Tulafono mo fa’amasino sili lagolago e tauave tiute Fa’amasino Fa’aitumalo

O le amataga o le vaiaso lenei na pasia ai e le Maota Maualuga se pili mai le faigamalo a Lolo/Lemanu e fa’atagaina ai fa’amasino sili lagolago o le Fa’amasinoga Maualuga e nofoia fa’amasinoga fa’aitumalo.

I le fa’atomuaga o le pili o lo’o fa’ailoa mai ai e fa’apea, “e i ai taimi e faigata ona maua ai ni fa’amasino fa’aitumalo e nofoia le nofoa fa’amasino ona o se gasegase, o le le auai, poo le feteenai foi ona e aafia le fa’amasino i se mataupu o lo’o iloiloina.

Ae mana’omia e le tulafono ona fa’aauau pea le tatala o le fa’amasinoga. Ma e taua le Fa’amasinoga Fa’aitumalo ona o le puipuia ma fa’atumauina o aia a tagatanu’u.

“O le fa’atagaina o le Fa’amasinoga Maualuga e fa’atautaia mo se taimi le tumau, le fa’ataunu’uina o Fa’amasinoga Fa’aitumalo, e fesoasoani lea e tu’uitiitia ai le fa’asoasoaina o le aufaigaluega ma mafai ai e le Fa’amasinoga Fa’aitumalo ona fa’ataunu’u lana fatuaiga taua e tusa ai ma le tulafono,” o se vaega lea o le fa’atomuaga o le pili.

I lea tulafono taufa’aofi o lo’o fa’amanino mai ai e mafai e le Fa’amasino Sili ona tofia mo se taimi le tumau, fa’amasino sili lagolago o le Fa’amasinoga Maualuga e nofoia taualumaga ma mataupu a le Fa’amasinoga Fa’aitumalo.

Ma o le taimi e tofia ai le fa’amasino sili lagolago i le Fa’amasinoga Fa’aitumalo, e mafai ona ia fa’atumu soo se tiute i le Fa’amasinoga Fa’aitumalo.

Ua tuuina atu nei lenei pili i le Maota o Sui e faia i ai sa latou iloiloga ma le filifiliga. O lo’o i ai foi i le Maota o Sui sa latou pili i lenei mataupu e le’i faia i ai se faaiuga.

O le aso, Aperila 12, o le aso mulimuli lea o le Tauaofiaga Muamua a le Nofoaiga Lona 36 a le Fono Faitulafono. E toe tauaofia le Fono i le masina o Iulai mao le Tauaofiaga Lona Lua.