Tala I Vaifanua

FAIA FONOTAGA AUFAI FA'ATO'AGA - SAOGALEMU LELEI O MEA'AI

O le sui mai le Matagaluega o Fa'ato'aga a Hawaii ua auai mai ma faia a'oa'oga fa'apitoa mo faifa'ato'aga a le atunu'u e fa'atatau i le "Saogalemu o Mea Taumafa!"

Sa fiafia o faifa'ato'aga e auai i lenei semina aoga tele, aua o le to'atele o i latou o lo'o latou sapalaia le polokalama o Me'ai a le Fanau A'oga (SLP) a le Matagaluega o A'oga.

O le vaiaso ua te'a sa fa'atautaia ai nei vasega fa'aitoa e le tama'ita'i o Luisa Castro, ma o le taimi muamua lenei ua fa'atulaga mai ai e le AS Food & Drug Administration, ina ia faia lea ituaiga o aoaoga fa'apitoa ma e ao ina auai le au faifa'ato'aga ina ia malamalama lelei i le suiga ua i ai i tulafono poo aiaiga, o le mautinoa lea ua saogalemu le fofoga taumafa o le atunu'u, ae maise i le Polokalama o Mea'ai a le fanau Aoga i le tatou atunu'u.

Ua aofia i lenei suiga le tulaga o le saogalemu o fofoga taumafa i lona totoina, fela'ua'iga ae le'i fa'avelaina, mea taumafa ua mae'a fa'avela, mea taumafa tu'u apa pe tu'u pepa ma sauni e fa'atau atu po'o le laulauina loa mo le fofoga taumafa o le mamalu lautele.

Sa auai mai lea tama'ita'i mai Hawaii ina ia fesoasoani i le Matagaluega o Fa'ato'aga a Amerika Samoa ma le ASCC Land Grant e fa'amatala auiliili le aiaiga lea tau le Saogalemu O Mea Taumafa i le atunu'u, ae maise lava i le vaega atoa o faifa'ato'aga lea e sapalaia le Polokalama o Mea'ai a le Fanau A'oga, Mea Taumafa a le Falema'i LBJ Med Center, Faleoloa ma Fale'aiga.

I aso na fa'atino ai a'oa'oga nei mo le au faifa'ato'aga na va'aia le fa'atumulia lelei o le Potu fono o le Matagaluega o Fa'ato'aga i Tafuna ona ua sau soli le aufai fa'ato'aga e tufi taufao lea fo'i silafia ia mautu lelei ae le tautuaina o fale'aiga, SLP ma le falema'i.

E lua aso na fa'atautaia ai lea a'oga i le vaiaso ua te'a, peita'i na fa'ailoa e Castro, "Na taumafai ia ofi uma le a'oa'oga fa'apitoa lenei i le lua aso, fa'afetai ua mae'a lelei i lea taimi atofa."

STRATUS SILVER LINING INC. - FAIA AOGA FANAU ASCC:

Ua i ai nei le Kamupani mai Silicon Valley i Kalefonia i le tatou atunu'u, le ali'i CEO Dr. Alok Sharma, o ia fo'i lea na ia amatalia lea Kamupani, Stratus Silver Lining Inc. e amatalia ni vasega fa'apitoa i a'oa'oga fa'afeso'ota'iga ma fa'amaumauga ina ia mafai ona fa'aleleia atili tomai o le fanau o mana'omia ona a'otauina mo lea faiva.

Ua fa'ailoa mai, e 2000 ni avanoa ua mafai ona fa'atautaia a'oa'oga faapitoa mo lea tomai, ae a mae'a loa ona maua tusi pasi fa'apitoa nei mo fanau ia, o le a mafai loa ona latou faia galuega nei o le fa'amaumau numera ma fa'amaumauga e aoga tele i so'o se ituaiga galuega e fia atina'e i le teritori, i pisinisi po'o matagaluega eseese o le Malo.

O le malaga mai o lenei Kamupani, o se taumafaiga lea a le Teugatupe o le Litaea o Tagata Faigaluega a le malo, ina ia mafai ona fa'atosina atu i nisi e latou te fa'aaogaina ai le Hawaiki Cable, ina ia mafai ona maua ai tupe fa'asili e toe fa'aolaola atili ai le teugatupe o le Litaea.

Ua mae'a inivesi e le teugatupe a le Litaea o tagata faigaluega a le Malo le $20miliona i le Hawaiki Cable. Lea ua fa'apa'aga ai nei le Stratus Silver Lining Inc. ma le ASCC ina ia mafai ona ona a'oa'oina lea kosi i le tatou Kolisi ma e amatalia ia Seteme 1, 2019. O le a a'oa'oina lava le fanau ina ia mafai ona latou tau'avea muamua ni kosi i kamupani ua mae'a fa'atulaia i totonu o le tatou atunu'u.

I le mae'a ai o nei kosi o le a faia i le Kolisi Tu'ufa'atasi, ua fa'ailoa mai o le a feso'ota'ia fo'i e pa'aga o lo'o feso'ota'i nei ma le Teugatupe o le Litaea o Tagata Faigaluega, o i latou na o le a latou o'o mai e fa'atula'ia se latou Kamupani iinei, ina ia fa'afaigaluega ai uma i latou ua pasi mai lea kosi, ma latou galulue ai iinei poo ni avanoa fo'i i fafo.

Ua iloga mai o le a i ai fo'i ma ni avanoa e totogia ai i latou ae faigaluega ma a'oga. O le totogi o le Kosi lea e $500. ae amata le vasega i le to'a 500 tamaiti mo le ulua'i tausaga lenei. E le o toe mamao ae amata fa'asalalau loa avanoa nei mo lea kosi. E tatau ona mae'a le Level 12 e i latou o le a auai ma e i ai lava lana ia Laptop ma o se tasi na soifua a'e i Amerika Samoa po'o Amerika.

AMATA SUESU'EA O LE ELEELE FALEFONO - KAMUPANI MAI NZ :

Ua amata nei ona faia suesuega tau le eleele o lo'o ua fa'atuina ai le tatou Falefono lea o lo'o taofia pea, e le Kamupani mai Niu Sila, le Tonkin & Taylor.

Ua mae'a malie le Malo o Amerika Samoa o le a fausia le falefono e fa'aaogaina ai le ituaiga fausaga lea e mana'omia na pasia ai e le FEMA. Afai e le mafai ona pasia lea ituaiga o fausaga o le fa'avae, ua le mafai ona fa'aaogaina ai tupe a le FEMA mo lea galuega tele.

E lima pu e elia, peita'i o ni fa'amaumauga mai le lua o nei pu, o le a avea ma vaega o se suesuega faia e iloa ai le maualuga o le fa'avae poo le aotelega o folasaga mo le fa'avae mo le galuega o le falefono fou.

O le ali'i Inisinia AJ Marisol o le Paramount Builders, o le Kamupani lea o lo'o fa'akonekarate mo le galuega o le falefono, na ia fa'ailoa mai e 120 futu le loloto o pu na elia muamua e lua, ma ua ia mautinoa fo'i e latalata i le 200 futu le loloto o isi pu o le a toe elia pe a o'o ina faia su'ega mo le eleele e latalata lava i le sami i lea nofoaga o le a fa'atu ai le falefono.

O le Kamupani mai Ueligitone NZ, le Tonkin & Taylor, o i latou lea na aumaia le latou masini eli pu lea e fa'aaogaina fa'apitoa mo lea galuega ma e to'alua fo'i i la'ua o lo'o la'ua faia lea galuega na malaga mai faatasi ma le latou Inisinia fa'apitoa o galuega tau eleele mo lea fa'amoemoe.

Ua fa'ailoa mai e mae'a le galuega lea mo le fa'amaopopoina o fa'amaumauga tau lea eleele ia Iuni 19, 2019. O le a auina atu i Niu Sila nei suesuega o le ituaiga o eleele e fa'atuina ai le falefono ma fa'amautu ai loa le aotelega o le folasaga o le fa'avae o le tatou falefono fou.

Ua fa'ailoa mai, e tauau lava e toe amatalia le fausaga o le falefono fou i le masina o Oketopa 2019 pe afai e talafeagai fuafuaga uma nei.