E le faamaonia moliaga sa tu’uaia ai e le malo Manu Lefatia

Na auau faatasi tama’ita’i e to’a 6 o le vaega iloilo e tuuina mai le latou faaiuga, e le nofosala le susuga a Manu Lefatia i moliaga e 3 e pei ona tu’uaia ai o ia e le malo, e mafua mai i le fa’alavelave lea na faia ai tuliga a Leoleo ma se ta’avale i le vaveao o le aso 24 Tesema 2017 i Iliili, Tafuna, Fagaima, ma fa’asolo atu ai lava se ia oo atu i Vaitogi.

O le mae’a ai ona faafofoga ma le toto’a o tama’ita’i iloilo iuga i mau uma na mafai ona folasia e le malo ma le itu tete’e, na tuuina mai ai loa le latou faaiuga e le nofosala Lefatia i lenei mataupu.

Na molia e le malo Lefatia i moliaga e 3, o ia moliaga e aofia ai le moliaga pito sili ona mamafa o le fafaoolima i le tulaga muamua.

O le ali’i loia tua ia Marcellus Talaimalo Uiagalelei na tula’i mo Lefatia, ae o tama’ita’i loia sili lagolago e to’alua ia Laura Garvey ma Christy Dunn na tutula’i mo le itu a le malo, ae lagolagusua i ai le ali’i Suesue Faapitoa ia John Seumanutafa.

E ui e le i faamaonia le tagi a le malo fa’asaga ia Lefatia, peita’i o lo o taofia pea o ia i le toese i Tafuna i le taimi nei, ona e 4 isi tagi eseese a le malo o lo o totoe e lei faagasoloina a latou faamasinoga autu faasaga ia Lefatia.

O ni isi o ia tagi e aofia ai le mataupu lea na tula’i mai i le masina o Aokuso i le tausaga na tea nei, ina ua sola i tua mai le falepuipui i Tafuna ma fana se ali’i i se laau malosi i le afioaga i Leone. Na manu’a tigaina lea ali’i ma taofia ai i le falema’i mo se taimi umi, peita’i o suesuega a Leoleo na faia faasaga i lenei mataupu, na taua ai e ni molimau le sola i tua o Lefatia ma faatino le solitulafono ma toe atu ai i totonu.

FAAFINAUGA FAAI’U

Na taua e le loia a le malo i lana faafinauga faaiu e fa’apea, o molimau uma e to’afa a le malo na valaau i le taimi o le fa’amasinoga a Lefatia, sa latou taua ma le manino ia latou molimau, sa latou vaai tino lava i totonu o le ta’avale, o Lefatia sa ia aveina le ta’avale.

“E leai ma se molimau na ese sana fa’amatalaga na tuuina mai, na tutusa uma lava a latou tali, o Lefatia sa faafoeina le ta’avale taimi na latou taumafai e taofi le ta’avale mai le fa’aauau pea ona sola ese ma i latou”, o le saunoaga lea a le loia a le malo.

Na taua e Garvey e fa’apea, o le saoasaoa na alu ai le ta’avale a le ua molia, e i le va o le 60 i le 70 maila i le itula, ma ua sili atu lea ma maila faatulafonoina i luga o le alatele i Amerika Samoa.

Mo le moliaga o le faaoolima i le tulaga muamua, na alia’e mai lea moliaga ina ua soa e le ta’avale a Lefatia le ali’i Leoleo o Det. Justin Thomsen i Vaitogi, a o taumafai le ali’i Leoleo e taofi le ta’avale mai le sola ese.

Na taua e Garvey e fa’apea, na fiu le ali’i Leoleo o Thomsen e valaau leotele atu ia Lefatia e taofi le ta’avale, ae sa fa’aauau pea ona faau u e le ua molia le afi o le ta’avale, sosoo ai loa ma lona tago faaoso le ta’avale ma taia ai le tulivae o le ali’i Leoleo.

O le fefe o le ali’i Leoleo i lona saogalemu, atoa ai ma lona vaaia o ni gaioiga sa faia e le tagata na to’alua ma Lefatia i totonu o le ta’avale, na mafua ai ona ia se’i mai i fafo lana a’upega ma fa’apa i lalo o le palapala, ina ia fai o se auala e momoli atu ai se feau ia Lefatia, e le o se tala ula lea e finau atu ai.

E fa’alua ona faapa e le ali’i Leoleo le fana peita’i sa fa’aauau pea ona le faalogo Lefatia i lana fa’atonuga, seia oo lava i le alu ese atu o le ta’avale i se saoasaoa uiga ese, ma le mafai ai loa e Leoleo ona toe maua le ta’avale i lea po.

Na faaiu le faafinauga faai’u a le loia a le malo i lona talosagaina lea o tama’ita’i iloilo iuga, ina ia tuuina mai le faaiuga e nofosala Lefatia i moliaga uma e 3 fa’asaga ia te ia.

Ina ua maua le avanoa o le loia a Lefatia e fa’aleo ai lana faafinauga faai’u, sa faailoa ai e Uiagalelei e fa’apea, e ui i le finau malosi o le malo o Lefatia na aveina le ta’avale, peita’i ua manino faamatalaga tauto a molimau e to’alua a le itu tete’e, sa latou ta’aalo piliaki ma Lefatia i lona fale i Puapua i le po o le aso 23 o Tesema seia oo atu i le vaveao o le aso 24 o Tesema pe tusa o le 4:30 i le taeao.

O molimau e to’alua a le itu tete’e na valaau e aofia ai le ali’i o Manono Faumui ma Sione Lagoia. Na taua e Faumui ma Lagoia i le vaega iloilo iuga e fa’apea, o latou na taaalo piliaki ma Lefatia i le Fale Piliati a le aiga o Lefatia i le po e pei ona taua, ma e leai se taimi na alu ese ai Lefatia mai le nofoaga o lo o i ai le Fale Piliati.

Na fa’amatala e Lagoia e fa’apea, o Lefatia e vaaia laulau piliati a le latou aiga, o ia e aoina tupe ma faasoasoa tagata e ta’aalo. O ia fo’i e faia sui mo tagata ta’aalo.

Na fesili Uiagalelei ia Lagoia pe sa i ai se taimi na vaai ai o paka i luma o le fale a Lefatia se ta’avale lanu mumu o le ituaiga o le SUV, na tali le molimau, e leai.

Na toe fesili fo’i le ali’i Loia ia Uiagalelei, pe sa i ai se taimi na tuua ai e Lefatia le fale piliati mo se taimi umi ae alu i se isi nofoaga, na tali le molimau, e leai. Na te le’i vaai lava o tuua e Lefatia le fale piliati ae alu ese atu i se mea mamao, na pau le taimi na ia vaaia ai ua alu ese Lefatia, o le taimi na alu ai e asi lana fanau o loo momoe i le foga fale pito i luga o le fale fogafale lua a le aiga.

Na taua fo’i e Uiagalelei i le vaega iloilo iuga e fa’apea, o lo o manino foi le molimau a le ali’i Leoleo ia Det. Jimmy Tagata na autu i ai le suesueina o lenei mataupu, e leai se igoa o Lefatia i le lisi o tagata na latou faanoiina atu le taavale mautotogi mai le Faletalimalo a le Tradwind Hotel.

I le faaiuga o le folasaga faai’u a Uiagalelei, sa ia talosagaina ai loa le vaega iloilo iuga ina ia iloilo toto’a mau faamaonia o le tagi a le malo, ma tuuina atu le latou tagi e le nofosala Lefatia i moliaga uma e 3 ua faia faasaga ia te ia.