Manumalo al "Sweetness" Matavao Fusi Light Heavy MMA Alaska

MANUMALO AL "SWEETNESS" MATAVAO FUSI LIGHT HEAVY MMA ALASKA

O le ali'i Fusu, Pii ma Karate "MMA" o Al Matavao, o lo'o tauva i le MMA ma ua fa'ato'a mae'a lana pi'iga ma Marcus Campell, lea na ia malo ai i le TKO.

Ua umia nei e lenei alo o Amerika Samoa mai Nuuuli le fusi a le Light Heavy weight i le AFC MMA. O lona uiga ua siamupini nei o ia i le AFC MMA i Hawaii ma Alaska.

Sa a'oga Matavao i le Manulele Tausala, soso’o ai Tafuna High School, ma fau'u mai ai i le tausaga 2012. O lo'o fusu MMA mai o ia i le Setete o Alaska, ma ua fa'amanuiaina lava.

I le taimi nei i fa'amaumauga a le World Events i le Iunaite Setete atoa ua tula'i mai o ia o le numera 43 i le aotelega e 453 le 'au Fusu MMA Light Heavyweight o i ai, peita'i o lo'o numera tasi mai o ia i le au fusu MMA a le setete o Alaska lea e alaalata'i ai.

O lana fusuaga mulimuli lava o Ianuari 16, 2019 lea na mautu atu ai ia te ia le fusi o le siamupini i le MMA i lana paga Light Heavy ina ua faiaina ai Campbell o Hawaii.

E ui ina alaala ma fusu lenei alo o Amerika Samoa i Alaska, ae a savali i totonu o le maea ua tapena mo ana taumafaiga uma lava, o le Fu'a a Amerika Samoa o lo'o ia la'eia.

O le umi o lea atali'i o Amerika Samoa e 5futu 8inisi, ae matua lava tapena fo'i o ia i lona tino e agava'a ai mo ana fusuaga MMA. I le taimi nei o lana fa'amaumauga ua 6 manumalo, 2 Faiaina ae 0 le tutusa, ma ua umia le Fusi Siamupini mo Hawaii ma Alaska i lana paga.

FAALEAOGA LE MALO O LE SILVA CONSTRUCTION - GALUEGA MALAEVA'ALELE

Ua fa'aleaogaina e le Ofisa o le Procurement a le Malo lana fa'ai'uga lea sa fuafua e taua'ao le galuega e va’avaia ma pulea le toe fa'aleleia o se tasi o vaega o le Malae Va'alele i le Silva Group Construction.

I se tusi i le aso 26 o Aperila na taua'aoina i Kamupani uma na fa'aulu a latou ofo mo lea galuega, ua fa'ailoa atu ai i nei kamupani uma, ua toe fa'aleaogaina le fa'aiuga muamua na faia i lea tauofoga, ma o le a toe tauofo i se aso o i luma.

O lea tusia sa saunia e Dr. Oreta M. Crichton, le fa’atonusili o le Ofisa o le Procurement.

Sa fa’ailoa e Crichton i le Samoa News e fa’apea ua mafua ona fa’aleaogaina lea tauofoga ona o se talosaga mai le Matagaluega o Uafu ma Malae Va’alele, le vaega o le malo e pulea ma fa’afoeina le galuega sa tauofo.

Ua le gata i lea sa ia fa’ailoa foi e fa’apea o le fa’aiuga e fa’aleaogaina le tauofoga muamua, e leai se sootaga ma nisi o kamupani, e aofia ai POIA Consulting, lea sa faila sa latou tusi fa’atuiese i se fuafuaga e maua e Silva Group le konekarate.