Aloaia tautua faiaoga a le World Teach i le fa’auuga a Manu’a High

I le fa’au’uga a le A'oga Maualuluga a Manu’a, le laumua o le Segaula, sa faia i le aso Faraile o le vaiaso ua te’a, sa aloaia ai le tautua a faiaoga mai le World Teach, ma fa’ailoa ai foi le litaea o le pule aoga o lo’o i ai nei.

FA'AFETAI FA'APITOA FAIA'OGA MAI "WORLD TEACH"

I le saunoga a le Faatonu o Aoga a le malo, Dr. Ruth Matagi-Tofiga, sa i ai se vaega tele o lana saunoaga sa ia fa'afetaia ai le sao ma le gapatia fo'i o le vasega o faia'oga a le World Teach, lea e fiafia tele faia'oga e galulue i le Manu'atele.

"Se'i tula'i uma ane lava i luga faia'oga o le World Teach lea e galulue i le Manu'a High. Fa'afetai tele mo outou, pe ana fa'apea ona fiafia o faia'oga uma e o mai e galulue i le Manu'a High School, ua tele ni faia'oga e aoaoina le mamalu o fanau uma nei. Fa'afetai i lo outou fiafia e faia'oga i le Motusa, fa'afetai mo lo outou fiafia e o mai e avea ma faia'oga i Amerika Samoa, peita'i, ona o lea ua iloga o le a leai se polokalama mo le tausaga fou, afai e i ai se tasi o outou uma lava e fia fa'aauau ona galulue pea ma faia'oga i Amerika Samoa, e mafai ona faia ni a outou konekarate e faia'oga ai. Va'ai a'u i lo'u Ofisa, pe afai e i ai se avanoa e tou te fia suia ai e avea ma faia'oga tumau i Amerika Samoa."

O le ofo lena a le tama'ita'i fa'atonu, ma ua iloga fo'i ona patipatia lea avanoa e i latou uma. Peita'i ina ua talanoa ma se tasi o i latou, sa ia fa'ailoa mai, "O lo'u sau ai e avea ma faia'oga i le World Teach o se vaega lea o la'u a'oga o lo'o fa'aauau i le Iunivesite ina ia maua ai lo'u fa'ailoga. Afai e mae'a lou tausaga lenei, e toe tasi ai le tausaga e fa'amae'a ai la'u a'oga, ua i ai le igoa pele o Amerika Samoa i la'u lisi, ou te toe fia fo'i mai i ai, pe a mae'a la'u a'oga, ae faia sa'u filifiliga mo lo'u lumana'i." O lea ali'i o lo'o saili lona fa'ailoga Loia.

Na tula'i fo'i le Lutena Kovana, Lemanu Peleti Mauga, i lana saunoaga fa'apitoa mo le 'au fa'au'u ma mamalu na sasao i lea fa'amoemoe o le fanau, sa ia fa'afetaia fo'i le sao o faia'oga o le World Teach e le gata i le Manu'atele, ae o isi uma a'oga a le malo ua latou tautua mai ai.

12 TASUAGA O PULE A'OGA PATRICIA FUIAVA I LE MANU'ATELE:

Ona o lenei tausaga ua aga atu i ai le Laumua i le Manu'atele ua i ai se suiga o le a faia i lea a'oga maualuga, ona ua manatu le EFKAS i Sa'ilele e vala'auina ma le fa'aaloalo le susuga le Faife'au Rev. Fuiava e galulue tausi ekalesia i le latou afioaga, o lea ua tapena mamao ai le Matagaluega o A'oga e sailia se isi e avea ma pule a'oga i Manu'a.

"O lenei tausaga ua atoa ai le 12 tausaga o auaunaga a le faletua Patricia Tuimaleali'ifano - Fuiava i le tatou laumua nei, peita'i, ua vala'au le Atua ina ia avea ma le tina o le Ekalesia, o lea e fa'afetai tele atu ai le matagaluega mo le sao i le Laumua nei. Ua iloga lou tula'i mai. O oe fo'i o se tasi ua matua umi ona avea ma pulea'oga i Manu'atele, e leai ma se fa'asea po'o le toe talosaga atu ina ia suia lou avea ai ma pulea'oga i le Laumua nei o le Segaula. Fa'afetai mo lea tautua sili aua fanau a le Manu'atele,” o se tala a Faauifono Vaitautolu, le sui fa’atonu o aoga a le malo i le taimi na faia ai lana saunoaga fa'apitoa mo le vasega fa'aiuaso.