Tala I Vaifanua

AFAINA NA LIPOTIA - VAITAU O LOLOGA, SOLOGA MA MATAGI MALOLOSI

I le vaitau na se'i mavae atu nei o lologa ma sologa, o matagi malolosi fo'i ma le aupouli o aoto'a pa'auli ona o le tetele o timuga, na lipotia mai ai mu e lua. Tasi o nei mu sa tupu lea i le afio'aga o Aoloau, ma le tasi i le afio'aga o Masefau.

O nei fa'alavelave uma fa'afuase'i ua mae'a fa'ailo i le vaega o le Koluse Mumu a Amerika Samoa, ma o se fa'afetai fo'i ona e le mafai ona taliesea se talosaga mo se fesoasoani mai lenei Sosaiete agalelei. Ua maea fo'i ona fa'ao'o atu ni mea ua va'aia e mana'omia e aiga ma ua fa'afetaia le latou fesoasoani e nei aiga uma sa pagatia.

Ua fa'ailoa mai e tasi le sologa na toetoe a a'afia ai se falenofo o le aiga i Pago Pago, ma sa tula'i le afioga i le Faipule, Vesiai Poyer Samuelu ma tu i le va ina ia vave ona maua le fesoasoni mai le Matagaluega o Puipuiga Lotoifale/TEMCO ma le Kouse Mumu.

Ua faailoa mai e lenei aiga, o le fa'alua ai lea ona solo o latou tuafale, peita'i o le sologa lea ua fai si tele, ae o le sologa muamua e le'i afaina tele ma sa latou teuina lava e i latou.

Ua talosagaina nei fo'i e Vesiai se suesuega fa'apitoa mo se fautuaga sili mo lea aiga e faia e ali'i Inisinia, pe o le a se faiga e ono fai e le aiga ina ia saogalemu lo latou malu i le lumana'i, ina nei toe solo fo'i lea ogaeleele.

"O ai lava ua fesoasoani mai fa'afetai, ae maise lava o le Koluse Mumu ona o le mafatiaga ua o'o fo'i i si nei aiga, ae fa'afetaia fo'i o ala fa'ata'alise o feso'ota'iga ua mafai ai ona vave o'o mai le asiasiga a le TEMCO ma le Koluse Mumu. O le mea lava lenei e ao ai ia i tatou uma ona foa'i mo le Koluse Mumu aua e pau lava lea o se fesoasoani e o'o muamua mai i nai o tatou aiga i taimi o pagatia. Fa'afetai fo'i mo talosaga i le saogalemu o lenei aiga i lo'u itumalo,” o se tala lea a Vesiai, le faipule mai Pago Pago.

TOTOGI PEIMENI MULIMULI - MAOTI FA'ATAUGA BLUESKY

I se pepa o fa’amatalaga ua fa’ailoa ai ua mae'a le peimeni mulimuli e fa'atau maoti ai e le Kamupani a le Amalgamated Telecom Holdings Limited (ATH) mai Fiti, le kamupania a le Bluesky Group.

O le tinoitupe e $43.5miliona na totogia mulimuli ia Fepuari 22, 2019 lea ua fa'amae'a atoatoa ai le tau na ofoina mo lea pisinisi e fa'atuese atu ai fa'atasi ma ana aseta. O Siea uma fo'i sa aofia i totonu o le BlueSky ua faatau fa'atasi uma atu ai lava i lea tau ua mae'a totogia nei ma ua suia atu nei i le ATH.

E tusa ai ma le fa'asalalauga fa'alaua'itele, ua latou fa'ailoa ai, "O le a tele fo'i se suiga lelei e mafai ona fa'atino e le ATH i le Pasefika atoa ona o lenei fa'atauga, o le a latou mafaia fo'i ona fa'aleleia atili feso'ota'iga tau telefoni ona o lenei avanoa ua latou maua e tautuaina ai Amerika Samoa."

Na amata le fa'atauga o le Bluesky i le tausaga e 2016 i le ATH ma o le tau na fa'amauina sa fa'atau ai e $79.1miliona. Na fa'atagaina e le Federal Communications Commission lenei fa'atauga ia Tesema 2018 ma ua mae'a fo'i ona kilia mai e le US Dept Justice ma le US Dept of Homeland Security lea fa'atauga i le masina talu ai, ma fa'amaonia loa lea fa'atauga ina ia fa'amautu loa.

Ua faailoa mai fo'i e Toleafoa Douglas Greevey,  le pulesili o le Bluesky o le masina o Mati e tele nai suiga o le a va'aia i le fa'afoega o le BlueSky i atunu'u ua fa'atautaia ai e o'o atu i le atu Kuki, ma e i ai fo'i nisi o le Kamupani a le ATH o le a latou fa'afaigaluegaina i o latou ofisa i atunu'u o lo'o fa'atula'ia ai latou ofisa.

FALEPUIPUI ONA UA FAATAUMAOI TAMAITI I NIUSILA

I se lipoti mai Niu Sila, o lo’o fa’ailoa ai se tama Samoa e 56 tausaga le matua lea ua fa'amaonia e le fa'amasinoga i Aukilani ana solitulafono e 95 mai le 106 soligatulafono na molia ai, i lona fa'ataumaoia o fanau tamaiti laiti, ma ua fa'asalaina nei i le 22 tausaga i le falepuipui, ae le mafai ona palola se'i vagana ua mae'a le 10 tausaga o nofo i lea to'ese.

O ia lenei o Alosio Taimo, ma o ia sa matua fa'amoemoeina fo'i i totonu o le nofoaga sa alaalata'i ai i Niu SIla, ae maise o le latou ekalesia sa lolotu ai ma i latou e iloa lelei lenei tama sa fa'amoemoeina tele e i latou e a'oa'oina latou fanau i le fa'agatama o le Lakapi.

I le 30 tausaga sa galue ai lea ali'i o se faia'oga o ta'aloga Lakapi, sa ia fa'atinoa ai nei uiga mataga i le fanau tama, ma sa i ai lava se tasi o fanau nei sa ia molimauina o Taimo o le tagata o se "tauatama".

O le tamaititi la'ititi ai lava ua mafai ona tula'i mai e fa'ailoa soligatulafono a Alosio sa faia ia te ia e 9 tausaga le matua.

O le isi fa'amaoniga sili na maua e leoleo, o lo'o loka uma e Alosio Taimo le tele o ata o nei tamaiti na te faia i ai nei mea i totonu o lana telefoni, ma e i ai ana ata fa'apitoa, ua ia fa'alisia o le "Aiga e Fa'avavau" po'o le "Family Forever".