Amata aloaia fa’amasinoga autu o se ali’i tu’uaia aumai fa’anana fualaau fa’asaina

O le vaiaso nei na amata aloaia ai le fa’amasinoga autu o se ali’i sa galue i le Ofisa o Aoga a le malo, lea o lo o tu’uaia i lona taumafai e aumai fa’asolitulafono i le teritori fualaau fa’asaina.

O le susuga a Sonny Tui, lea o lo o taofia pea i le toese i Tafuna ina ua le mafai ona ia totogi le $40,000 na fa’atulaga e tatala ai o ia i tua, o lo o tu’uaia e le malo i moliaga mamafa e 3. O ia moliaga e aofia ai lona umia fa’asolitulafono o vaega o le pauta fa’asaina o le aisa; umia fa’asolitulafono o le aisa ma le fa’amoemoe e tulei ma fa’atau atu i isi tagata; atoa ai ma le taumafai e aumai i le teritori fualaau fa’asaina.

O le aso Gafua o le vaiaso nei na filifilia ai sui e to’a 6 o le vaega iloilo iuga, lea e to’a 5 tama’ita’i ae to’atasi le ali’i latou te iloiloina taualumaga o le mataupu a Tui.

O le tama’ita’i loia sili lagolago ia Christy Dunn o lo o tula’i mo le malo, ae lagolagosua i ai le ali’i Leoleo Suesue sa autu i ai le suesueina o lenei mataupu, le susuga ia Det. John Seumanutafa, ae o le ali’i loia tua ia Marcellus Tala Uiagalelei o lo o tula’i mo Tui.

I ulua’i folasaga a loia, na taua ai e le loia a le malo e fa’apea, o vaega o fualaau fa’asaina o lo o tu’uaia na taumafai Tui e aumai fa’anana i le atunu’u, o lo o atagia mai ai, e le o ni fualaau faasaina e fa’aaoga mo ia lava, ae o fualaau fa’asaina na fuafua e tulei ma fa’atau atu i isi tagata. Ae na taua e le loia a Tui e fa’apea, o le tagi a le malo na mafua mai i le le lelei o le fesootaiga i le va o le ua molia ma sui o le Ofisa o Tiute.

ULUA’I FOLASAGA A LE MALO

Na taua e le loia a le malo i lana ulua’i folasaga e fa’apea, i le aso Faraile, Tesema 8, 2017, na taunu’u ai i le malae va’alele i Tafuna se atigi pusa sa fa’atuatusi mai i le suafa o Tui. Ina ua taunu’u le atigi pusa, sa fa’atino loa galuega masani a le Ofisa o Tiute i le siakiina lea o uta ma fa’amomoli na aumai i le va’a meli.

I le aso e pei ona taua, sa molimauina ai e le ali’i o le Ofisa o Tiute ia Faifua Jr Suafo’a se tulaga e ese ai lava foliga o le atigi pusa sa fa’atua tusi mai i le igoa o Tui. O le atigi pusa na lafo mai e le tagata e suafa ia Martinez Rodorigo mai Mexico, ae fa’atua tusi mai ia Sonny Tui o Amerika Samoa.

O faamaumauga o loo i luga o le tuatusi o le atigi pusa na oso ai masalosaloga o le ali’i Ofisa ia Suafo’a. Ina ua fa’agasolo lana siaki, na fa’ailoa atu ai e le taifau mai le K-9 se fa’ailo e faailoa ai o lo o i ai se mea e ono masalomia ai le atigi pusa.

O le kamupani la’u uta a le DHL Express Inc na fa’a auala mai ai le atigi pusa a Tui, ma, sa i ai fo’i le sui o le DHL i le taimi na siaki ai e Suafo’a le atigi pusa i le malae va’alele.  Ina ua tatala le atigi pusa, sa vaaia ai ni mitiafu se 2 faapea ai ma se pusa o loo i ai se sipika. Ina ua mae’a ona tatala e Suafo’a le atigi pusa, sa toe tapuni loa ma fa’amau fa’alelei, a o molimauina pea lava e le sui o le DHL.

Talu ai tulaga masalomia i le atigi pusa, na tu’u ese ai loa e Suafo’a le atigi pusa i le isi tulimanu o le Ofisa o Tiute i Tafuna, e fa’atali ai le taimi e alu atu ai le tagata e piki mai. O le taimi fo’i lea na fa’afesootai ai loa e le sui o le kamupani la’u uta a le DHL ia Tui ma fa’ailoa i ai o lea ua taunu’u lana atigi pusa, peita’i sa fa’ailoa i ai e Tui, e ta’atia le atigi pusa se’i piki i le aso Gafua o le vaiaso e sosoo ai.

I le aso Gafua, Tesema 11, na aga’i atu ai loa Tui e piki mai lana atigi pusa. Ina ua taunu’u i le malae va’alele, sa fesiligia o ia e Suafoa poo le a lea atigi pusa, ae na tali Tui, o lana meaalofa na aumai i lona to’alua ma lana fanau.

Na taua e le loia a le malo e fa’apea, o le taimi lava na vaaia ai e Tui se afifi na nana mai i totonu o le sipika, na ia fai ai loa i le ali’i Ofisa o le Tiute, e le o ia e ana le atigi pusa lea, e le iloa poo ni meatotino ia a le tagata na lafo mai ai lea atigi pusa.

Na taua atili e le malo e fa’apea, o fualaau fa’asaina na maua i le atigi pusa sa lafo i fafo mo suesuega, lea na fa’amaonia mai ai e le Ofisa Suesue a le Feterale, le DEA, o aisa e tusa ma le 110 kalama le mamafa na maua i totonu o le atigi pusa, e le o ni mea e fa’aaoga e se tagata se to’atasi, ae o fualaau fa’asaina sa fuafua e tulei ma fa’atau atu i isi tagata.

TALI A LE ITU TETE’E

Na taua e Uiagalelei i lana ulua’i folasaga e fa’apea, o le mataupu e pei ona tu’uaia ai Tui e le malo, e mafua mai i le le femalamalamaa’i o itu e lua. Sa ia taua e fa’apea, o le tali a Tui sa tuuina atu i le ali’i Ofisa o Tiute i le aso na alu atu ai e piki lana atigi pusa, e le o ia e ana le atigi pusa lea na maua i ai fualaau fa’asaina, o lana tali lava lea e oo mai lava i le taimi nei.

Na taua e Uiagalelei e fa’apea, o ni isi o taimi e naunau ai tagata e fia fa’alogo i tala e naunau i latou e fia fa’alogo i ai, peita’i o ia tala e le o ni tala moni.

“O la outou tiute o le iloilo toto’a lea o mau faamaonia uma o le a folasia e le malo, ina ia outou mautinoa ai poo fea le tala e moni a o fea fo’i le tala e le moni,” o le saunoaga lea a Uiagalelei.

“Afai tou te talitonu e le moni tala o le a tuuina atu e le malo, ona outou tuuina mai lea o le faaiuga, e le nofosala Tui i le tagi e pei ona tu’uaia ai o ia e le malo.”

ULUA’I MOLIMAU A LE MALO

O le ulua’i molimau a le malo na valaau, o le ali’i Ofisa o le Tiute ia Suafo’a, sa galue i le vaega e fa’aaoga ai ta’ifau mo le sailiina o fualaau fa’asaina i le aso na tula’i mai ai le fa’alavelave, peita’i o le taimi nei, ua tofia o ia e fa’auluulu i ai le vaega o lo o siakiina containers o lo o la’u mai ai uta mai fafo i luga o le uafu tele i Fagatogo.

Na taua e Suafo’a i lana molimau e fa’apea, ina ua taunu’u atu Tui e piki mai lana atigi pusa, sa ia fesili i ai poo le a lea atigi pusa, ae na tali Tui, o lana meaalofa na aumai i lona to’alua ma lana fanau.

Na taua e Suafo’a e faapea, o le taimi lava na vaaia ai e Tui le afifi o lo o nana mai i totonu o le sipika, na ia faailoa atu ai loa ia te ia e fa’apea, e le o ia e ana le atigi pusa lea.

Na taua e Suafo’a lona toe faapea atu ia Tui, “a o lea fo’i fa’atoa uma ona e fai mai o lau meaalofa na aumai i lou to’alua ma lau fanau”. Ae o le tali a Tui ia Suafo’a, “Na ou okaina i luga o le laina”.

Na taua e Suafo’a i lana molimau e fa’apea, o ni isi o mafua’aga na ala ai ona masalomia le sipika na aumai i le atigi pusa a Tui, ona o se tasi lea o auala ua tele ina fa’aaoga e tagata e aumai fa’anana ai fualaau fa’asaina i Amerika Samoa.

O le afioga i le ali’i Fa’amasino Sili Lagolago ia Fiti Sunia o lo o fa’atautaia lenei mataupu, ae lagolagosua i ai afioga i Fa’amasino Lagolago ia Faamausili Pomele ma Muasau T. Tofili.