Tala I Vaifanua

FA'ATONU FALEOSINA FAIAI - FOFOGA TAUMOLIMOLI L8 MANUMALO ACADEMY

I le fa'au'uga o le L8, Manumalo Academy na saunoa ai le tama'ita'i fa'atonu o le Public Works Faleosina Faiai Voigt ma sa ia lu'ia ai nei fanau talavou e to'a 43, ina ia avea i latou ma nisi e o atu i a'o'oga ia ausia fa'ailoga maualuluga, taliu mai ma faigaluega i le Matagaluega o Galuega Lautele a le Malo o Amerika Samoa.

"O lo outou sao lea, ina ua outou vala'aulia a'u ou te sau e avea a'u ma tou fofoga taumolimoli i lo outou aso fa'apitoa lenei, le tou fa'au'uga."

Peita'i sa ia fa'amamafaina fo'i le fuaitau sa avea ma manulauti i le latou aso fa'apitoa, "E le o i o tatou fetu lo tatou lumana'i, o lo'i ia te'i tatou lava!" O le saunoaga tusitusia a le ali'i polofesa ta'uta'ua o William Shakespeare, ma e moni lelei, aua e talatala le manuia o le tagata, ae o lona fa'anaunauga ua tula'i ai i le taimi nei, o lana moemitiga lena sa faia a'o la'ititi ma tausaili mai lona atamai, ia mautu ai lana folauga i sini sa ia fa'atu ina e avea ma lu'itau i lona soifua tausaili.

Sa ia fa'ailoa mai i le vasega fa'au'u, "O lo'u maua ai o lenei tofiga ua tula'i ai i le Malo, o sa'u miti lea po'o se taunu'uga na ou taumafai e tausaili mai a'o o'u nofo i le nofoa o lo ua tou nonofo mai ai i lenei taeao. O lona uiga, o lau sailiga ma lou lumana'i, o lo'o ia te oe lava. E taua lava oe i lau sailiga ma lau taumafaiga i taimi uma, aua ne'i e fa'atalale i lou tagata taua, e taua oe i ou matua, e taua oe i lau a'oga, e taua fo'i oe i lou malo ma ona tagata, e fa'amoemoe ia te oe le lumana'i."

Matagofie pesega, tauloto ma sao o le vasega fa'au'u ina ia fa'amatagofie ai lo latou aso fa'apitoa, i nai o latou matua ma aiga, ae maise o le laumua atoa fo'i ma le pulega ma o latou faia'oga i Manumalo Academy.

FAGAFAGA DANIEL LANGKILDE - TUUMALO LE ALI'I FAIPISINISI FOFOGA MALIE

O le tofa Fagafaga Daniel Langkilde, o se tasi e fa'ailo 'o se tagata mo so'o se ituaiga o faiva ma tautua eseese,' peita'i ua tu'ua i tatou, ae ua malolo ia Me 18, 2019 i Coronado, Kalefonia. Ua na'o le 61 tausaga o lona soifua.

O lea o le a tatou fa'amanatuina le atoaga o le 20 tausaga o se tasi o pisinisi sa avea o ia ma se tasi o pa'aga na amatalia, le Bluesky. O lona lea faiva na iloga ai e gafatia e ia ona fa'amaite pisinisi lelei, ma ituaiga e mafai ona olaola lelei ma le lumana'i i ona faiva fa'atino fa'aletalutalufou o faigamea tau le 'ala o feso'ota'iga.'

O ia o se tasi e lelei tele le siufofoga ma le ta la'au pese ma kitara i le fa'aili lauiloa a le Ava. O lona leo e matua matagofie ma suamalie e logomalie fo'i i le fa'afofoga a'o pese.

O ia sa avea ma le Sui Fa'asalalau e saunoa i le tele o fa'atasiga tetele i le atunu'u, ae maise ai o fa'asalalauga o fa'afiafiaga a le Arts Council i le vaitau o le Kerisimasi ma le Tausaga Fou fa'apea fo'i ma le Sisigafu'a a le tatou malo. O lona faiva lea sa iloga ai le avea o ia ma se tasi o totino o le Komiti Fa'afoe o le Arts Council ma le Taligamalo i le Pacific Arts Festival, 2008.

O ia o se alo e fa'asino ia Seiuli Marcus Langkilde ma Marie Scanlan Langkilde, na mua'i a'oga o ia i le Marist Brothers i Atuu, soso'o ai ma le ulufale i le Chanel College i Moamoa Apia, Samoa, ma toe taliu mai fa'aauau lana a'oga i le Marist Brothers i Malaeloa, o ia o se tasi o le ulua'i vasega na fa'au'u mai lea a'oga maualuga.

Na ulufale i le Seattle University, ma toe faaauau mai i Chaminade University i Hawaii, ma fa'aipoipo fo'i i lana manamea e to'atasi Sevenlittlesisters Aveina Langkilde ma toe taliu mai i fanua nei ma tausia atoa ai le fanau.

Na muamua lava iloga lona tagata tautua i lona avea ma fofoga fa'asalalau i le WVUV mai Vailoa, sa faaigoaina ai o Big D, ona o le malu lelei o lona leo.

I lona tolu o tausaga talu ai, na toe tula'i mai lava lenei tama e toe fafagu mai le taleni o le tata meafa'aili ma fai pesega ma toe fa'amaite ai le 2Samoa Jazz Festival. O ia na tu'uina i lalo le Garden Club i Fagatogo ma le Icewich ma fa'atuina ai le Langkilde Service Station ma le Tropic Isle.

O mea tau fa'afiafia uma e tutupu i lenei malo, e i ai lava sona sao, ae maise i le avea ma Fofoga Fetalai o Polokalama fa'ataoto mo le tauvaga Tausala Lalelei i tausaga ta'itasi a'o le'i tu'ua e ia le atunu'u mo malaga i talavai ma asiasiga i aiga. O le toe fa'aaliga tele sa avea ai o ia ma fofoga fetalai o le polokalama fa'ataoto o le Fa'amaiteina o le tautua a le Hawaiki Cable i le ASCC Multi Purpose Center i le ASCC 2018. E tasi lava le nofoaiga na avea ai o ia ma fofoga o lona itumalo, le Ituau Malosi. O ia o le ta'ita'ifono o le Amerika Samoa Vaega Fa'aupufai a le Temokalasi, ua maliu o ia ma lea tofiga. Na taumafai lo la sa tautai lua ma le tofa Tufele Li'amatua i le tausaga e 1992, palotaga mo le Kovana ma Lutena Kovana o le faigamalo.

O ia o le ulua'i CEO o le Bluesky Communications American Samoa, ia Iulai 10, 1999. Ona soso'o lea ma le avea ma CEO o le Malama TV ma le Pulesili fo'i o le Radio Samoa WVUV. I le amataga fo'i o le nofoa'iga a Kovana Lolo Moliga ma Lemanu Peleti Mauga, sa tofia ai o ia e avea ma Fa'atonu o le Public Information, e aofia ai ma le KVZK TV i Utulei.

Ua fa'ailoa mai e Vaito'a Hans Langlikde, lona tausoga e vavalalata tele le la'ua mafutaga ma Fagafaga Daniel, "Ua matou misia tele o ia, e afua atu i mea lava a si o matou aiga e o'o i le va ma le afio'aga ma le itumalo, e matua fa'amoemoe i ai matou i mea uma ma sona leo aua se fa'aiuga fai i na mea uma. I totonu fo'i o le li'o o matou aiga, e fa'amoemoe ia te ia i le fautua mai i mea e ao ina fai. O se tama e auau tele i lona aiga, si ona to'alua pele ma le fanau e to'atele."

"O le tagata fo'i e i ai lona fa'amoemoe i mea uma, e le fo'i gofie ona manatu, e fa'atupu mea lelei ina ia lauolaola le so'otaga o i matou uma, e agaga i le alofa ma le fealofani. Ae le tu'ua maulalo e ia lana taleni o le pesega, o lona lava leo e le soso i ai le to'atele o i matou. O ia lava le numera tasi i lena faiva."

Fa'ailoa e le fanau e to'avalu, "O le numera tasi a Fagafaga Daniel, o i matou uma lava ma mom, aua e galue i aso uma o lona olaga, i mea eseese uma ua ia faia, ina ia lava mea e tua i ai i le tausiga o i matou. Na toe va'aia lona fiafia e soifua ma fa'afiafiaina tele o ia i le to'atele o matou fanau. O ana uo uma lava ma latou aiga, e fiafia e talanoa i ai ma fa'asoa ona manatu, a'o le fautuaga ia i matou le fanau, ia outou fetausia'i ma ola fealoafani, talanoa mai pe a i ai se fa'afitauli ua faigata ia te oe, e to'atele outou, e mafai ona mama se avega pe a fai fa'atasi lo outou olaga."

FAI MAI KOREA I MATU - TALI LE MALO AUFA'ATASI I LE AVEA FAAMALOSI O LE LATOU VA'A

Ua manatu Korea i Matu, lea e ona le va'a "MV Wise Honest" e ao ina tali mai le Malo Aufa'atasi UNO, i le latou avea fa'amalosi o le latou va'a, ae le'i solitulafono le va'a, o lea le latou fanoga ua fa'ao'o ane i le Failautusi Aoao a le UNO - Antonio Guterres.

Ua finau mai le Emepasa o Korea i Matu i le UNO, "O le avea fa'amalosi o le matou va'a lenei, ua fa'ailoa mai ai o le Iunaite Setete o Amerika o se malo o ni tagata leaga ma le solitulafono, ua latou le fa'aaogaina tatau tulafono fa'avaomalo." O se tala lea ua fa'asalalauina e le Siufofoga fa'alogologo a Korea i Matu, le KCNA News.

Ua talitonu fo'i Korea i Matu o lo'o ua gaoia mai e Amerika le latou va'a, ina ua latou aumaia fa'amalosia le va'a mai Indonesia i Pago Pago, Amerika Samoa.

"Pe afai e tatou te va'ai atu i lea faiga ua o'o i le va'a lenei o matou, ua fa'aauau ai le taumafaiga a Amerika ina ia fa'ae'e mai se isi faigamamafatu i le tiga ua mae'a o'o i ai Pyongyang, ma o se mea fa'aauau lea ua taumafai i ai le malo o Amerika. Ae sili ai ona toe fa'afo'i mai le matou va'a i le taimi nei." O se manatu fa'aalia lea o Korea i Matu ua fa'ailoa mai, aua ua ave fa'amalosia sa'o e Amerika le Wise Honest i le taimi tonu lava o le tele o mea o lo'o fetosoa'i ai le Malo o Korea i Matu ona o latou misele fa'atonutonu o lo'o fa'ata'ita'ia ona tafana solo.

O le fa'asea lea e afua mai i Pyongyang, na fa'atutu i le Malo Aufa'atasi, peita'i ua fa'ailoa atu loa ma le aumaia e Amerika o le va'a i o latou Uafu, ua toe faliu ai lea fa'asea ma ua a'afia ai fo'i Amerika ma ua toe tolopo ai fonotaga i le va o le Peresetene o Korea i Matu ma Peresetene Trump sa fuafua e fono fa'alua ai i tulaga o le fa'aitiitia o meatau fa'aniukilia e tafana solo.

Talu na tolopoina fo'i talanoaga sa fuafua muamua i le va o Trump ma le peresetene o Korea i Matu ia Fepuari 2019, ua amata loa ona tafana solo misele fa'atonutonu e fa'ata'ita'i ma ua solituina ai e i latou tulafono a le Malo Aufa'atasi. Ua fa'aauau ane ai i le taofia o le malaga a le "MV Wise Honest" i Indonesia ae o lea ua toso mai nei i Amerika Samoa. Peita'i ua faia e Korea i Matua lea faiga, ina ua le tali atu Trump i le la'ua fonotaga na tu'u e faia i Hanoi.

Ona o lea ua taofia nei le va'a lenei, ua fa'ailoa mai e Korea i Matu, o lea la ua solituina e Amerika le a'ano tonu o le fonotaga lea e olioli mai, ma ua tatau fo'i la ona toe fa'afo'ia atu le latou va'a.

Ua fa'ailoa mai e le Matagaluega o Fa'amasinoga a Amerika, o le va'a lenei sa fa'aaogaina e Korea i Matu e fela'ua'i ai le Koale, ma o se mea ua mae'a fa'asaina e le Malo Aufa'atasi. O le masina o Aperila sa taofia ai lea va'a i Indonesia, ae o lea ua toso mai i Amerika Samoa ma faia ai suesuega atoatoa mo ana uta sa fela'ua'i. Ua mae'a auina atu fo'i ni fesili mai le au fa'asalalau a Amerika Samoa i le vaega a le US Justice Dept. ina ia talia mai e tusa o le taofiga o lea va'a ma tu'uaiga uma ua fa'ailoa mai e Korea ua solitulafono ai Amerika.