Tala otooto o Faamasinoga

KUEVA J. MCFALL

O le ali’i mai Samoa lea na tu’uaia i lona faia o uiga mataga i se tama’ita’i, atoa ai ma lona fa’alala i ai o se fana ina ia fa’afefe ai o ia, ua ia ta’utino i luma o le fa’amasinoga e fa’amaonia tu’uaiga fa’asaga ia te ia.

O le vaiaso na te’a nei na tula’i ai Kueva J. McFall i luma o le fa’amasinoga maualuga mo le tolaulauina o le latou maliliega ma le malo. O le ali’i loia fautua lagolago ia Rob McNeill na tula’i mo McFall, ae o le tama’ita’i loia sili lagolago ia Laura Garvey na tula’i mo le malo.

E 3 tagi eseese na faila e le malo faasaga ia McFall. I le tagi muamua, na tu’uaia ai i moliaga e tolu e aofia ai moliaga mamafa e lua o le faiaiga fa’amalosi ma se tama’ita’i, faapea ai ma le taofia fa’apagota o se tagata i se auala fa’asolitulafono. Sa tu’uaia fo’i o ia i le moliaga mama o le faaoolima i le tulaga tolu.

I le tagi lona lua, sa tu’uaia ai McFall i moliaga mamafa e lua o le fa’aaoga fa’asolitulafono o se a’upega faapea ai ma le taofia faapagota o se tagata i se auala fa’asolitulafono. Sa tu’uaia fo’i o ia i moliaga mama e lua o le fa’aoolima i le tulaga tolu. I le tagi lona tolu, sa tu’uaia ai le ua molia i le moliaga mamafa e tasi o le sola lea i tua mai le toese.

I lalo o lemaliliega na sainia e le ua molia ma le malo, na ia malie ai e tali ioe i le moliaga muamua o lo o i le tagi muamua a le malo, le moliaga o le tagofia lea o itu tinosa o se tama’ita’i i le tulaga muamua, faapea ai ma le moliaga muamua o lo o i le tagi lona lua, le moliaga o le fa’aaoga fa’asolitulafono o se a’upega.

I le tali ioe ai o McFall i moliaga mamafa e lua, sa ia ta’utino ai e fa’apea, i se taimi o le aso 23 o Ianuari, 2018, sa ia tagofia ai itutinosa o se tama’ita’i e aunoa ma sona malie i ai, ma le fa’amoemoe e fa’amalie ai ona lagona tu’inanau.

Na ta’utino le ua molia e fa’apea, i le aso e pei ona taua, sa ia una’i ai le tama’ita’i na a’afia i totonu o lana ta’avale pikiapu sa paka i Nu’uuli, ma ia tagofia ai ona itu tinosa i se auala fa’asolitulafono.

Sa ta’utino atili fo’i le ua molia e fa’apea, i le aso 23 o Oketpa 2017, sa ia fa’alala ai se fana i foliga o le tama’ita’i na a’afia ma le fa’amoemoe e fa’afefe ai o ia. Sa ia ta’utino atili fo’i e fa’apea, i lona faia ai o lenei gaioiga, sa ia taofia faamalosi ai ma le tama’ita’i na a’afia i lalo o lana vaavaaiga i se auala fa’amalosi.

Ua sauni le malo e finau i le fa’amasinoga mo se fa’asalaga fa’a nofovaavaaia, lea e aofia ai le tuliina e le ua molia o se fa’asalaga fa’a falepuipui, a mae’a, ona ia tuua lea o le atunu’u ae toe fo’i atu i lona atunu’u o Samoa.

E talitonu le malo, talu ai le mataupu e pei ona ta’usala ai le ua molia, e le tatau ona toe i ai pea o ia i le atunu’u, ona o lana gaioiga sa faia e ono lamatia ai le tama’ita’i na a’afia poo nisi fo’i tagatanu’u i le lumana’i.

O lo o taofia pea McFall i le toese i Tafuna e fa’atali ai le aso 25 o Aperila lea ua fa’atulaga e lau ai lana fa’asalaga.

TIE JEFFREY LOMON

Ua poloaina e le Fa’amasinoga Maualuga le ali’i talavou o Tie Jeffrey Lomon na te tuliina masina e 14 o lana fa’asalaga fa’a falepuipui sa fa’amalumalu e le fa’amasinoga, ina ua fa’amaonia lona le usitaia o tuutuuga o lana nofovaavaaia sa tuuina atu i le 2017.

O le vaiaso na te’a nei na tula’i ai Lomon i luma o le fa’amasinoga mo le tuuina atu o lana fa’asalaga, e mafua mai i lona le usitaia o tuutuuga o lana nofovaavaaia.

O ni isi o tuutuuga o le nofovaavaaia, e le gata ia alu e vaai le ofisa faanofovaavaaia i masina ta’itasi, ae tatau fo’i ona ia totogiina le salatupe ma le tupe o le taui mo mea sa fa’aleagaina i lana solitulafono, aua fo’i ne’i ona toe solia se tulafono.

Na taua i le ripoti a le Ofisa Faanofovaavaaia, e leai ma se poloaina na usitaia e le ua molia. Talu mai le taimi na magalo mai ai le ua molia i tua, ua fa’atolu ona pu’e fa’apagota o ia e Leoleo ma molia i solitulafono eseese.

Na fa’atoese Lomon i le fa’amasinoga e tusa ai o lana solitulafono, ma ia talosagaina ai se isi avanoa mo ia se’i toe fa’aleleia ai lona olaga. Sa ia ta’utino e fa’apea, o masina na taofia ai o ia i le toese i Tafuna, ua ia a’oa’oina mai ai se lesona taua mo lona olaga, ma ua ia iloa ai, e le o se mea lelei le soli o le tulafono.

Na talosaga loia a itu e lua i le fa’amasinoga mo se fa’asalaga fa’anofovaavaaia. Na taua e le loia a Lomon ia Rob McNeill i le fa’amasinoga, le tatau lea ona amanaia le fautuaga o loo tusia e le Ofisa Faanofovaavaaia i lana ripoti, o le tu’u lea o se isi avanoa ia Lomon e sui ai lona olaga.

Na talosaga fo’i McNeill i le fa’amasinoga ina ia aua ne’i fa’aleaogaina le nofovaavaaia a lenei ali’i talavou, ae tau o se a’oa’iga e tu’u atu ia te ia.

Saunoa le afioga i le ali’i Fa’amasino ia Elvis P. Patea e fa’apea, ua tele naua avanoa sa tuuina atu e le fa’amasinoga i lenei ali’i, ae foliga mai na te le o aoaoina lava se lesona taua i lona olaga.

Mo se fa’ata’ita’iga e pei ona saunoa Patea, e 20 masina sa tatau ona fa’asala ai o ia i le toese ina ua lau lana fa’asalaga i le 2017, ona o le solitulafono o le talepe fale na ta’usala ai o ia, peita’i, e na o le 6 masina na ia tuliina i le toese, ae fa’amalumalu e le fa’amasinoga le 14 masina.

Fitu (7) masina talu ona magalo mai i tua ae toe loka e leoleo ma molia i le fa’atupu vevesi, ma toe tuu atu i ai e le fa’amasinoga le isi avanoa ina ua lau lana fa’asalaga i luma o le fa’amasinoga fa’aitumalo i le masina o Ianuari 2018, ina ua ta’usala o ia i le fa’atupu vevesi i nofoaga faitele.

E na o le tausaga talu ona mae’a lea fa’alavelave ae toe loka fo’i o ia e leoleo i le masina o Ianuari o le tausaga nei, sosoo ai ma le toe loka fa’alua i le masina o Fepuari na te’a nei, ona o tu’uaiga i le ‘ona ma le fa’atupu vevesi i nofoaga faitele.

Na fa’ailoa e Patea ia Lomon e fa’apea, ua le iloa poo le a le ituaiga avanoa e tatau ona tu’uina atu ia te ia.

“O lou avanoa mulimuli lenei mai le fa’amasinoga, afai loa e te toe sese mai ai, o le a tapunia loa se isi lava avanoa e tuuina atu mo oe, ae tuu atu sa’o loa le fa’asalaga e fetaui mo lau solitulafono,” o le saunoaga lea a Patea ia Lomon.