Tala I Vaifanua

SPC TONY BISHOP - FA'APINE LANA SATINI I LE U.S ARMY

O se tasi o alo o le atunu'u mai Aunuu SPC Tony Bishop ua fa'amau fa'ailogaina lana pine Satini i le fa'aiuga o le vaiaso na te'a nei. Sa malaga ane o ia mai Fort Wainwright, Alaska i Kalefonia mo lea fa'apinega ona o lo'o alaala ai lona Uncle o SFC Lelea Samuelu mai Alao ma Onenoa i Amerika Samoa nei. O i latou fo'i ma le auaiga o Tagovailoa sa o'o ane uma mo lea fa'amoemoe maualuga.

I le mae'a ai ona fa'apine o ia ua toe fo'i o ia i lona pou e tiute ai i Fort Wainwright lea e tolu tausaga e ao ina faigaluega mai ai. O ia o le alo e fa'asino ia Fulu ma Vi'iga Bishop o Aunu'u ma Alofau. Sa fa'au'u o ia mai Fagaitua High ma ulufale atu ai i le U.S Army. O ia fo'i o se tama fa'apelepele i nai matua matutua o Legalo ma Lemafa o Aunu'u lava.

Malo le tauta'i Bishop, ia fa'amanuia le Atua i le olaga taumafai, fa'afetai mo lau tautua.

FONO A'OGA MAUALUGA LEONE & ITUMALO E AOAOINA FANAU I LEONE:

Ua le toe fa'atali le pulega ma le aufaigaluega a Leone High School i le latou fa'ataunu'u loa o le fa'amoemoe e fono fa'atasi ma le mamalu o le Pulega Ali'i ma Faipule o Afio'aga ma Itumalo uma o lo'o a'o'oga latou fanau i lea aoga maualuga.

O le fa'amoemoe maualuga o lenei so'otau'au atu o le Pulega a Fa'asuaga Itumalo, Ali'i ma Faipule o Itumalo uma o lo'o a'oa'oina fanau i Leone, ina ia mafai ona ese fo'i se leo e fa'alogo i ai fanau, e tutula'i mai ma fa'atonu i latou i tu ma aga fa'afanau a'oga o lo'o fia sailia ma maua le poto ma le atamai lautele.

Ona ua tele fo'i osofa'iga o falea'oga, o misa fo'i e tutupu i le va o fanau, ua vala'au ai mo lea fesoasoani taua mai sui matutua o ituamalo ma afio'aga ina ia latou saunoa fa'alaua'itele i le fanau, ia alofagia latou Laumua, ia matua malupuipuia ona o i latou, ae le o le faletulu'ia mai ia i latou lava.

Na tula'i sui Pulenu'u mai Afio'aga o Pavaiai, Vailoatai, Leone, ma le Kovana Itumalo o le Falelima i Sisifo.

"O le saunoaga fa'apitoa lava o Vailoatai, aua e foliga mai o le tuaoi tonu o Vailoa ma Leone lea e tu ai lenei Laumua, ae ua matele ina vevesi fo'i fanau mai nei afio'aga e lua i totonu o le a'oga. O lea ua matua fa'amamafa lava saunoaga a Seumalo Sofa ma fa'ailoa i fanau, e matua a'afia lava latou i le malo pe a o'o loa ina fa'amautinoa atili mai le vasega o fanau a'oga po'o nisi e ona alo nei e osofa'ia so'o le a'oga ma fa'aleaga falea'oga,” o se tala lea a le susuga le Pule A'oga Patrick Danielson.

Ua fa'apena fo'i le susuga Toluao le Pulenu'u o Pavaiai, na tula'i fo'i o ia ma fai lana tala i le fanau a'oga, "E pau lava le mea o lo'o outou o mai ai i le a'oga, o le sailiga o le poto, ae le sailia ai iinei le iloa fusu, e fa'ato'a e fia iloa lava fusu, pe a ofo e te alu i le Vaega Au, e te fiu fo'i e fusu ma le fili, uma lou fia fusu, ae sau le toe fia fo'i mai i Samoa e saogalemu ai le pa'u. Tu'u lou faiai atoa ma lou tino e saili ai le atamai, ua maua se mea aoga mo oe ma lou aiga mai le vasega o faia'oga lea o lo'o fa'asoa mai mo outou. Alofa i le tautiga o tou matua e usu e saili le tupe e mafai ai ona fai mea uma mo outou."

Na tima'i fo'i le afioga le Kovana Falelima, Fuamatu Fuamatu ma ia fa'ailoa ai le fa'anoanoa o i latou uma i nei tofi e tutula'i ai, ae uma ane o le a'oga mai le latou Itumalo, o lo'o faifai tetele mai ai osofa'iga o falea'oga, pa mai ai misa i le va o fanau a'oga lava latou, o nisi fo'i o taimi ua misa atu ma nisi fanau a'oga i isi a'oga maualuluga. E matamuli uma latou e fa'ailoa mai i le falelima i sisifo fo'i le Laumua lea e tele mai ai nei fa'aletonu.

Auga tautalaga uma i le usita'i ma le fa'alogo! O mea e lua e maua ai le atamai ua mae'a tusia i le Tusi Pa'ia. Afai e na'o le pau lava lea, aisea ua le mafai ai ona maua e fanau uma le atamai?

I totonu lava o le Laumua lea o le a toe faia le isi talanoaga ma latou ta'ita'i mai le fono faitulafono i le amataga o Aperila 2019, ia maua fo'i se fa'asoa mai Senatoa ma Faipule o Itumalo uma o lo'o a'o'oga atu fo'i fanau i Leone HIgh.

O le aso Tofi nei o le a faia ai le fa'atalanoaga i le va o Faia'oga, fanau a'oga ma Matua ae maise fo'i o tama ma teine tuai a le a'oga maualuga, o nisi o mea e tatau ona silafia uma e i latou nei, ae fa'amaumau fo'i e fa'amautu atili ai le agava'a o le a'oga lea e nofo va'ava'aia mo le isi lua tausaga. Ia o'o atu i le fa'aiuga o le 2019, ua lava tapena fo'i Leone High mo le sailiiliga a le WASC lea e toe sau i lea vaitausaga.

TALOSAGA TALOFA AIR FA'ATAGAGA MO MALAGA I LE VA APIA MA PAGO

Ua talosagaina e le Talofa Airways le fa'atagaga mai le vaega o feoaiga a le fetarale (USDOT) ina ia fa'aauau ai a latou malaga ina ua tu'uesea e le Malo o Samoa i latou mai le lisi o le maliliega ma le Malo o Amerika e ta'ua o le MALIAT (Multilateral Agreement on the Liberalization of International Air Transportation) ia Mati 9, 2019.

O le Talofa Airways sa fa'atautaia a latou malaga i le va o Amerika Samoa ma Samoa fo'i i luga o lea maliliega fa'avaomalo e ala e femalaga'iga i le ea.

E le o fa'alauiloaina se mafuaga ua manatu ai Samoa e o ese mai le MALIAT.

Mai le tusi ua taua'aoina e le Talofa Airways i le USDOT, ua latou fa'ailoa atu ai, "Ona o lo ua to'esea nei le igoa o Samoa mai le lisi o malo o lo'o aofia i lalo o lea maliliega tau feoa'iga i le ea fa'avaomalo, MALIAT, o lea ua talosagaina ai e se avanoa mo se fa'atagaga a le USDOT e fa'aauau ai pea latou faigamalaga” i le va o Samoa ma Amerika Samoa i lalo o le fa’atagana fa’apitoa a le USDOT.

E le o mautinoa i le taimi nei e o afea e faia ai se fa’aiuga a le USDOT i le tusi talosaga a le Talofa Airways.

A'o le'i fa'atula'ia mai le Talofa Air, sa na'o le Polenisia, lea ua fa'aigoaina o le Samoa Airways, sa latou fa'atautaia uma femalaga'iga i le va o Pago Pago ma Samoa.

O le alava'a i le va o Tongatapu ma Pago Pago nei, o lo'o fa'atautaia e le Talofa Air e fa'alua i le vaiaso peita'i, o lo'o i ai le latou fa'amoemoe e fia faia ni a latou malaga mo Manu'a.