo le 16 masina, na tatalaina i tua i le aso Faraile na te'a nei, ina ua manatu le Fa'amasinoga e fa'aaoga le umi lea na taofia ai o ia i le toese e fai ma ana fa'asalaga i lenei mataupu.

O moliaga na ulua'i tu'uaia ai e le malo ia Tagaloa, e aofia ai le umia faasolitulafono o vaega o le pauta fa'asaina o le aisa ma le fa'amoemoe e tulei ma fa'atau atu i isi tagata; umia faasolitulafono o le pauta oona o le aisa; umia faasolitulafono o le laau fa'asaina o le mariuana ma le fa'amoemoe e tulei ma fa'atau atu i isi tagata, faapea ai ma le umia fa'asolitulafono o le laau fa'asaina o le mariuana.

Ae i lalo o se maliliega na sainia e le ua molia ma le malo, lea fo'i na talia e le Fa'amasinoga i le masina na te'a nei, na malie ai le malo latou te suia le mamafa o moliaga e tali ioe ai Tagaloa, e pei o le suia mai lea o le mamafa o le fa'asalaga fa'a falepuipui i le moliaga e tasi e le itiiti ifo i le 5 tausaga, ae tali ioe le ua molia i le moliaga e mafai ona fa'asala ai o ia i le falepuipui mo le umi e le sili atu i le 5 tausaga.

O moliaga e pei ona tali ioe i ai Tagaloa, o lona umia faasolitulafono lea o vaega o le pauta fa'asaina o le aisa, faapea ai ma le moliaga o lona umia fa'asolitulafono o le laau fa'asaina o le mariuana.

I le tali ioe ai o Tagaloa i moliaga, sa ia ta'utino ai e fa'apea, i se taimi o le masina o Setema 2017, sa ia umia fa'asolitulafono ai vaega o fualaau fa'asaina o le aisa ma le mariuana.

Ina ua maua le avanoa e finau ai mo se fa'asalaga mama mo Tagaloa, na talosagaina ai loa e le ali'i Loia Fautua lagolago ia Rob McNeill le Fa'amasinoga, ina ia talia le fautuagaa le Ofisa Faanofovaavaaia o loo i totonu o le latou Ripoti, ina ia fa'asala Tagaloa i se fa'asalaga faanofovaavaaia.

Na taua e McNeill e fa'apea, o Tagaloa, o se Tina talavou e to'a 3 ona alo, sa tautua fo'i o ia i vaega 'au a le malo tele o Amerika mo le 8 tausaga, a o le i toe taliu mai i le atunu'u e atia'e lona aiga.

Na fa'ailoa fo'i e McNeill i le Fa'amasinoga e fa'apea, o Tagaloa, o se Tina e lelei lona a'oa'oina, e talavou lona olaga, e i ai fo'i le avanoa e mafai ai ona suia o ia e avea ma tagatanu'u lelei i le lumana'i.

"Talu mai le 16 masina na taofia ai Tagaloa i le toese, ua ia a'oa'oina se lesona taua mo lona olaga, ua lagona fo'i lona salamo e tusa ai o lana solitulafono sa faia, ma ua ia manatu e talosaga i le fa'amasinoga mo se avanoa e toe fo'i ai i tua i lona aiga e tausi si ana fanau ma toe fuata'i se isi moemoe fou mo lona olaga," o le saunoaga lea a McNeill.

Na fa'ai'u le folasaga a McNeill i lona talosagaina lea o le Fa'amasinoga mo se fa'asalaga fa'anofovaavaaia, e aunoa ma le toe tuliina e Tagaloa o se isi fa'asalaga fa'a falepuipui i le toese, ae fa'aaoga loa masina ua mae'a ona ia tuliina i le toese e fai ma ana fa'asalaga i lenei mataupu.

Na lagolago e le loia a le malo ia Christy Dunn le talosaga a le itu tete'e mo se fa'asalaga fa'anofovaavaaia mo Tagaloa. Na faailoa e Dunn i le Fa'amasinoga e fa'apea, o se tasi o tuutuuga o lo o i totonu o le latou maliliega ma Tagaloa, o le talosaga lea o le malo mo se fa'asalaga faanofovaavaaia.

A o le i tuuina mai le fa'asalaga a le Fa'amasinoga, na toe fa'atepa e le Fa'amasinoga itu e lua aemaise ai le ua molia i mau faamaonia na sauni le malo e folasia i luma o le vaega iloilo iuga, pe ana faapea e filifili Tagaloa e fa'ataunu'u sona fa'amasinoga autu.

Na taua e le Fa'amasinoga e fa'apea, o le mataupu lenei na tofu atu i le Ofisa o Leoleo, ina ua fa'ailoa e ni isi o le atunu'u le a'afia o le ua molia ma se tasi o ali'i i le umia fa'asolitulafono o fualaau fa'asaina.

O le ali'i sa galulue fa'atasi ma Tagaloa o Pierce Suapilimai, lea fo'i o lo o molia e le malo i lona umia fa'asolitulafono o vaega o fualaau fa'asaina.

O vaega o fualaau fa'asaina na maua i le ua molia e pei ona taua e le Fa'amasinoga, na lava lea ma totoe e lagolagoina ai masalosaloga, o loo a'afia o ia i le tuleiina atu o fualaau fa'asaina i tagata.

Saunoa le afioga i le ali'i Fa'amasino Sili ia Michael Kruse e fa'apea, ua fa'amalieina le Fa'amasinoga i folasaga a itu e lua faapea ai ma le Ripoti a le Ofisa Faanofovaavaaia, e agava'a ona tuuina atu se fa'asalaga faanofovaavaaia mo Tagaloa.

E ta'i 5 tausaga e nofosala ai i le falepuipui mo le moliaga e tasi lea ua faasala ai e le faamasinoga le ua molia, faapea ai ma le salatupe e $5,000. Lona uiga, e 10 tausaga e nofosala ai Tagaloa i le falepuipui i Tafuna.

Ua faamalumalu e le Fa'amasinoga le tuliina o le fa'asalaga faa falepuipui, ae ua faanofovaavaaia ai Tagaloa mo le umi e 5 tausaga i lalo o tuutuuga e ao ona ia usita'i i ai.

O ni isi o ia tuutuuga e aofia ai lona tuliina o masina e 20 i le toese i Tafuna, e faitau ai ma le 16 masina lea na taofia ai o ia i le toese ao fa'atalitali ai se faaiuga o lana mataupu.

O le 4 masina o lo o totoe ai i le fa'asalaga fa'a falepuipui a Tagaloa, o le a taofi le tuliina mo le taimi nei, se'i vagana ua toe tuuina atu se isi poloaiga a le fa'amasinoga. Lona uiga, o le aso Faraile lava na te'a nei na tatala ai i tua Tagaloa ma le tuutuuga e saili sana galuega e galue tumau ai.

E le tatau ona ia toe tagofia le 'ava malosi poo fualaau fa'asaina, e le tatau ona ia toe solia se tulafono a le malo, e le tatau ona toe mafuta ma tagata o loo latou tagofia le 'ava malosi poo fualaau fa'asaina, e le tatau fo'i ona ia toe fa'afesootaia le ali'i na loka fa'atasi i laua e Leoleo, le susuga ia Suapilimai.

O le a faia ni suega i lona tino ina ia iloa ai o loo ia usitaia tuutuuga a le fa'amasinoga, ua fautuaina fo'i o ia e auai i ni aoaoga e fesoasoani ai i aafiaga o le 'ava malosi poo fualaau fa'asaina i lona olaga.

"Tagaloa, o le taimi lava e te solia ai se tuutuuga o tuutuuga uma nei ua avatu e le fa'amasinoga, ona e tuliina loa lea o tausaga e 5 i le toese i Tafuna," o le fautuaga lea a Kruse ia Tagaloa.