Tala I Vaifanua: 3 Vaiaso Loka Mau le Falepuipui o Tama'ita'i i le TCF

E o'o mai i le aso Faraile ua te'a, sa loka ai le Falepuipui o Tama'ita'i i le Toese i Tafuna, ma sa fa'ailoa mai e nisi o aiga o nei tama'ta'i, "O le leaga aua ua le toe mafai ai ona asia e i latou nai a latou pelega o lo'o nofosala."

I se fa'amatalaga a le tina sa vala'au mai ma le tagi, sa ia fa'ailoa ai, "E moni lava o lo'o nofosala si a'u tama, ae le fa'apea o le a matou le asia ai i latou. O le sala ua tulia, ua matou talia. Ae aisea ea e toe fa'ae'e atu ai le isi mamafa tu i o latou ulu, ae o lo'o nofoia fo'i e i latou nofoaga o sala e le fia nofo ai se tasi? A'o matou asiga fo'i mo i latou i vaiaso ta'itasi, e fa'aoso ai so latou fiafia ina ia vave uma nei faasalaga ae o mai i tua."

Sa fesiligia le tina, pe na fai mai e a le vasega o leoleo o le TCF pe aisea ua loka ai le itu a tama'ita'i? Tali lea tina, "Se na'o le pau le tala, o le fa'atonuga a le Komesina, loka le itu a tama'ita'i se'i faia suesuega mo le tama'ita'i leoleo ta'ita'i sifi i le itu a tama'ita'i."

O le tala mai e le iloa po'o le a le umi e loka ai. "Ona o lea e le'i fa'atali lava lenei aiga, e asiasi atu pea, e avatu nai fa'amomoli laiti o mea e fa'aaoga i taimi uma. E tusa pe ua leaga le amio i lea taimi ua mafua ai ona loka, a'o le tina lava latou e le uma le alofa i lana tama na fanau. A leaga fo'i e taumafai atili ina ia toe lelei le amio."

Ona ua loka le itu a tama'ita'i i le Toese, e le toe mafai fo'i ona asia i latou, e le toe mafai ona o mai i fafo nai tama'ita'i mo sina malologa ma ta'aloga e pei ona masani ai.

Peita'i o le fa'aiuga loa o le vaiaso na te'a, ua fa'afetaia e i latou, ua toe tatala ai mo asiga, ma ua fa'ailoa mai fo'i e leai tina, "E le o afaina le auaunaga a le ta'ita'i leoleo mo Tamaitai, ua fa'afetaia le toe tatala o nei avanoa lelei mo nai a latou fanau, e asia lelei ai.

E LE TAUTUAINA FALETINEI AFI MALAEVA'ALELE I OFU MU I OFU & OLOSEGA

Ina ua lipotia le mu i le Fa'ato'aga o Panele mo le sapalai o le Eletise i Ofu, Manu’a, sa fa'ailoa mai ai e nei tala, ua leai se ta'avale tinei afi i Ofu ma e leai foi se taavale tinei afi a le Matagaluega o Uafu ma Malae Va’alele i le vaega tinei afi i le malae va’alele i Ofu e fesoasoani i le tineia o le afi.

E pei ona lipotia e le Samoa News o le afi sa molimauina e le afioga Faipule Tioali'i Sia, faipule mo Manu'a #2. O ia lea sa avea ma se tasi o i latou na taumafai e fa'ape le mu i le aoauli o le aso Faraile ua te’a.

Ona o le taua o le vaega tinei afi i le malae va’alele i Ofu e leai se ta’avale tinei afi, o lea ua fa'ailoa mai ai e le sui fa'atonu o le Matagaluega o Uafu ma Malaeva’alele a le tatou malo, Chris King, "E le o se matata lea e ao ina fa'amoemoe e faia e le Fale Tinei Afi a le Malaeva'alele i Ofu, o le galuega lena e ao ina fai lava e le vaega a le tineiafi a le Malo, le Ofisa o Leoleo i le vaega a le tinei afi. O le Malaeva'alele latou e faia le tautua mo taimi uma e tulaueleele atu ai va'alele ina ne'i tutupu ni fa'alavelave fa'afuase'i."

E moni e le o i ai se ta'avale tinei afi i le taimi nei i le Ofisa Tinei Afi i Ofu, "Peita'i o lo'o ua i ai suiga fou ua fa'atulaga ina ia tineia ai se mu e ono tupu pe afai e tulaueleele pe masi'i ese mai se va'alele. O lea faiga fou e ala ona fa'atulaga, mo le taimi lea ua aumaia ai le ta'avale tinei mu e lipea ma toe fa'aleleia totoga ua leaga. O lea galuega toe fa'aleleia o le ta'avle tinei mu, pe fa'ato'a mae'a i le isi 3 i le 4 vaiaso, ona fa'ato'a ave lea o lea ta'avale i le va'a mo Ofu."

Ua fa'ailoa fo'i e King, "Afai o le a avea le ta'avale tinei afi ma le aufaigaluega a le Tinei Afi a le Malaeva'alele i Ofu ma i latou e tautuaina le mamalu lautele o aiga ma isi vaega o le Malo pe afai e sasao ai se afi, o le a tu'ua e le Tinei Afi a le Malae Va'alele le latou galuea lautogia fa'aletulafono o Malaeva'alele. O se mea e le tatau lena."

Ina ua fesiligia le vaega a le ASPA i le aso ananafi, i se tulaga ua a'afia o le Nofoaga o Panele i Ofu Manu'a, pe mata o toe fa'aaogaina e tautua ai le mamalu o e uma o alaala i Ofu, Sili ma Olosega, ae fa'ailoa ai e le sui mai le Ofisa autu i Tafuna, "O lo'o fa'aauau lava ona fa'aaoga le Nofoaga o Panele i Ofu. O le mu fo'i sa sasao e le afaina tele ai le nofoaga, ma ua mae'a fo'i ona toe tineia le afi ma fa'aleleia mea sa fa'aleagaina."

TALIA ALI'I I SAMOA MOLIGA FA'AMALOSI TAMA'ITA'I TURISI AUSETALIA

I se lipoti mai Samoa, o lo’o fa’ailoa ai ua taliaina e le ali’i lona moliga o le fa'amalosi tama'ita'i, lea sa tu'ua'ia ai o ia ia Novema 2018. O lenei ali'i e 30 tausaga o lona matua, ma o se tama'ita'i turisi Ausetalia lea sa ia fa'amalosia, a'o tafao mai lea tama'ita'i i Samoa.

O Terry Fa'atai, na ia fa'amalosia lea tama'ita'i a'o nofo o ia i se tasi o faletalimalo i Samoa i le vaitaimi tonu o masina fa'aiu o le tausaga ua te'a. Ina ua talia e le ali'i lenei lona moliga i lana loia sa tutula'i mo ia, Tuala Joe Ponafasio, na faia loa le fa'aiuga a le fa'amasinoga mo Terry Fa'atai.

Ua le mafai ona fa'alauiloa le suafa o lenei tama'ita'i Ausetalia ona o se maliliega ua mae'a fa'amalosia fa'aletulafono i le va o le tama'ita'i na 'a'afia ma le vaega o Fa'amasinoga.

Na faamalosia e le fa'amasinoga Fa'atai ina ia faia lana fa'atoesega i le tama'ita'i a i luma o le fa'amasinoga, lea na ia fa'aleo ai lona agaga fa'afetai mo le tama'ita'i i lona loto fa'amagalo ia te ia. E ese mai lea ua ia fa'ailoa atu fo'i lona agaga salamo i lana sala ua faia i lo la'ua va. Na talosaga o ia e alofa le tama'ita'i ma fa'amagalo ia te ia.

Ua fa'aauau pea ona taofia  Fa'atai i le falepuipui e fa'atalia ai le aso e lauina ai lona fa'asalaga, ae ua tu'ua nei e le tama'ita'i Ausetalia ia Samoa.