Tala I Vaifanua

FA'AIUGA TAUVAGA GALUEGA FA'ATINO TALA FA'ASOLOPITO

I le tauvaga galuega fa'atino o le Tala Fa'asolopito i lenei tausaga mo aoga tulaga lua, sa faia i le Ottoville LDS Hall ia Aperila 11 na tauva ai le fanau fili fa'apitoa mai tauvaga a latou a'oga ina ia maua tulaga mua, lua ma le tolu i vaega e 9 mo le tauvaga.

Mai vaega ta'itasi e to'atolu e lautogia mo le tulaga muamua se'ia o'o i le tulaga togisilia. Peita'i a mae'a lea filifiliga, ona fa'ato'a toe tauva lea o le to'atolu mai vaega ta'itasi e 9 ma va'ai ai po'o ai ua sili maualuga o latou togi, mo le tulaga togisilia, tulaga lua ma le tulaga tolu i le tauvaga a le Teritori.

O le aso muamua o le tauvaga lenei, mo aoga tulaga muamua, o le aso na soso’o ai, Aperila 11, mo a'oga maualuluga i le teritori, ma o i latou fo'i nei e malaga i le tauvaga fa'aaliga Tala Fa'asolopito a le Iunaite Setete o Amerika, fa'atasi ai ma le sui e to'atasi o lo'o togisilia mai le Tauvaga a A'oga tulaga muamua, e malaga e maimoaina lea tauvaga ia Iuni 2019.

Mai le vasega o A'oga Tulaga muamua na maua ai le fa'aiuga o sui ua maua le tulaga muamua se'ia o'o i le tolu i le mae'a ai ona maua i latou ua togisilia mai vaega ta'itasi. Fa’aiuga tauvaga A'oga Tulaga Muamua: 

• Togisilia ia Jennifer Leigh Vaiau ma Petania Sagaga mai le Pacific Horizons School i le la'ua fa'atinoga o le "Berlin Wall" o se galuega fai fa'atasi po'o le Group Exhibit.

• Tulaga lua Toasamoa Tuialu'ulu'u mai Fitiuta Elementary i lana galuega fa'atino "The Missouri Compromise" i le vaega o le Individual Documentary Category lea sa togisilia ai.

• Tulaga tolu i le tu'ufa'atasiga o togi o e na manumalo mai vaega ta'itasi e 9 ole tauvaga ua maua e Renee Dunson, Richard Mamea ma Louis Zamperini i le latou galeuga to'atele "Surviving All Odds" O i latou na tulaga muamua i le Group Exhibit.

O le a'oga ua tulaga muamua i le aotelega o togi o galuega fa'atino o Manumalo Baptist Academy.

I le tauvaga a Aoga Maualuluga e to'atolu i latou na filifili mai le aotelega o i latou na tulaga muamua mai vaega ta'itasie 9 na fa'atauva:

• manumalo ai Lolua Leomiti, Katherine Betham ma henry Fa'apalemata o Tafuna High i le latou galuega fa'atino o le "Blackbirding in Queensland Australia" i le vaega o le Group Documentary.

• tulaga lua Jade Kruse ma Jewel Kruse o Tafun High School i le la'ua fa'atinoga o le "Loving vs Virginia" i le vaega o le Group Website.

• Tulaga tolu ia Morgan Ulu ma Eciladen Ulu mai Samoana High School i le la'ua fa'atinoga o le "Alice Stokes" i le vaega Group Performance.

Aoga ua mauaina le tulaga togisilia i le aotelega o fa'atinoga o galuega fa’atino, Tafuna High School.

Aperila 13 na tufatufagaina ai fa'ailoga ma fa'ailoa ai le malaga o i latou nei e fa'atauva i le Nationa History Day ia  Iuni 9 - 13  i le setete o Maryland. Ua lautogia fo'i i latou na manumalo mai le Tauvaga Tala Fa'asolopito a le Elementary e malaga e maimoaina le tauvaga lenei, ae le fa'aalia ai latou galuega fa'atino. (Taga’i i le lomiga taeao mo le auiliiliina o lea tauvaga.)

AIGA & MATUA - AUMALAGA FANAU FA'AU'U ASCC FA'AILOGA KOSI FA'APISINISI

I le toe taliu mai i fanua o le aumalaga a le fanau aoga e to'afa ma le latou fa'auluuluga o Kosi Fa'apisinisi a le ASCC, ua fa'atasi ai i latou ma matua ae maise le fa'auluuluga atoa o le Kolisi Tuufa'atasi ina ia fa'afetaia ma maimoaina le tele o pisinisi ma nofoaga sa latou asia i Samoa.

I lea 'aiga, sa folasia fo'i e le fanau a'oga e to'afa lea ua sauni mo suega mulimuli e aoga i ai le latou lea malaga asiasi i pisinisi laiti ma pisinisi tetele, ona taua'aoina lea o latou tusi pasi ua lautogia i ai i le fa'aiuga o lenei afa tausaga.

"O i matou na asia pisinisi e fa'atautaia e aiga, ma ua iloga fo'i ona matou va'aia e le faigata lava ona fa'atino nei pisinisi, e la'ititi fo'i le tupe fa'aalu, ae a o'o ina avatua i maketi, e ao ina matua mautu le fa'apepaina ia le toe fa'afo'ia maia, ona ua le tu'u aiaiga i tulafono tau oloa fa'atau atu. Ua iloga fo'i, e ao ina matua usita'ia tulafono nei,” se tala lea a le tama'ita'i o Mayanne Fa'atau.

Na asia e i latou le Tafaoata Chips ma Mailelagi Samoa, mo oloa e gaosia fa'apitoa mai le Faguu Samoa po'o le pe'epe'e o le popo ma e aoga i fasimoli ma fagu'u manogi mo le pa'u e fa'amomosi atili ai. O nei oloa e fa'atau atu i maketi i Europa, Ausetalia, Niu Sila ma Amerika.

Na asia fo'i le SamaGo Chips lea e faia i le fa'i, talo ma le ulu i taimi o fuata. Ole kamupani a Le Vai, le kamupani tele a le Uncle Johnny's mo le Aisikulimi.

Sa malaga foi i Savai’i ma maimoaina le pisinisi "Swim With The Turtles." O lea pisinisi na'o le mautinoa lava o lo'o fafaga lelei Laumei.

“O le aoga o nei malaga, e fa'aaoao ai le fanau ina ia iloa lelei fa'atautaia pisinisi. Fuafua lau pisinisi i lona amataga, se'ia o'o ina fa'atupe atili ma soso'o ia fa'alautele atili lau tautua, ae o lo'o gafatia e le tupe maua ona faia lena tulaga. O le o'o i le fa'agaoioiga o pisinisi e tatau ona iloa lelei e le fanau ua tausailia o latou tusi pasi i lenei kosi,” o se tala lea a le faia'oga o lea Kosi, Dr Faofua Va'apu'u Fa'atoafe.

O i latou na malaga e aofia ai Cecilia Taufa'asau; Justine Gago, Mayanne Fa'atau ma Ripena Aitaoto fa’apea ma Fa’atoafe.

FOA'I MCDONALDS AMERIKA SAMOA $5,000 TONIGA FANAU A'OGA TAFUNA HIGH

O le aoauli o le aso lenei e faia ai le foai a le McDonald's Amerika Samoa le aotelega o le seleni e $5,000. O lenei foa'i ua faia ona sa talosagaina e le Booster Club a Tafuna High se fesoasoani mo toniga a le fanau a'oga o lo'o ta'a'alo i le Football Team.

Ua fa'ailoa mai e se tasi o le pulega o lea Fale'aiga, "O se fiafiaga le mafai ona talimana'o i lenei fo'i fa'atoga a le Booster Club, o le vasega lenei o matua o le fanau a'oga o lo'o ta'a'alo i le "au Football ma isi 'au ta'a'alo uma lava a le a'oga.”