Tala I Vaifanua

TOAI TAUNU'U MAI - AUMALAGA AUTA'A'ALO SPECIAL OLYMPICS

O le aso Sa ua te’a, Mati 24, sa toe fo’i ai mai i le atunu’u le ‘au ta’alo o le Special Olympics a Amerika Samoa, lea na auai i Ta'aloga a le Olimipeka Fa'apitoa i Abu Dhabi, Dubai Alapi.

O le afioga i le Lutena Kovana, Lemanu Palepoi Sialega Mauga, sa i ai i le malae va’alele i Tafuna e fa’atalia le aumalaga fa’atasi ai ma le susuga i le fa’afeagaiga, Rev. Iasepi Ulu, o le EFKAS Fagatogo, sa ta’itaia le sauniga lotu fa’afetai i le fale Samoa i le malae va’alele.

Ma ua toe taliu mai i latou ma pine Auro, Siliva ma Apamemea, o se mea sili lea ua latou faia mo Amerika Samoa i so'o se taimi lava latou te masi'i ai, e toe fo'i mai lava o se fa'aoso po'o se fa'apolopolo matagofie mo le tapua'iga a le atunu’u.

O le ta'ita'i o le aumalaga ma le 'au ta'a'alo o Tafaimamao Tupuola ma lona fesoasoani Leone Ripley Ulu, Ruth Tuato'o o le Fa'atonu o le Special Olympics i Amerika Samoa ae o le ta'ita'i Faiaoga fo'i o le au ta'a'alo Football na masi'i. Sui Fesoasoani Faia'oga mo le 'au ta'a'alo Lupe Malele ma le Foma'i o le 'au ta'a'alo Florence Wasko, fa'apea fo'i le tama'ita'i o Deanna Fuimaono o le Faia'oga Ta'ita'i o le Track & Field.

O 'ai o le malaga na fo'i mai ma i latou: Anzac Leitu mauaina le pine auro i le 100mita mo Ali'i, ae maua fo'i e ia ma le Pine Apamemea i le 200mita mo Ali'i, o tu'uga tamo'e nei sa fa'atinoina.

Pine Siliva i le tu'uga tamo'e 100mita a Ali'i na mauaina e Justin Lutu, ae o le tama'ita'i o Lesina Falaniko na mauaina le pine apamemea i le tu'uga 100 mita a tama'ita'i.

I le ta'aloga a le Football sa maua ai e Tama'ita'i 7 Aside le Pine Apamemea; ae latou mauaina le Pine Auro i le Dancesport Team Competition.

O i latou nei e aofia i ia taaloga: Tusha Paulo; Tasha Paulo; Anastasia Purcell; Victoria Ah Lam; Cleopatra Siliga Bird; Utufia Tutasi; Line Fa'apito; Yvonne Aita ma Petina Mahe.

LEAI SE A'AFIAGA O MALAGA TALOFA AIRWAYS ONA O LE FEAGAIGA MALIAT

Ina ua fa'ailoa ua le toe auai Samoa i le feagaiga tau feoa'iga i le ea a le Multilateral Agreement for Liberazation of Inernational Air Transport (MALIAT) ma isi atunu’u e aofia ai the Iunaite Setete, Niu Sila ma Tonga; na manatu loa le Talofa Airways o le a fa'aletonu ai ma latou femalaga'iga i le va o American Samoa ma Samoa.

Peita'i ua toe fa'ailoa e le Talofa Air, le latou CEO, Toeafoa Jeffery Hunter, "Ua mautinoa nei e le mafai ona a'afia ai femalaga'iga a le Talofa Airaiways ona o lo ua maea ona fa'ataga” mai e le vaega a le fetarale, USDOT, le pemita pemita mo nei faigamalaga i le ea mo le tausaga atoa.

Ua fa'ailoa fo'i o le taofia ai e Samoa o le latou auai pea i le MALIAT, e ao ina faia e le Malo, ina ia le a'afia ai pe puipuia ai fo'i a latou femalaga'iga e aga'i atu i Niu Sila ma Ausetalia.

O le maliliega lea ua maea taulimaina e i latou mai le USDOT, ua fa'amatu'u mai ai le tausaga atoa e faia ai nisi talosaga mo i latou mulimuli ane e faaauau ai le latou tautua mo le mamalu o le atunu'u fegasoloa'i.

Ua fa'afetaia e ia le avanoa lea, aua ua le fa'aletonu ai le latou tautua i le mamalu sa latou fa'atulaga mo a latou femalaga'iga ua mae'a totogia.

Ua le gata i malaga i le va o le teritori ma Samoa, ae o lo’o malaga foi le Talofa Airways i le va o Amerika Samoa ma Tonga.

FESILIGIA FAIPULE OSOFAIGA AOGA MAUALUGA LEONE

Ua fesiligia a le afioga i le tamaita’i faipule mai Fofo, Andra Samoa, le tulaga o le osofaiga lea na afaina ai le Aoga Maualuga a Leone, ae maise o se fa’aiuga a le Matagaluega o Aoga i lenei mataupu.

"Ua tatau lava ona se fa'aiuga lelei a le Matagaluega o A'oga aua o lea ua tele na'ua taimi ua osofa'ia ai falea'oga ma fa'aleagaina potu a'oga ma mea totino a a'oga ma faia'oga ae maise fo'i o fanau a'oga i nei soligatulafono,” o se tala lea a le tamaitai faipule. “Ua tatau ona amatalia e le Matagaluega o A'oga ona fa'afaigaluega ni leoleo po mo lotoa uma lava, ae maise i lotoa o a'oga maualuluga."

I lona taofai e le o lava le galuega e ao ina faia e ta'ita'i o le Matagaluega o A'oga, e taofia ai le osofa'ia so'o ai aoga Maualuluga a Leone ma Tafuna ae maise fo'i Samoana.

Ua ma’ea ona ia vala'au i le Komesina o Leoleo, Le’i Sonny Thompson, ina ia toe sailia atu, le iuga ua i ai le suesuega a ali'i leoleo i le tele o osofa'iga o falea'oga i lona itumalo, le Laumua i Leone, lea na osofa’i i le masina o Tesema 2018.

I le fonotaga a le A'oga atoa i le fanau a'oga, le vasega o faia'oga ma faufautua, fa'atasi ai ma le vasega o tama o le atunu'u o lo'o tutula'i mai i tofiga fa'aleitumalo ma afio'aga e i lalo o le ta'ita'iaga a le Ofisa o Mataupu Tau Samoa, sa iloga ai ona tima'ia le fanau a'oga i lo latou soifua fa'alogo ma usiusita'i i tulafono ua mae'a fa'ataoto ai, mo le tamaitiiti ma le teineititi a'oga, ina ia mautinoa ua to'ai taunu'u lona soifua taumafai i se taunu'uga lelei i le lumana'i.

"O le fa'alogo fo'i lena i tulafono uma a le Malo, e tatau ai ona latou le osofa'ia so'o se nofoaga o le Malo ma fa'aleagaina se mea totino o i ai i totonu o nei potu a'oga. O le faiva fo'i o tagata faigaluega uma lava a le Malo, o le va'ava'aia tele lea o nei nofoaga uma, ae maise o le nofoaga o lo'o a'otauina ai le fanau i tomai eseese aua lo latou lumana'i. O se galuega faitele a i tatou uma ona faia o lea galuega mita'i ma matau aga a le fanau o lo'o fa'aleagaina falea'oga ma meatotino i totonu o lotoa o Laumua uma i le teritori,” o se tala lea a le tamaitai faipule.

"Afai ae i ai se tasi sa ia matauina i latou nei e faia nei uiga mataga e fa'ailoa ai le leai o se ava i galuega o lo'o taumafai i ai faia'oga ma lea fo'i matagaluega o le Malo ina ia popoto fanau, e mana'omia lava ona fa'ailoa ane i le au leoleo suesue, se'i maua mai ae fa'asala ina ia le toe faia ai.”

Ua fa'ailoa fo'i e le Pule Aoga i Leone e tusa ma nisi o lo masalomia e le pulega ma le fanau a'oga i Leone sa osofa'ia lava potu a'oga nei, "Ua o mai i le aoga e pei lava e leai se mea o tupu i o latou olaga, ma ua amata ai ona a'afia le to'atele o isi fanau a'oga, aua ua pei o nisi e le mafai ona fa'asaina e le tulafono ona tagofia. O uiga na e mafua ai ona toe fa'ato'ateleina le latou vaega fa'aleagamea i totonu o le a'oga.” (Tagai i le Lali i le lomiga i le aso Tofia i le iloiloga a le komiti a le Maota o Sui i lenei mataupu i osofaiga i aoga maualuluga a Leone ma Tafuna.)