Tala I Vaifanua

KONESETI A LE KATINAS - FEAU TAUA O LE ALOFA

Ua toe fa'asolo mai nei fo'i le Koneseti o Pesega Fa'a-Evagelia a le Katina Brothers, o se tasi o Fa'aili a tama fanau a Amerika Samoa ua silia ma le 40 tausaga talu ona latou pepese ma faia a latou Koneseti i Amerika fa'apea fo'i ma i tatou nei.

O le susuga le Faife'au Mose Katina ma le faletua na galulue i le AOG Pago Pago lea sa matele ina tuu o mai ai le fanau e fa'atino iinei a latou Koneseti mai le amataga lava. Peita'i i lenei tausaga, ua toe malaga mai le Katinas e to'a 32 i latou ua auai i le au fa'afiafia atoa, e ala i vi'iga e fa'ailoa ai le "Taua o le Alofa o le Atua."

Ua mae'a faia ni a latou koneseti ASCC, fa'apea nofoga a le DYWA i le po o le Aso Lulu, soso’o ai i le po anapo i le fale ta’alo i Kanana Fou Gym. O le konekesti mulimuli o le afiafi nei i Kanana Fou Gym ma e leai se totogi e ulufale ai.

Fa’aalia e James Katina, "Po'o fea lava e aga'i i ai le toloa, e toe ma'au mai lava i le vai na ola a'e ai, lea ua toe fo'i mai lava, e fa'asoa se taleni, ma fa'afiafia atili le tupulaga o si o tatou atunu'u pele o Amerika Samoa, na fa'afailele ai le olaga talavou ma fa'amalosia ai le ola fiafia i pesega ma vi'iga o le Atua."

ELDER O. VINCENT HALECK - FA’AFETAIA TULAI MAI PERESETENE PASEFIKA LDS

O Elder O. Vincent Haleck, Peresetene o le Ekalesia LDS i le vasa pasefika,  ma lona faletua Peggy Haleck, na faia le la'ua fa'amavaega ia Iuni 11, mai lea tofiga, fa'apea fo'i ma i latou fo'i sa latou galulue fa'atasi, o ali'i ma tama'ita'i Ofisa ma misiona galulue mo le taimi sa la'ua tau'avea ai lea tofi.

O lea sauniga sa fa'atinoa lea i Aukilani Niu Sila, ma ua fa'ailoa atu fo'i e Elder Haleck ma le faletua le tele fo'i o mea ua a'otauina ai i la'ua i le galuega talu mai ona la'ua tula'i mai i le ono tausaga ua tuana'i nei.

Ua i ai mea e lu'ia ai le ola fa'atuatua, a'o nisi fo'i mea ua va'aia le tele o fa'amanuiaga a le Atua mo i la'ua i le galuega, ona ua mafai ona fa'atino nisi o mana'oga tupito a'o la'ua taumafai e fa'atino nisi o auaunaga ua fa'aofi mai mo tagata lautele i malo fa'aatumotu o le Pasefika.

Saunoa fa'apitoa Peggy Haleck i le malosi o le Ekalesia e galulue fa'atasi e fa'atino galuega lelei mo isi o lo'o i ai le mana'omia. Ua mafai fo'i ona faia mai se asiasiga fa'apitoa a le afioga le Peresetene Russell M. Nelson i lona fo'i vaitaimi o la'ua tula'i i lenei tofiga. Peita'i, o se fe'au taua tele ia Mrs Haleck mai lea malaga ta'amilo a le Peresetene Nelson, o le tima'iga lea, "Ia nofo sauni i le toe afio mai o le Fa'aola."

O le tautinoga a Elder Haleck o le mau tau'ave a le Ekalesia, "Ia galulue fa'atasi, e faigofie ai ona mafaia ai mea tetele, o i tatou uma lava o auauna a le Atua!"

O sana tala fo'i e tusa o le taimi a'o feoa'i fa'atasi ai i le malaga mai a Peretene Nelson, sa ia fa'ailoa ai, "E matua fiafia e faalogo i le malu o le Perofeta, e vaivai ae ivia le fe'au e saunoa i ai, o le leoitiiti e sau ma le filemu."

I le taimi nei, o lo ua toe o ni nai aso ona mae'a lea o le la'ua tautua ia Iulai 2019, na fa'ato'a tu'ua lea e i la'ua o Aukilani Niu Sila ae taliu mai i Amerika Samoa.

FA'ATA'ITA'I ALA MATAITUINA FAAUIA MAI FUALA'AU & VAILA'AU FA'ASAINA:

I se lipoti mai Samoa o lo’o fa’ailoa ai e fa’apea, na talanoaina le fa'afitauli tau fuala'au fa'asaina ma vaila'au o'ona lea e fefa'ataua'i i Amerika Samoa nei, ua a'afia atu ai ma Samoa i le tauaofiaga a le Palemene o Samoa i le vaiaso na te'a.

Saunoa le Faipule o Lealailepule Rimoni Aifi, ua tatau fo'i ona fa'atulaga e Samoa ni a latou maile sosogi K9 i le malae va'alele ma le Uafu faapea fo'i ma masini va'ai fa'apitoa ai pusa oloa tetele pe le o afifi mai ai fo'i ni fuala'au fa'asaina i oloa o lo'o la'u mai mo faleoloa tetele.

Na ia fa'aalia, e le'i mamao atu na maua ai fo'i le tele o afifi o vaila'au fa'asaina ua aumaia i pusa meli ma o le tau pe a fa'atauina i Amerika Samoa o lena meli e $1.3miliona.

“O lo ua matua mafuli lava le Malo o Amerika Samoa e taumafai ia maua uma le tele o fuala'au fa'asaina ma vaila'au o'ona o lo ua fa'aulufale atu i latou malo, peita'i e le o taumafai i tatou i lenei itu, e faia fo'i se tatou galuega tele i lea itu o mea fa'aletonu e a'afia ai le soifua laulelei o le mamalu lautele o le atunu'u.”

Ua ese la le ala ua fa'ailoa mai e le ali'i Minisita o Lafoga a le Malo o Samoa, ua aga atu i latou e fa'atauina mai se Ropati Maile Sosogi, ma o le a fa'atuina lea i so'o se malae va'alele ma uafu i taimi e kilia ai va'a ma ato a i latou e femalaga'i. O lea Ropati o lo'o okaina i Saina. Peita'i o le totogi o lea Ropati Maile Sosogi e $600,000, peita'i e leai se vaega tupe fa'apea o fa'aagaaga a le malo mo lea fa'atauga, ia taumafai fo'i la lana vaega e fa'atalanoa se fesoasoani mai a le Malo o Saina i le tau o lea Ropati Maile Sosogi.

Ua fa'ailoa fo'i e le o faigata lava i le taimi nei ona fa'auia atu fuala'au fa'asaina ma vaila'au o'ona mai Amerika Samoa aua e le'i i ai se gaoioiga ua faia i le malaeva'alele ma le Uafu e mafia ai ona maua nisi o lo'o ulufale mai ma ni mea ile atunu'u.

Ua fa'ailoa e Tialavea, "Afai a e te tulimata'ia le tele o tala fa'asalalau mai i tulaga o fa'atauga ma osofa'iga a leoleo ua maua ai le 'aisa ma le coccaine i Amerika Samoa, e tatau lava ona tatou lua la'a e muamua ai i le tatou usoga i lea ituaiga o faafitauli, ma tatou taumafai e puipuimalu mai i tatou i le o'o fo'i i lea tulaga."

"E le o gata i lea, ae ua i ai lava se isi va'a na malaga mai Amerika Samoa, o'o mai e avatu se ali'i Inisinia mai le tatou malo e lipea a latou va'a, ae ua maua atu ai ma le pusa e tumu i tupe, e silia ma le $10,000 le tinoitupe ua avatu ai. O le fesili, o a nei ituaiga o tinoitupe ua avea fa'apea mai le tatou malo i Amerika Samoa i ana fa'anana ma solitulafono. E afua nei mea uma, ona o lo'o fa'ataua fo'i ni mea fa'asolitulafono."