Amata aloaia le fa’amasinoga autu a Thomas Siaumau

O le vaiaso nei na amata aloaia ai le fa’amasinoga autu i le va o le malo ma le susuga a Thomas Siaumau, e mafua mai i le fa’alavelave lea na tula’i mai i le po o le aso 14 o Tesema 2017, lea o lo o tu’uaia ai e le malo ia Siaumau i lona tafanaina lea o se ta’avale a Leoleo.

E 8 moliaga o lo o tu’uaia ai e le malo ia Siaumau, o ia moliaga e aofia ai moliaga mamafa e 5 e pei o le faaoolima i le tulaga muamua, taumafai e fasioti se tagata i le tulaga muamua, 2 moliaga o le fa’aaoga fa’asolitulafono o se a’upega, ma le fesoasoani i se tagata e talavou i lalo o le tulafono e soli le tulafono. O loo tu’uaia fo’i o ia i moliaga mama e tolu e aofia ai le fa’atupu vevesi i nofoaga lautele, faaoolima i le tulaga tolu, atoa ai ma le umia fa’asolitulafono o se aupega.

E to’a 6 sui o le vaega iloilo iuga na filifilia i le aso Gafua latou te finauina se fa’aiuga o lenei mataupu. O i latou nei e aofia ai tama’ita’i e to’afa ma ni ali’i se to’alua.

O ali’i loia e to’alua mai le Ofisa Loia a le RDA ia Richard deSaulles ma Daniel Holladay o loo tula’i mo Siaumau, ae o tama’ita’i loia sili lagolago e to’alua ia Christy Dunn ma Laura Garvey o lo o fai mai sui o le malo, ae lagolagosua i ai le ali’i Leoleo Su’esu’e ia Det. Savelio Vaofanua, o ia lea sa fa’auluulu i ai le suesueina o lenei mataupu.

I taimi o ulua’i fa’afinauga, na faailoa ai e le malo e fa’apea, e to’atele molimau sa latou faailoa i Leoleo, sa latou vaai ia Siaumau o loo ia umia se fana ma fana ai le ta’avale Leoleo, peita’i na finau le loia a Siaumau ia deSaulles e fa’apea, ua avea le fa’atamala o le malo i le fa’atinoina o le latou suesuega, ma auala ua sese ai le tagata ua latou molia.

ULUA’I FOLASAGA A LE MALO

I le ulua’i folasaga a le malo, na fa’atepa ai e le tama’ita’i loia ia Dunn le vaega iloilo iuga i le faalavelave sa tula’i mai i le po o le aso 14 o Tesema 2017, ina ua aga’i atu ni Leoleo se to’alua e su’esu’e le mataupu e fa’atatau i ni tamaiti sa latou tauaiina atu ni mea faapapa (cherry bombs) i totonu o le lotoa a le Ofisa o le ASTCA i Tafuna.

A o aga’i atu Leoleo ia e to’alua e saili poo ai na tauaia mea faapapa i totonu o le lotoa a le ASTCA, sa maitauina ai e Leoleo le faitoto’a o le lotoa o le Malae Baseball o loo matala, o lea na la aga’i atu ai loa e siaki le mafua’aga ua matala ai le faitoto’a.

Na fiu Leoleo se saili le nofoaga e le vaai ai i ni tagata, ae o le taimi lea sa la faalogoina ai le pa pa mai o le leo o se fana o loo faapa, ona fai lea o le tonu, o le a ui atu le isi Leoleo i totonu o le lotoa e siaki poo i ai ni tagata o lalafi ai, ae o le a ta’amilo mai le isi Leoleo ma le ta’avale i tua o le pa.

A o ta’amilo mai le ta’avale Leoleo i tua o le pa, na fa’afuase’i ona tafana e se tagata le ta’avale a Leoleo. E 3 pulufana na tau i le tino o le ta’avale. O le isi pulu na ta’e ai le tioata o le faitoto’a o le pasese, o le isi pulufana na ta’e ai le tioata o le pito i tua, ae o le isi pulufana ma ati i le tino o le faitoto’a o le ta’avale.

E ui i fa’aletonu i le tino o le ta’avale Leoleo, e leai se isi o Leoleo e to’alua na tiute i lea taimi na a’afia.

Na taua e Dunn e fa’apea, ina ua amata suesuega a Leoleo e uiga i lenei mataupu, e tele pulu fana e lei faaaogaina atoa ai ma atigi pulu fana sa maua i le vaega na tula’i mai ai le fa’alavelave, o ia vaega uma o le a avea ma mea molimau i lenei mataupu.

ULUA’I FA’AFINAUGA A LE ITU TETE’E

Na taua e deSaulles i lana ulua’i fa’afinauga e fa’apea, e masani lava Samoa ma isi atunuu o le lalolagi, e le mafai ona aai muamua se aiga se’i vagana ua fai muamua le tatalo fa’afetai, peita’i o le mea lea ua tula’i mai, ua le tausisi le malo i le ta’iala lea, ina ua latou aai muamua ae lei faia se latou lotu fa’afetai.

Na finau deSaulles e fa’apea, ana mae’a suesuega a Leoleo e uiga i lenei mataupu, atonu e sa’o fo’i le tagata latou te molia, ae talu ai ua vave vave tele le malo i le faia o le latou faaiuga ina ia pu’e fa’apagota loa Siaumau ma molia, o le mafua’aga lea ua mafua ai ona sese le tagata ua latou molia.

Soo se mataupu lava e faatatau i le faapapaina o ni fana, e tatau lava i le malo ona mae’ae’a a latou sailiiliga e faia, ma ia i ai fo’i ni mau faamaonia e lagolago ai le latou tagi, e pei la o fana.

I le mataupu fa’asaga ia Siaumau, na fa’ailoa e deSaulles i le vaega iloilo iuga e fa’apea, e ui o loo finau mai le malo sa fa’aaoga e Siaumau le fana o le ituaiga o le 9mm ma le isi ituaiga fana o le ‘assault rifle’, peita’i o le itu na te fia faailoa, e leai ma se fana o nei ituaiga fana o le a mafai e le malo ona fa’ailoa i le taimi o lenei fa’amasinoga.

“Tusa lava la poo fea le mamao e gata mai ai taumafaiga a le malo e auaua’i mai le tele o a latou mea faamaonia eseese, o le mea moni lava, e le taitai mafai e nei mau faamaonia ona ta’usala ai Siaumau i lenei mataupu, ona e leai ni fana na latou maua e mafai ai ona fesoota’i le faalavelave sa tula’i mai ma Siaumau,” o le fa’afinauga lea a deSaulles.

Sa ia finau fo’i e fa’apea, na pau le gaioiga a le malo lea ua latou taumafai e fai, o le toso mai lea o a latou mau faamaonia ua maua ina ia maua ai se avanoa e faafesoota’i atu i ai Siaumau, ma faafoliga ai o Siaumau sa faia le solitulafono.

Na talosaga deSaulles i le vaega iloilo iuga ina ia latou fa’afofoga fa’alelei i taualumaga o lenei mataupu, ma ia latou vaavaai toto’a uma i mau fa’amaonia a le malo, ina ia faigofie ai ona fai le latou faaiuga, e le nofosala Siaumau i moliaga uma ua faia fa’asaga ia te ia.

O le itula e 9:00 i le taeao nei lea ua fa’amoemoe e toe fa’aauau ai lenei mataupu.

O le afioga i le ali’i Fa’amasino Sili lagolago ia Fiti Sunia o loo fa’afofogaina lenei mataupu, ae lagolago i ai le afioga i le Fa’amasino Lagolago Sinia ia Mamea Sala Jr, ma le afioga i le ali’i Fa’amasino Lagolago ia Tunupopo Alalafaga Tunupopo.