Tala I Vaifanua

FA'ATUTU PISINISI ELEELE SA I AI LE PACIFIC PRODUCTS:

Ua fa'ailoa mai o le a va'aia ni pisinisi fou ua fa'atutuina i le eleele sa nofoia e le pisinisi a le "Pacific Products" mo tausaga e tele. O ia pisinisi e lua. O le eleele lea sa matua tele mana'oga o le A'oga Maualuga a Matata Eseese i Nuuuli, [Nuuuli Voctech High School] e fa'atuina ai se latou faleta'alo, ua fa'ailoa mai nei le fuafuaga a le Malo ua mae'a faia, o le a tu'uina lea i le Niu Group Inc. lea e fa'atautaia e Leilua Stevenson, e fa'atuina ai lana pisinisi o se faleoloa mo fefa'ataua'iga.

O le vaega o le eleele lea e tuaoi ma le ANZ ma le Samoa Motors i le isi ona itu, o le a avea lea e le Steven and Sons, lea e fa'atautaia e Steven ma Tai Shallout, ma ua fa'ailoa fo'i e fa'aaogaina mo se latou Faleoloa Si'i Atoa fa'atasi ai ma se latou Ofisa Tutotonu mo fefa'ataua'iga o oloa gaosi.

O lo ua mae'a pepa mo le lisi a le Island Image, lea e fa'atuataia e Terry Steffany, i le nofoaga lea sa fa'atuina muamua ai le Malama TV, lea fo'i e tuaoi ma le Samoa Motors i lona itu taumatau. Ua manatu o le a fa'atula'ia ai le faleoloa mo so'o se ituaiga o Lavalava Si'iatoa, ma o i'ina fo'i o le a avea ma se falesu'isu'i mo le saunia o la'ei o so'o se ituaiga.

E ui ina nei fa'atulagaga o le taumafaiga a le Malo ina ia fa'aleleia atili le tulaga o pisinisi i le atunu'u, ae maise o le fa'aleleia atili o le tamaoaiga o le atunu'u, ae o le fa'afesili ua tula'i mai i mafaufauga o le fanau a'oga uma i matata eseese i le a'oga maualuga a le Nuuuli VocTechnical High School, "Aisea e le manatu mai ai le Malo i se matou Faleta'alo? Lea ua amata o'o le fa'asologa i le a'oga tulaga muamua, e fausia latou faleta'alo, e o'o lava i Manu'a ua mae'a fausia le faletaalo, ae paga lea, ua loa fo'i tausaga o lenei a'oga, ua savalia le 50 tausaga, ae le toe manatu ise faleta'alo, a'o se malae ta'alo fo'i. O le tagi a le pu mate le fa'atoga na lafo i a'ai o finagalo o ta'ita'i o le malo i nei mau tausaga uma e tele!"

"Ae fa'afetai o lea ua a'e mai faiva ua leva ona tatali, ua 'asa fo'i lenei Laumua mai le fa'asoa."

FONOTAGA FA'ALAUA'ITELE MO SUIGA O PILI TOTOGI MO FEMALAGA'IGA:

Ua i ai nei le fa'atulagaga fou o fonotaga fa'alaua'itele e mafai ona o mai ai le mamalu lautele o le atunuu e fa'aalia o latou taofi, e tusa o le si'itaga fou ua mae'a fa'atulaga mai mo le Ofisa o Femalaga'iga ma latou tautua eseese. O lea vasega o si'itaga mo nisi o tautua a le Ofisa o Femalagaiga ua fa'atulaga mai e le Ofisa o le Loia Sili a le tatou Malo.

E to'atolu sui o le Ofisa o le Loia Sili sa auai ane i le fonotaga a le VASA e fa'amatala nei suiga uma. O i latou ia o le Loia SIli Talauega Eliasaro Ale, Sui Loia Sili Earl Mokoma ma le IT Ken Dalle.

Ua fa'ailoa mai fo'i popolega o faletalimalo fa'atasi ai ma Kamupani Vaalele o lo'o latou tautuaina i latou e tafafao mai, aua ua i ai nisi o i latou nei e asiasi mai ma ua le mafai ona toe taliu pe ulufale fo'i i le taotu Malo ona o aiaiga nei a le tatou Ofisa o Femalagaiga.

Ina ia le fa'ate'ia le tagata tafao mai fafo, ona ua le mua'i pasia atu lona fa'atagaga e ulufale ai, e ao ai ona mua'i fa'alauiloa fa'alaua'itele i luga o laina feso'ota'i ma le Ofisa o Femalaga'iga i Amerika Samoa nei mea uma. Ia mafolafola ma iloa lelei e i latou e fia ulufale mai e tafafao, a tatou tulafono ma totogi fo'i o feagai ma i latou.

Ua mana'omia e i latou ona fa'atumu o latou pemita e ulufale mai ai i laina o feso'ota'iga ma le lautele fegasoloa'i i luga o le initeneti. Ua i ai la le igoa fa'apitoa o lea laina feso'ota'i e fa'aigoaina o le "OK Board" po'o le "Fataga e Malaga Mai!"

O lea fa'atagaga ua mae'a fa'amalosia e le Kamupani Va'alele a le Hawaiian Air ma e i ai nisi o le atunu'u sa soifua a'e i le tatou nei malo, ua manatu e toe asiasi mai, ae ua te'ena e le Hawaiian Air le latou toe fo'i mai, o lo'o ua mafai nei ona feso'ota'i mai e ala i lea Emeli i luga o le Laina Tafa'ilagi a le Initeneti ina ia vave maua atu lana fa'atagaga lea e ulufale mai ai.

Ua mafai fo'i ona talosaga lou ulufale mai pe afai ua leai sou pemita ua mae'a saunia e se tasi i le tatou Malo nei, pe afai e te talosagaina i laina feso'ota'i nei a le Initeneti, ae a fa'ataga atu e te ulufale mai i Amerika Samoa, e tatau ona vave va'aia lava le Ofisa o Femalagaiga i le aso faigaluega e soso'o ma le aso ua e tulaueleele ai, ina ia tapena ua mautu lou nofo ai i Amerika Samoa ma ia e usita'ia.

Ua i ai tulafono ua fa'asa ona ulufale mai se'i vagana ua mae'a tapena sou pemita, ae ua i ai fo'i malo ua fa'ataga ona ulufale mai e aunoa ma se pemita, ma ua i ai le lisi o nei malo i luga o laina feso'ota'i tafa'ilagi, e fa'amanatu i tagata uma e fia ulufale tafafao mai.

Ua mae'a fo'i ona fa'aleleia atili le polokalama feso'ota'i a le Ofisa o Femalaga'iga ma le Malae Va'alele ma le Uafu tele fo'i i Fagatogo ina ia fa'afaigofie le so'otaga lea mo galuega ale aufaigaluega a le Ofisa o Femalagaiga i e tautuaina i latou uma e fia ulufale mai ma tu'ua fo'i le atunu'u.

O le Upega tafa'ilagi a le Ofisa o le Loia sili e maua ai nei suiga o le legalaffairs.as .gov

$20,000. FOA'I A LE MALO AM SAMOA I AU TA'A'ALO ASNOC.

E $20,000. le aotelega o le tinoitupe ua taua'aoina atu e le Malo o Amerika Samoa i le Komiti a le ASNOC mo ta'aloga a le Pasefika 2019 lea e malaga atu ai i latou i Apia, Samoa.

Na talia ma le fiafia lea aotelega o le seleni mai le Faigamalo e le susuga le Peresetene o le ASNOC  Ed Imo, ma sa ia fa'ailoa fo'i le agaga fa'afetai ona o le taumafai mai o le Malo e fa'atino le latou fo'i pito la'au o le sapaia lea o se taumafaiga a le Fanau talavou e ala i fa'agatama fa'avaomalo o lo'o masi'i atu ai.

 O le susuga le Sui Kovana Lemanu Peleti Mauga sa ia fa'atinoa lea faiva matagofie mo le fa'amoemoe o le Komiti a le ASNOC, peita'i o le tau atoa o le Nonofo ai ma le Tausiga lelei o tama ma teine ta'a'alo a le tatou malo o le a masi'i atu e $90,000. O lo ua fa'ailoa atu fo'i o le a avatu ma le Va'a o le MV Manu'atele ina ia ave ai le 'au ta'a'alo mo Apia, peta'i o lo'o tatalia pea le fa'atagaga o le faigamalaga pe mafai ona ulufale atu le MV Manu'atele ma lana pasese o 'au ta'a'alo i le Taulaga i Samoa.

O le USCoast Guard lea latou te mana'omia mai se fa'atagaga mo le malaga atu fo'i o le va'a lenei i Samoa ma lana pasese o tama ma teine ta'a'alo ma latou fa'atonu ma faia'oga. Ua iloga le tele o ala ua saili tupe ai le tele o Asosi o Ta'aloga eseese a le tatou Malo ina ia mafai ona totogia nisi o tupe fa'aalu mo le masi'i atu i Samoa, ma ua va'aia fo'i le saunia o aisiga e ala i Uilipaelo ma Radiothon ma tusi aisi.

Ua mae'a fo'i le latou siva tele sa faia lea i le Maliu Mai i le fa'aiuga o le vaiaso na te'a nei.