Fa’ailoa i le vaega iloilo iuga ata o mea sa fa’aleagaina mataupu a Siaumau

I le aso lona 5 o le fa’amasinoga autu a le susuga a Thomas Siaumau o lo o fa’agasolo i luma o le Fa’amasinoga Maualuga i le lona lua lenei o vaiaso, na mafai ai ona fa’ailoa e le malo i le vaega iloilo iuga ata o mea sa fa’aleagaina i le po na tula’i mai ai lenei fa’alavelave.

O ata sa fa’ailoa i le vaega iloilo iuga e aofia ai vaega o le ta’avale leoleo sa faaleagaina ina ua tafana, faapea ai ma moli o le malae Baseball sa tafanaina i lalo i lea po.

O le ali’i leoleo su’esu’e sa autu i ai le suesuega o lenei mataupu, susuga ia Det. Savelio Vaofanua na valaau e le malo na te fa’ailoaina i le vaega iloilo iuga mea uma e talitonu le malo sa fa’aleagaina i lea po.

Na taua e Det. Vaofanua i lana molimau e fa’apea, o ata uma sa pu’eina i vaega o le ta’avale sa fa’aleagaina, sa tapu’eina lea i le po o le aso 14 o Tesema 2017 na tula’i mai ai le fa’alavelave, ae o isi ata sa pu’eina i le taeao na sosoo ai, Tesema 15 ina ua amata aloaia suesuega a Leoleo e tusa ai o le fa’alavelave sa tula’i mai.

E tusa ai o le molimau a le ali’i leoleo suesue, e 2 pulufana na aafia ai le tino o le ta’avale leoleo, o le isi pulu fana na aga’i mai i le pito i luga o le faitoto’a o le pasese, ma faaleagaina ai le pito i luga o le nofoa o le pasese, ma aga’i atu ai loa ma tata’e le tioata pito i tua o le ta’avale.

Ae o le isi pulu fana na a’afia ai le ogatotonu o le faitoto’a o le pasese, ma nuti ai le faamalama o le faitoto’a, ma alu ai le pulu fana ma nofo i totonu o le faitoto’a. O le pulu fana la lea na mafai ona maua ma auina atu i le Fale Suesue a le Ofisa o Leoleo i Honolulu mo su’esu’ega faapitoa.

O ata sa mafai ona pu’eina ma fa’aali i le vaega iloilo iuga, na faamaonia ai le paepae solo o tioata taei i luga o nofoa faapea ai ma le fola o le ta’avale.

E ese mai i le ta’avale leoleo sa fa’aleagaina, na taua fo’i e Det. Vaofanua le fa’aleagaina o moli i totonu o le malae Baseball i Tafuna. E ui o pou moli nei e uumi, peita’i na fa’amaonia i a latou suesuega le taei o nisi o moli, o tioata taei na mafai ona maua i luga o le mutia i le taimi na fa’agasolo ai a latou suesuega.

A o fa’agasolo suesuega a leoleo, sa latou taumafai ai e saili pe na fa’apefea ona ulufale mai tagata na fa’aleagaina mea totino i totonu o le fanua o le malo, e pei ona taua i le molimau a le ali’i leoleo su’esu’e.

I tua o le fanua o le malo, e si’omia i se pa uaea, lea e tuaoi ai meatotino a le malo ma fanua o aiga Petesa e aofia ai ma fanua o le aiga o Siaumau. I le pito i lalo o le pa uaea e i ai se pu, e talitonu leoleo o le pu lea e fa’aaoga e tupulaga talavou e ulufale mai ai i totonu o le fanua o le malo ma aga’i atu i le malae Baseball.

Na fesili le loia a Siaumau ia Richard deSaulles i le molimau pe sa i ai lava se taimi na ia vaaia ai Siaumau o oso mai i lalo o le pu o le pa uaea sa ia taua ma aga’i atu i totonu o le malae Baseball. Na tali le molimau, e leai.

Na toe fesili le loia a le itu tete’e, pe sa i ai se molimau na ia fesiligia ma taua ai le vaaia o Siaumau o oso mai i le pito i lalo o le pa uaea e pei ona taua i lana molimau. Na toe tali fo’i le ali’i leoleo, e leai.

Ina ua fesiligia e deSaulles le molimau, poo fea ua ave uma i ai mau faamaonia na mafai ona maua mai i le nofoaga na tula’i mai ai le fa’alavelave, na tali le ali’i leoleo, sa ave ma teu i le potu e teu ai mau faamaonia a le malo, ae o isi mau faamaonia sa auina atu i Honolulu mo suesuega.

“I mau faamaonia uma sa maua e leoleo i lenei mataupu, e i ai lava se vaega e mafai ai ona fesoota’i Siaumau i lenei mataupu,” o le fesili lea a deSaulles.

Na tali le ali’i leoleo, “E leai ni mau faamaonia e mafai ai ona fesoota’i Siaumau i lenei mataupu, ae o le mae’a ai ona fesiligia o molimau e fa’atatau i le fa’alavelave sa tula’i mai, ua mafai ai loa ona fesoota’i le ua molia i lenei mataupu.”

Na toe fesili deSaulles i le ali’i leoleo, “Lona uiga la, o le autu atoa lava o le tagi a le malo fa’asaga ia Siaumau, e fa’avae mai lea i luga o fa’amatalaga a molimau, ae le faavae mai i luga o ni suesuega a leoleo ma mau faamaonia sa outou maua.” Na tali le ali’i leoleo, “O lea lava.”

Na taua fo’i i le taimi na fesiligia ai e le loia a le itu tete’e le molimau a le malo, sa i ai masalosaloga o le isi uso o Thomas, le susuga ia Elliott Siaumau Jr na masalomia i lenei mataupu, peita’i na suia atoa masalosaloga a leoleo ina ua aga’i atu se molimau sa vaai tino i le fa’alavelave, ma ia taua i leoleo, e le o Elliott Jr na faia le gaioiga, o Thomas.

Na taua e Det. Vaofanua e fa’apea, a o fa’agasolo lana suesuega i lenei mataupu, o le taimi lea na ia maua ai le tala, o Elliott Jr o loo taofia i totonu o le falepuipui i le taimi lea, ona o se isi fo’i mataupu o lo o tu’uaia ai o ia.

E tusa ai ma le molimau a le ali’i leoleo, i le taeao o le aso Faraile, Tesema 15, 2017 ina ua tuana’i le po na tafana ai le ta’avale a leoleo, ae tula’i loa Elliott Jr i luma o le fa’amasinoga faaitumalo, ina ua pu’e fa’apagota o ia e leoleo i le vaveao o le aso lava lea i se isi fo’i mataupu.

O le faaiuga o lea mataupu, na toe tatala ai i tua Elliott Jr ae fa’aauau pea suesuega a Leoleo e uiga i lenei fa’alavelave.