Nofovaavaaia le tama’ita’i na maua i ai le sikaleti mariuana e tasi

E 12 masina lea ua faanofovaavaaia ai e le Fa’amasinoga Maualuga le tama’ita’i na ta’usala i lona umia fa’asolitulafono o vaega o le laau fa’asaina o le mariuana, ina ua maua e Leoleo ia te ia se sikaleti mariuana se tasi ua uma ona taai i le tausaga na te’a nei.

E ui o lea ua nofovaavaaia le tama’ita’i o Grace Tagaloa, peita’i na fa’aalia manino e le afioga i le ali’i Fa’amasino Sili lagolago ia Fiti A. Suniai le taimi na lau ai le fa’asalaga a le ua molia i le vaiaso na te’a nei, le leai o se avanoa e sao mai ai se tasi e fa’amaonia i lona le usitaia o tulafono tau Fualaau Fa’asaina i totonu o Amerika Samoa.

Na faamanino e Sunia e fa’apea, tusa lava pe laititi se vaega o le fualaau fa’asaina e maua i se tagata, e pei o Tagaloa lea na maua i ai le sikaleti mariuana e tasi, o lo o manino le tulafono, e tatau lava i lea tagata ona fa’asala i le fa’asalaga faa falepuipui e le itiiti ifo i le 5 tausaga.

Saunoa Sunia e fa’apea, o le mamafa o le fa’asalaga o loo taoto i le solitulafono o le umia faasolitulafono o fualaau fa’asaina, ua atagia mai ai le matuia o lenei ituaiga solitulafono i Amerika Samoa.

Na taofia faa falepuipui mai lava Tagaloa talu mai le aso 3 o Fepuari 2019 na pu’e fa’apagota ai o ia e Leoleo e uiga i lenei mataupu. Ae ina ua talia e le Fa’amsinoga le maliliega na sainia e le molia ma le malo i le masina o Me na te’a nei, na faia ai loa le fa’aiuga a le Fa’amasinoga e tatala ai le ua molia i tua e aunoa ma se tupe e totogi, e fa’atali ai le aso e lau ai lana fa’asalaga.

O le vaiaso la na te’a nei na tula’i ai loa Tagaloa mo le tuuina atu o lana faasalaga e le Fa’amasinoga. O le tama’ita’i Loia Sili lagolago ia Christy Dunn na tula’i mo le malo, ae o le ali’i Loia Fautua mo tagata lautele ia Rob McNeill na tula’i mo Tagaloa.

Na ulua’i molia e le malo ia Tagaloa i le moliaga mamafa o le umia fa’asolitulafono o vaega o le laau fa’asaina o le mariuana, o se solitulafono e mafai ona fa’asala ai se tasi i le toese mo le umi e le itiiti ifo i le 5 tausaga ae le sili atu i le 10 tausaga, pe faasala fo’i i le salatupe e le itiiti ifo i le $5,000 ae le sili atu i le $20,000.

Ae i lalo o se maliliega na sainia e Tagaloa ma le malo, lea fo’i na talia e le Fa’amasinoga Maualuga, na malie ai le ua molia e tali ioe i le moliaga muamua na toe teuteu e le malo le mamafa o lona fa’asalaga, le moliaga o le umia faasolitulafono o le laau fa’asaina o le mariuana, lea e mafai ona fa’asala ai se tasi i le toese mo le umi e mafai ona oo atu i le 5 tausaga, poo le fa’asala i le salatupe e mafai ona oo atu i le $5,000, poo le fa’asala fo’i i fa’asalaga uma ia e lua.

I le tali ioe ai o Tagaloa i le moliaga e pei ona tu’uaia ai o ia e le malo, sa ia ta’utino ai e fa’apea, i se taimi o le aso 3 o Fepuari 2019 i Amerika Samoa, sa ia umia faasolitulafono ai se sikaleti mariuana ua uma ona taai. Na ta’utino atili le ua molia e fa’apea, o le sikaleti mariuana sa ia te ia, sa ia fa’amoemoe e fa’aaoga mo ia lava.

Ina ua maua le avanoa mai le fa’amasinoga, na fa’atoese ai loa Tagaloa e tusa ai o lana solitulafono sa faia, ma ia talosagaina ai se isi avanoa mo ia e toe fo’i atu ai i tua e tausi lona Tina. Sa ia taua fo’i i le fa’amasinoga lona ‘ona tele i le aso na tula’i mai ai le fa’alavelave, peita’i, e le avea lea tulaga ma alofaga o lana solitulafono sa faia.

Sa ia faafetaia le Fa’amasinoga ona o le avanoa na mafai ai ona taofia o ia i le falepuipui i Tafuna mo ni masina e tele, lea na mafai ai loa ona maua le avanoa e mafuta atu ai i polokalame a ni isi o Faalapotopotoga Faaleagaga e aofia ai Ekalesia, ma ua molimauina ai se suiga tele i lona olaga.

Na faaiu lana faamatalaga i lona talosagaina lea o le Fa’amasinoga mo se avanoa e mafai ai ona fa’aauau pea ona nofo i lona aiga e tausi lona Tina, ma saili se isi galuega e fesoasoani ai i le atina’eina o lona olaga.

Na talosaga lana loia fautua ia McNeill i le Fa’amasinoga mo se fa’asalaga faanofovaavaaia, ina ia mafai ai ona maua le avanoa o Tagaloa e auai atu ai i aoga fa’a faufautua e fesoasoani ai i le ‘ava malosi ma fualaau fa’asaina.

Na taua atili e McNeill e faapea, e 107 aso na taofia ai Tagaloa i le toese. I lea taimi atoa talu na taofia faapagota o ia e Leoleo, na mafua ai loa ona tuliesea o ia mai lana galuega sa galue ai i le Kamupani a le Bluesky.

E talitonu McNeill e pei ona ia fa’ailoa i le fa’amasinoga, le tele o se lesona ua mafai ona a’oa’oina e Tagaloa mai masina na nofo ai i totonu o le falepuipui. Ua ia manatu fo’i, o le a avea nei lesona taua ma auala e fesoasoani ai i le toe fuata’iina o se isi moemoe fou mo lona olaga.

Na lagolagoina e le loia a le malo ia Dunn le talosaga a McNeill mo se fa’asalaga faanofovaavaaia. Na taua e Dunne fa’apea, talu ai le laititi tele o le vaega o le laau fa’asaina o le mariuana na maua ia Tagaloa, e talitonu ai le malo, e alaga tatau ona faasala o ia i se fa’asalaga faanofovaavaaia, e aunoa ma le toe tuuina atu o se isi taimi na te tuliina i le toese, ae fa’aaoga aso e 107 lea ua mae’a ona ia tuliina e fai ma ana fa’asalaga i lenei mataupu.

A o le i tuuina mai le fa’aiuga a le Fa’amasinoga, na maua le avanoa e toe faatepa ai e le Fa’amasinoga itu e lua atoa ai ma le ua molia i mau fa’amaonia o lenei mataupu.

E tusa ai o faamaumauga a le Fa’amasinoga, o Tagaloa ma se isi ali’i na auina atu i le Ofisa o Leoleo i Tafuna mo suesuega, poo ai e ana le sikaleti mariuana lea na togi mai i fafo i le ta’avale la’u pasese sa la malaga ai.

Na taua e fa’apea, ao paka le taxi na malaga atu ai Tagaloa ma se ali’i i luma o le Ofisa o Leoleo i Tafuna, sa vaaia e se Leoleo se tama’i afifi ua togi mai e ese tagata i fafo mai le ta’avale. O lea afifi na togi mai i le pito na nofo ai le ali’i na malaga atu ma Tagaloa i le taxi.

Na siaki e le Leoleo le tama’i afifi na togi mai i fafo o le taxi ma iloa ai, o se sikaleti mariuana o lo o i ai lau mamago o le mariuana. Ina ua fesiligia Tagaloa ma le ali’i na la to’alua i totonu o le taxi e uiga i le sikaleti mariuana, sa tau tu’ua’i solo e le isi i le tasi.

Saunoa Sunia i le taimi na tuuina mai ai le faasalaga a Tagaloa e faapea, tusa lava pe laititi se vaega o le mariuana na maua ia Tagaloa, o lo o manino le tulafono, e mafai lava ona fa’asala o ia i le fa’asalaga mamafa e le itiiti ifo i le 5 tausaga i le falepuipui.

Sa ia taua atili fo’i e fa’apea, e leai se malosi o le Fa’amasinoga e sui ai le tulafono. Pau le galuega a le Fa’amasinoga e fai, “o le fa’amalosia lea o le Tulafono”.

E le gata fo’i i lea, na saunoa fo’i Sunia e fa’apea, o loo i ai fo’i i le fa’amasinoga le malosi e fa’asala ai se tasi i se fa’asalaga faa falepuipui e le itiiti ifo i le 5 tausaga, poo le fa’asala i se fa’asalaga faanofovaavaaia e mafai ona oo atu i le 5 tausaga.

O niisi o tuutuuga o le nofovaavaaia a Tagaloa e 12 masina, o lona tuliina lea o aso e 90 i le toese, ae o le a faitau ai aso e 107 lea ua mae’a ona ia tuliina. Ua poloaina fo’i o ia e totogi le salatupe e $5,000.

E le fa’atagaina ona ia toe tagofia le ‘ava malosi poo fualaau fa’asaina, o le a mafai fo’i ona faia ni suega i lona tino e faamaonia ai, na te le o toe tagofia fualaau fa’asaina.