Tala I Vaifanua

11 FANAU FA'AU'U BAOA KOSI FA'APISINISI ASCC - SPRING 2019

O le afiafi fo'i o le aso Tofi na fa'atasia ai le vasega o Faia'oga o Kosi Fa'apisinisi ma latou o lo'o fa'aauau pea ona tau'avea a latou kosi i le tausaga aoga o lumana'i ma le to'a 11 o i latou ua sauni e fa'au'u mai le Fa'au'uga ASCC Spring 2019, lea e fa'ataunu'u i le aso Faraile o le vaiaso nei.

"O outou nei e to'a 11 ua sauni e fa'amavae ma i matou, ia manuia o outou faiva i le lumana'i o tou sailiga o fa'ailoga maualuluga, e le gata i lea, o nisi ua sauni e saili galuega, a'o nisi ua manatu ina ia fa'atautaia pisinisi tumaoti. Poo le a lava lau fa'aiuga i le isi tausaga o lumana'i, ia outou manuia. Fa'afetai lo outou galulue fa'atasi ma i matou uma o faia'oga ma sui o totoe i le BAOA ASCC i nei tausaga na tatou fa'atasi ai,” o se tala fa'atofa lea a le tama'ita'i Faia'oga o le Matata tau Pisinisi Dr Faofua Va'apu'u Fa'atoafe i lana vasega e to'a 12 o i latou.

O le to'atasi o lo'o filo ai, Osana Esekia, ua toe aga'i atu mo le isi ona fa'ailoga maualuga atu faapisinisi, ae o lo'o tauavea lana ulua'i tausaga lenei i le ASCC ma e fa'ato'a tauavea le tausaga lona lua o lana Kosi BSc Business i le tausaga a'oga o lumana'i.

O le mafutaga lenei, ua faia ina ia taua'aoina ai tusi pasi o le fanau mai le BAOA, po'o le Asosi o Fanau sa tau'avea Kosi Pisnisi i le Kolisi. O le latou fa'amavaega fo'i lea ma e i ai foi fa’ailoa fa’apitoa.

O lea fa'ailoga o le tamaititi a'oga fa'apisinisi ua silisili lana Amio e afua mai i le taimi o vasega ma lana amio fo'i i so'o se taimi e fa'atino ai ni galuega tima'i a le BAOA, ma lona fiafia fo'i e usita'ia tulafono uma a le kalapu a le BAOA.

I le taimi na mae'a taua'aoina ai latou tusi pasi mai le BAOA i o latou tino nei e 11, ona fa'ato'a taua'aoina ai lenei fa'ailoga o le Amio Lelei toe tausa'afia, na maua e Osana Esekia.

Na fa'atasia uma ane le Pulega a le Kolisi i lea fa’amoemoe.

O i latou e 11 ua aofia ai: Julia Fa'aiu; Malae Vaimoli; Eleni Tugaga; Ripena Aitaoto; Mayanne Fa'atau; Rejoice Vili; Cecilia Taufa'atasau; Jadine Laumoli; Justine Gago; Elisa Luani; Lemoe Vaoga ma Osana Esekia lea e tauavea pea ana mataupu pisinisi mo fa'ailoga maualuluga atu BSci Business

LADIES NIGHT - AFIAFI FA'APITOA MO TINA A LE ACE HARDWARE

O le fa'amoemoe a le Neil's Ace Home Center e fa'afiafiaina uma Tina ma tama'ita'i o le atunu'u, sa latou toe fa'ataunuuina ai le latou "Afiafi ma Tama'ita'i" i le afiafi o le aso Tofi ua te’a, ma ua avea o se fa'atasiga e maua ai mea'ai taugofie, o oloa fo'i o le faleoloa atoa o le Ace ua fa'ataugofie mo tina, ae ua taina fo'i le musika ma fa'atutuina fale'aiga i lumafale o le faleoloa.

E le gata i lea ua fa'atulaga fo'i i totonu ituaiga pisinisi eseese ua fa'atautaia e tama'ita'i, ina ia avea lea fo'i afiafi fa'apitoa ma se taimi e toe fa'atau ai e tina ni oloa ua latou gaosia fa'apitoa, e agatonu mo le tausiga o le soifua maloloina o Tina ma Tama'ita'i o so'o se ituaiga matua. O nisi o oloa gaosi fo'i a nei pisinisi laiti, e aga lea i teuga fa'amatagofie ai tina i lo latou aso fa'apitoa ua fa'ato'a mae'a atu nei.

E le'i taina le 6:00 e tatala ai faitoto'a o le faleoloa ina ia ulufale tina uma e faia fa'atauga, ae ua mae'a sivasiva tina i lalo o faleie ma latou tausasami i mea'ai sa fa'atauina mai i le tautua a le Shan Js ma le fale'aiga o Mea'ai Mexico, le Evalani's.

O se taumafaiga e matua mata'ina aua ua aga'i sa'o atu lava tina sa faigaluega i lea faamoemoe, ia le toe i ai lava se taimi fa'amaumau. Sa faia le se'i ma e 10 lava minute ma vala'au mai le se'i ma le sui ua manuia ai. Ua fa'asolo fo'i le fa'asalalauga fa'alaua'itele o i latou o pisinisi laiti a tina sa faia folasaga, ina ia mafai ona fa'atau atu ai latou oloa gaosi. O le vaega lava ua i ai le fa'asologa o fa'asalalauga, o i latou fo'i na e saunia maia le fa'ailoga mo le ua se'ia lona suafa.

Na tumutumu le faleoloa atoa i tina fa'atau, e le'i taofia fo'i le vasega o tama, ua fa'ataga tagata uma ina ia mafai ona maua le avanoa mo tama ma fanau, e fa'atau ai se meaalofa taua mo tina o le aiga. Ona o le fa'amoemoe sa fa'atulaga e amata mai le 6:00 se'ia pa'ia le itula e 7:30 ona tapunia lea, o lea sa fa'ailoa mamao ai i tagata uma sa auai, "O le fa'ailoga o le se'i e $500 na fa'atulaga, o le a fa'ato'a se'ia lava i le itula e tapunia ai, ae afai o le a le i ai le sui ua laki i lea fa'ailoga, o le a fa'aleaogaina ae toe se'ia, ina ia maua lava e le sui ua laki a'o i ai pea i le faleoloa."

Ona ua matauina e ese fo'i le fiafia o tina uma ma tama'ita'i e fa'aaogaina lea avanoa mo a latou fa'atauga patino mo i latou ma o latou aiga, ua fa'afiafiaina atili i latou i le Ace Home Center e tautuaina fo'i tina uma i le isi tausaga o lumana'i i lenei lava vaitau o aso fa'apitoa mo Tina. O le lona tolu ai lenei o tausaga talu ona faia lenei fa'atasiga.

AISEA O AMERIKA SAMOA? LAGONA FA'ASEA O TAGATA UA FA'AALIA

Talu ai o le tala na fa'alauiloa ua toso aga'i mai i le teritori, le va'a oloa a le malo o North Korea - le itu o Korea lea e fa'akomenisi ma toe o lo'o fa'aolioli tau i le Malo o Amerika - ua mafua ai ona fa'aosofia lagona tete'e o tagata lautele i lea fa'aiuga ua faia e Amerika. O lea va’a, Wise Honest, sa taofia i le tausaga ua te’a i le malo o Indonesia ae o lea o lo’o toso mai i le teritori.

O nisi o manatu fa'asea ua fa'apea mai, "O le mea lena e faamautinoa ai, e na ona faia lava o si tatou malo, ae leai lava se loto e faia pe a o'o loa ina fuli mai Amerika e fa'aaoga i mea fa'apena.”

O se isi manatu ua fa'ailoa mai, "Aua le popole Amerika Samoa, o lo'o ua sauniuni le US Navy o lo'o i ai va'amaulu ua mae'a fa'atulaga i le ogasami o loo toso mai ai lenei va'a.  Ua mae'a fo'i ona fono le Sui Kovana Lemanu Peleti Mauga ma le vasega o tagata suesue a le US Coast Guard ua i o tatou laufanua i le taimi nei, e tapena lelei le Uafu ma ona tagata faigaluega uma, i le faiga e faia ai le siakiga o lenei va'a mai Korea i Matu.”

O le va'a lenei ua leai ma se tasi o auva'a o i ai i luga, atoa ai fo'i ma se uta, ua na'o le va'a lava.